ކިޑްނީއަށް ހާއްސަ ދެވަނަ ޑޮކްޓަރު 10 އަހަރަށް ފަހު ތަމްރީންވެއްޖެ

ކިޑްނީގެ ބަލިތަކަށް ދިވެހި އެންމެ ޑޮކްޓަރަކު ފަރުވާދެއްވާތާ 10 އަހަރަށް ފަހު، ދެވަނަ ޑޮކްޓަރު ތަމްރީންވެވަޑައިގެން ހިދުމަތަށް ނުކުންނަވައިފި އެވެ.

ސައުތު އެފްރިކާއިން ދެ އަހަރުގެ ސަބް-ސްޕެޝަލިޓީއަށް ފަހު ސަރުކާރުގެ މައި ހޮސްޕިޓަލް، އައިޖީއެމްއެޗާ ގުޅިވަޑައިގަތީ ޑރ. އަހުމަދު އަބްދުﷲ އެވެ.

އެ ދާއިރާ އިން ހާއްސަވާން ބޭރަށް ވަޑައިގެންނެވުމާ ހަމައަށް އޭނާ ހުންނެވީ އެތެރެހަށީގެ ބަލިތަކުގެ ޑޮކްޓަރެއްގެ ގޮތުގައި އައިޖީއެމްއެޗްގެ ކިޑްނީ ބަލީގެ ޑިޕާޓްމަންޓުގަ އެވެ.

ރާއްޖޭގެ ގިނަ ބަޔަކު ތަހައްމަލުކުރާ ކިޑްނީ ބަލީގެ ދިވެހި ފުރަތަމަ ޑޮކްޓަރަކީ، ޑރ. އިބްރާހިމް ޝިހާމެވެ. ކިޑްނީގެ ބަލިތަކުން ޕީއެޗްޑީ ހެއްދެވުމަށް ފަހު އޭނާ އައިޖީއެމްއެޗުގައި މަސައްކަތްކުރައްވާތާ 10 އަހަރު އަހަރުވެއްޖެ އެވެ.

އަހްމަދު އަބްދުﷲ ހިދުމަތާ އަލުން ގުޅިވަޑައިގަތުމަށް މަރުހަބާ ކިޔައި، އައިޖީއެމްއެޗުން ސޯޝަލް މީޑިއާގައި މިއަދު ކުރި ޕޯސްޓުގައި ބުނީ ސިއްހީ ދާއިރާއަށް އޭނާ މުހިންމު ހިދްމަތްތަކެއް ކޮށްދެއްވާނެ ކަމަށް އުއްމީދުކުރާ ކަމަށެވެ. އަދި ޕްރެކްޓިސްގައި އޭނާގެ ތަޖުރިބާގެ ބޭނުން ހިފުމަށް ވަރަށް ބޮޑަށް ޝައުގުވެރިވާ ކަމަށް ވެސް ބުންޏެވެ.

ކިޑްނީ ބަލީގެ މީހުން ގިނަ ކަމަށް ކަމާގުޅުން ހުރި ފަރާތްތަކުން ބުންޏަސް، އެ ބައްޔަށް ސީދާ ފަރުވާ ހޯދާ މީހުންގެ އަދަދެއް ސާފެއް ނުވެ އެވެ.

"މިހާރު"ގެ ޕޮޑްކާސްޓުގައި ޑރ. ޝިހާމް ވިދާޅުވީ ކިޑްނީގެ ބައްޔަށް އަސަރުކުރާ އެހެން ބަލިތައް ގިނަ ކަމަށެވެ.

"ރާއްޖޭގައި ވަރަށް ގިނަ ކިޑްނީ ބަލިތައް، ކިޑްނީ ބަލިތަކަށް ވާރުތަކުރާ ހަކުރު ބަލި، ފަލަ ބަލި، ހައިޕަ ޓެންޝަނަކީ ވެސް މި ހުރިހާ އެއްޗަކީ ވެސް ގިނަ އެއްޗެހި. އަޅުގަނޑަށް ބުނަން ނޭނގޭ އެއްޗަކީ ދުނިޔޭގެ ނިސްބަތާ ބަލާފައި ރާއްޖޭގައި ގިނަކަން. ވަރަށް ގިނަ މީހުން ބުނާ އެއްޗެއް ރާއްޖޭގައި ވަރަށް ގިނައޭ. އެހެން ބުނަން ވާނީ ދުނިޔެއާ ކޮމްޕެއާ ކޮށްފައި. އެހެން ބުނާކަށް އެވިޑެންސެއް އަދި ނުފެނޭ،" އޭނާ ވިދާޅުވި އެވެ.

އާސަންދައިން މީގެ ކުރިން ހިއްސާކުރި މައުލޫމާތުތަކުގައިވާ ގޮތުން، ކިޑްނީ ޓްރާންސްޕްލާންޓް ހެދުމަށް 2018-2020 އަށް 70 މީހަކަށް އެހީތެރިވި އެވެ. އެ ޕްރޮސީޖާއަށް އެވްރެޖުކޮށް 13،800 ޑޮލަރު ހަރަދުވާނެ އެވެ. ދައުލަތުން ދެނީ ފަރުވާއަށް ދާ ހަރަދު އެކަންޏެވެ.