ޕާޓީތަކުގެ ދަފްތަރުން ވަކިވާން ދެން އެދެން ޖެހޭނީ އޮންލައިންކޮށް!

ސިޔާސީ ޕާޓީތަކުން ވަކިވާން އެދި އިލެކްޝަންސް ކޮމިޝަނަށް އޮންލައިންކޮށް ހުށަހަޅަން ޖެހޭ ގޮތަށް ބަދަލުކޮށްފި އެވެ.

އިލެކްޝަންސް ކޮމިޝަނުން މިއަދު ބުނީ، ސިޔާސީ ޕާޓީތަކުގެ މެމްބަރުންގެ ދަފްތަރުން ވަކިވާން މާދަމާ އިން ފެށިގެން ހުށަހަޅަން ޖެހޭނީ އެ ކޮމިޝަންގެ ޕޯޓަލް (my.elections.gov.mv) އިން ކަމަށެވެ.

އިލެކްޝަންސް ކޮމިޝަނުން މި ފަހުން ވަނީ ސިޔާސީ ޕާޓީން ވަކިވުމަށް އެދި ހުށަހަޅާ ޕްރޮސެސް ފަސޭހަ ކޮށްދީފަ އެވެ.

އެ ކޮމިޝަނުން މިދިޔަ މަހު ފަހުކޮޅު، ސިޔާސީ ޕާޓީތަކުގެ ގަވައިދަށް ގެނައި ނުވަ ވަނަ އިސްލާހުގައި ބުނީ ޕާޓީން މެމްބަރަކު ވަކިވުމަށް އެދޭތާ 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭން ޖެހޭނެ ކަމަށެވެ. އެ މުއްދަތުގެ ތެރޭގައި އެކަން ނުކޮށްދީފި ނަމަ އީސީން ކަނޑައަޅާ ނިޒާމުގެ ތެރެއިން ޝަކުވާ ހުށަހެޅުމުން އޭނާގެ ނަން، ޕާޓީގެ ދަފްތަރުން އުނިކޮށްދޭން ޖެހޭނެ އެވެ.