ދެކުނު ކޮރެއާގައި 16 އަހަރު ކުރިން މަރާލައި ސިމެންތި އަޅައި ފޮރުވާފައި އޮތް އަންހެނެއް ފެނިއްޖެ

ދެކުނު ކޮރެއާގައި މީގެ 16 އަހަރު ކުރިން އަންހެނަކު މަރާލައި ގޭގެ ބެލްކަނީގައި ސިމެންތި އަޅައި ފޮރުވާފައި އޮއްވައި ފެނިގެން އޭނާގެ އޭރުގެ ލޯބިވެރިޔާ ހައްޔަރުކޮށްފި އެވެ.

ފުލުހުން އޭއެފްޕީއަށް ބުނި ގޮތުގައި މިހާރު އުމުރުން 50 އަހަރުގެ މީހާ ވަނީ އޮކްޓޫބަރު 2008 ގައި، ލޯބިވެރިޔާއާ ދެމެދު ހިނގި ދެބަސްވުމެއްގެ ތެރޭ އޭނާ މަރާލައި ހަށިގަނޑު ފޮއްޓަކަށް ލުމަށް ފަހު އޭގެ މައްޗަށް ސިމެންތި އަޅައި ފޮރުވި ކަމަށް އެއްބަސްވެފަ އެވެ.

އެ މީހާ ވަނީ ހަށިގަނޑު ލާފައިވާ ފޮށި ނުފެންނަ ގޮތަށް ރާނައި އަދި އޭގެ މައްޗަށް 10 ސެންޓިމީޓަރު ބޯމިނުގައި ސިމެންތި އަޅައިފަ އެވެ.

މަރާލި އަންހެން މީހާ އަކީ އާއިލާއާ ގުޅުން އޮންނަ މީހަކަށް ނުވާތީ އެ މީހާ ގެއްލުނުކަން ވެސް ފުލުހުންނަށް ރިޕޯޓްކޮށްފައިވަނީ ތިން އަހަރު ފަހުންނެވެ.

އަންހެން މީހާ ގެއްލިގެން 2011 ވަނަ އަހަރު ރިޕޯޓްކުރި ނަމަވެސް އޭނާގެ އޭރުގެ ލޯބިވެރިޔާ ވަނީ އެ ދެ މީހުންގެ ގުޅުން ނިމުމަކަށް އައިތާ އެތައް ދުވަހެއް ވެފައިވާ ކަމަށް ބުނެފަ އެވެ. އެހެންވެ ފުލުހުންނަށް މިހާތަނަށް ވެސް އޮތީ މިކަމުގައި ހެއްކެއް ލިބޭ ގޮތް ނުވެފަ އެވެ.

ފުލުހުންގެ އޮފިޝަލަކު ނޫސްވެރިންނަށް ވިދާޅުވީ މީގެ ކުރިން އެ އަންހެން މީހާގެ ހަށިގަނޑު ނުފެނި ވަނީ ބެލްކަނީގެ ކުޑަ ޖާގައަށް ފޮށި ފައްތާފައި ހުރުމުން ކަމަށެވެ. އަދި އެ ތަނުގެ ކޮޓަރިތައް 2016 ވަނަ އަހަރުން ފެށިގެން ހުންނަނީ ހުސްކޮށް ކަމަށް ވެސް ތަނުގެ ވެރިޔާއާ ހަވާލާދީ ފުލުހުން ބުންޏެވެ.

ހަށިގަނޑު ފެނުނީ ފެން ލީކުވާތީ އެކަން ރަނގަޅުކުރަން އުޅުނު މީހަކަށް މިދިޔަ ހަފްތާގަ އެވެ. ސިމެންތީގެ ތެރޭގައި ހަށިގަނޑު އޮތުމުން ހަންގަނޑު އެއްކޮށް ހަލާކު ނުވެ އޮތުމުން ފިންގަޕްރިންޓް ބޭނުންކޮށްގެން ވަނީ އެއީ ކާކުކަން ދެނެގަނެވިފަ އެވެ.

އެއީ ގެއްލިގެން ރިޕޯޓްކޮށްފައިވާ މީހާކަން އެނގުމާ އެކު އޭރު އޭނާގެ އޭރުގެ ލޯބިވެރިޔާ ހައްޔަރުކޮށް ސުވާލުކުރުމުން ވަނީ އެކަން ކުރި ކަމަށް އެއްބަސްވެފައި ކަމަށް ފުލުހުން ބުންޏެވެ. -- އޭއެފްޕީ