ރައީސް، ޔޫރަޕިއަން ކޮމިޝަންގެ ރައީސާ ބައްދަލުކުރައްވައިފި

ރައީސް ޑރ. މުހައްމަދު މުއިއްޒު، ޔޫރަޕިއަން ކޮމިޝަންގެ ރައީސާ އުރުސުލާ ވޮން ޑަ ލަޔަންއާ އިއްޔެ ބައްދަލުކުރައްވައިފި އެވެ.

އެ ބައްދަލުކުރެއްވުން އޮތީ މިހާރު އެމެރިކާގެ ނިއު ޔޯކުގައި ކުރިއަށް ގެންދާ އދ. ގެ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގަ އެވެ.

ރައީސް އޮފީހުން ބުނީ، އެ ބައްދަލުކުރެއްވުމުގައި ދެ ލީޑަރުން ވެސް، ޔޫރަޕިއަން ޔޫނިއަން އާއި ރާއްޖެއާ ދެމެދު އޮތް ބަދަހި އަދި ހަރުދަނާ ގުޅުމަށް ތައުރީފުކުރައްވައި، ދެފަރާތުގެ ދެމެދުގައި އޮތް ސިޔާސީ ގުޅުން އިތުރަށް ބަދަހިކުރެއްވުމަށް ބޭނުންފުޅުވާކަން ހާމަކުރެއްވި ކަމަށެވެ.

އެ ބައްދަލުކުރެއްވުމުގައި ރައީސް މުއިއްޒު ވަނީ ދިވެހި ސަރުކާރުގެ ތަރައްގީގެ އެޖެންޑާ ހުށަހަޅުއްވައި، ރާއްޖޭގެ ތަރައްގީއަށް އިތުރު އެހީތެރިކަން ބޭނުންވާ މުހިންމު ދާއިރާތައް ފާހަގަކުރައްވައިފަ އެވެ.

ރާއްޖެއިން ޔޫރަޕަށް އެކްސްޕޯޓްކުރާ ކަނޑުމަހަށް ކަނޑައަޅާފައިވާ 24 ޕަސެންޓުގެ ޓެރިފްގެ ސަބަބުން ރާއްޖެއިން އީޔޫ މާކެޓަށް ވާދަވެރިކަމާ އެކު، މަހުގެ އުފެއްދުންތައް ނެރުމަށް ހުރި ގޮންޖެހުންތައް ވެސް ރައީސް ހިއްސާކުރެއްވި އެވެ. މޫސުމަށް އަންނަ ބަދަލުތަކުން ލިބޭ ގެއްލުންތައް ކުޑަކުރުމަށް ރާއްޖެއިން ކުރާ މަސައްކަތްތައް ވެސް ރައީސް ހިއްސާކުރެއްވި އެވެ.

ޔޫރަޕިއަން ކޮމިޝަންގެ ރައީސާގެ ވާހަކައިގައި، އެ ކޮމިޝަންގެ ފުރިހަމަ އެއްބާރުލުން ރާއްޖެއަށް ލިބޭނެ ކަމުގެ ޔަގީންކަން ދެއްވި ކަމަށް ރައީސް އޮފީހުން ބުންޏެވެ.

ރައީސް އޮފީހުން ބުނީ މޫސުމަށް އަންނަ ބަދަލުތަކާ ގުޅޭ ގޮތުން ރާއްޖެއިން އިސްނަގައިގެން ކުރަމުން އަންނަ މަސައްކަތްތަކަށާއި ސިޔާސަތުތަކަށް ވެސް އޭނާ ތައުރީފުކުރެއްވި ކަމަށެވެ.

ރައީސް އެމެރިކާއަށް ކުރައްވާ ފުރަތަމަ ރަސްމީ ދަތުރުފުޅުގައި އެކި ގައުމުތަކާއި ބައިނަލްއަގުވާމީ ޖަމިއްޔާތަކުގެ އިސްވެރިންނާ އަންނަނީ ބައްދަލުކުރައްވަމުންނެވެ.