ސްޕީޑް ކެމެރާތަކުން ވަގުތުން ޖޫރިމަނާ މެސެޖު ފޮނުވޭނީ ގާނޫނު ބަދަލުކޮށްގެން: ޕޮލިސް

ސިނަމާލެ ބްރިޖުގައި ދުއްވަން ކަނޑައަޅާފައިވާ ސްޕީޑަށް ވުރެ ބާރަށް ދުއްވައިފި ނަމަ ވަގުތުން ދެނެގަނެ، ޖޫރިމަނާ ކުރެވޭނީ ގާނޫނު އިސްލާހު ކޮށްގެން ކަމަށް ފުލުހުން ބުނެފި އެވެ.

އޮކްޓޯބަރު 15، 2023 އިން ފެށިގެން ފުލުހުން ވަނީ ބްރިޖުގައި ހަރުކޮށްފައިވާ ސްޕީޑް ކެމެރާތައް މެދުވެރިކޮށް ވެހިކަލް މޮނިޓާ ކުރަން ފަށައިފަ އެވެ.

ބްރިޖުގައި ދުއްވަން ކަނޑައަޅާފައިވާ ސްޕީޑަށް ވުރެ ބާރަށް ދުއްވައިފި ނަމަ ނުވަތަ ގަވައިދާ ހިލާފަށް ލޭން ބަދަލު ކޮށްފި ނަމަ އެ އުޅަނދެއްގެ ވެރިފަރާތަށް މެސެޖެއް ފޮނުވަ އެވެ.

އެ ހިދުމަތް ފަށާފައި ވަނީ ފުލުހުން މީގެ ކުރިން ބުނެފައިވާ ގޮތުގައި ބައެއް އެހެން ގައުމުތަކުގައި އޮންނަ ގޮތަށް ގަވައިދާ ހިލާފަށް ދުއްވާ އުޅަނދުތައް ވަގުތުން ޖޫރިމަނާ ކުރެވޭ ގޮތަށް ހެދުމަށެވެ. އެހެން ނަމަވެސް މިއަދާ ހަމައަށް ވެސް އެއްވެސް ފަރާތެއް އެގޮތަށް ޖޫރިމަނާއެއް ނުކުރެ އެވެ.

އެކަމާ ގުޅޭ ގޮތުން "މިހާރު"ން ސުވާލު ކުރުމުން ޗީފް ސްޕްރިޑެންޓް އޮފް ޕޮލިސް ހުސެއިން ސަމީރު ވިދާޅުވީ ގަވައިދާ ހިލާފުވާ ފަރާތްތައް ވަގުތުން ޖޫރިމަނާ ކުރަން ނުފެށި އޮތީ ގާނޫނުގައި ހުރި ހުރަސްތަކާ ގުޅިގެން ކަމަށެވެ.

އެއްގަމު ދަތުރުފަތުރުގެ ގާނޫނުގައި ބުނާ ގޮތުން މަގުމަތީގެ ގަވައިދުތަކާ ހިލާފު ވެއްޖެ ނަމަ ޖޫރިމަނާ ކުރަން ޖެހޭނީ އެ އުޅަނދެއް ދުއްވި ފަރާތެވެ. ބްރިޖު މަތީގައި ބާރަށް ދުއްވާ ފަރާތަކީ އެ އުޅަނދެއްގެ ވެރި ފަރާތް ކަން ފަސޭހައިން ކަށަވަރު ނުކުރެވޭ ކަމަށާއި އެހެންވެ މިހާރު އޮތް ގޮތުން ލައިސެންސް ޕްލޭޓަށް ބަލައިގެން ވެރިފަރާތް ޖޫރިމަނާ ނުކުރެވޭނެ ކަމަށް އޭނާ ވިދާޅުވި އެވެ.

މީގެ އިތުރުން ޖެހިޖެހިގެން ތިން ފަހަރު ގަވައިދާ ހިލާފު ވެގެން ޖޫރިމަނާ ކުރުމަށް ފަހު ތިން ވަނަ ފަހަރު ވެހިކަލް ޓޯ ކުރަން ގާނޫނުގައި ބުނާ ކަމަށް އޭނާ ވިދާޅުވި އެވެ.

"އަޅުގަނޑުމެން މި ދަނީ އެކަން ބަދަލު ކުރުމަށް މަސައްކަތް ކުރަމުން. މިވަގުތަށް މި ފޮނުވަނީ ދުއްވި ސްޕީޑްގެ ލިމިޓު ވެސް އެނގޭ ގޮތަށް ވެރިފަރާތަށް މެސެޖެއް." އޭނާ ވިދާޅުވި އެވެ.

އޭނާ ވިދާޅުވި ގޮތުގައި މިވަގުތު މެސެޖުތައް ފޮނުވަމުން އަންނަނީ މެނުއަލް ކޮށެވެ. ނަމަވެސް ބްރިޖުގައި ގާއިމް ކޮށްފައި ހުރި ކެމެރާ ސިސްޓަމްތަކުން އަމިއްލަ އަށް ޑިޓެކްޓު ކޮށްގެން މެސެޖު ފޮނުވޭނެ ކަމަށް އޭނާ ވިދާޅުވި އެވެ.

މާލޭގައި ފަހަކަށް އައިސް އެކްސިޑެންޓުތައް ގިނަވުމާ ގުޅިގެން ފުލުހުން ވަނީ ޓްރެފިކް ފުލުހުން އަބަދުވެސް މަގުތަކަށް ނުކުމެ އުޅޭ ގޮތަށް އޮޕަރޭޝަނަށް ބޮޑެތި ބަދަލުތަކެއް ގެނެސްފަ އެވެ. އެގޮތުން ބްރިޖުގެ ސްޕީޑް ކެމެރާތައް މޮނިޓާ ކުރުމާއި ހައިވޭ އާއި މާލެ އަދި ހުޅުމާލޭގައި ސްޕީޑް ގަން ބަހައްޓައިގެން ވެސް ފުލުހުން ހަރަކާތްތެރިވާނެ އެވެ.

މީގެ އިތުރުން ކުރިޔަށް އޮތް ތަނުގައި ބާރު ބޮޑުވާ ގަޑިތަކުގައި ކޮންމެ ފަސް މިނެޓުން ފުލުހަކާ ދިމާވާ ގޮތަށް އޮޕަރޭޝަން ފުޅާ ކުރަން ވެސް ފުލުހުން ވަނީ ނިންމައިފަ އެވެ.