ޔުނައިޓެޑުގެ އާ ސްޓޭޑިއަމުން އިނގިރޭސި އިގުތިސާދަށް ނުވަ ބިލިއަން ޑޮލަރު ވަންނާނެ

މެންޗެސްޓާ (ސެޕްޓެމްބަރު 24) – މެންޗެސްޓާ ޔުނައިޓެޑުން އަލަށް ބިނާ ކުރާ ސްޓޭޑިއަމުން އިނގިރޭސި ވިލާތުގެ އިގުތިސާދަށް 9.7 ބިލިއަން ޑޮލަރު ލިބޭނެ ކަމަށް ދިރާސާއަކުން ދައްކައިފި އެވެ.

އޯލްޑް ޓްރެފޯޑްގެ ބަދަލުގައި އެ ސަރަހައްދުގައި މުޅިން އާ ސްޓޭޑިއަމެއް ބިނާކުރުމަކީ ޔުނައިޓެޑްގެ ކޯ އޯނަރު ޖިމް ރެޓްކްލިފްގެ ވިސްނުމެކެވެ. އެކަމަކު މުޅިން އާ ސްޓޭޑިއަމެއް ހަދަން ޔުނައިޓެޑްގެ އެހެން ވެރިން އެހާ ބޮޑަށް ތާއީދެއް ނުކުރެ އެވެ. އެ ހިއްސާދާރުން ތާއީދު ކުރަނީ އޯލްޑް ޓްރެފޯޑް މަރާމާތު ކުރުމަށެވެ. ނަމަވެސް ޔުނައިޓެޑްގެ ފުޓްބޯޅައިގެ ހައިރާކީގައި މިހާރު އެންމެ ބާރުގަދަ މަގާމުގައި ހުރި ރެޓްކްލިފް އެގޮތަށް ވިސްނުން ގެންގުޅޭތީ ޔުނައިޓެޑުން ނިންމީ ފީޒިބިލިޓީ ދިރާސާއެއް ހެދުމަށެވެ.

އެ ދިރާސާ މިހާރު ވަނީ ނިންމައި ޔުނައިޓެޑްގެ ވެރިންނާ ވެސް ހިއްސާކޮށްފަ އެވެ. އަދި ގްރޭޓާ މެންޗެސްޓާގެ މޭރަރު އެންޑީ ބާންހަމްއާ ވެސް އެ ރިޕޯޓް ހިއްސާކޮށްފައިވެ އެވެ.

ބާންހަމް ވިދާޅުވީ ޔުނައިޓެޑްގެ އާ ސްޓޭޑިއަމް ބިނާކުރަން ރައްޔިތުންގެ ފައިސާއިން އެއް ވެސް ވަރެއް ހަރަދު ކުރަން ނުޖެހޭނެ ކަމަށެވެ.

އެކަމަކު ރެޓްކްލިފް ބޭނުންވާ ގޮތަށް ދެ ބިލިއަން ޑޮލަރު ހަރަދުކޮށްގެން އާ ސްޓޭޑިއަމެއް ހަދާނީތޯ އަދި ނުނިންމަ އެވެ. އާ ސްޓޭޑިއަމެއް ހަދާނަމަ ޔުނައިޓެޑްގެ ވިސްނުމަކީ 100،000 ސަޕޯޓަރުންގެ ޖާގައިގެ އާ ސްޓޭޑިއަމެއް ހެދުމެވެ. އެ ޕްރޮޖެކްޓަށް ޔުނައިޓެޑްގެ ފައިސާއިން ދެ ބިލިއަން ޑޮލަރު ހޭދަކުރާނެ އެވެ.

އިގުތިސާދީ ކަންކަމުގައި ދިރާސާކޮށް ލަފާދޭ ކުންފުންޏެއް ކަމަށްވާ އޮކްސްފޯޑް އިކޮނޮމިކްސްއިން ބުނީ ޔުނައިޓެޑުން މުޅިން އާ ސްޓޭޑިއަމެއް ބިނާކުރާނަމަ 92،000 ވަޒީފާ އުފެދޭނެ ކަމަށެވެ. އަދި އެ ސަރަހައްދަށް 17،000 ގެދޮރު ލިބޭނެ ކަމަށް ވެސް އޮކްސްފޯޑް އިކޮނޮމިކްސްއިން ބުންޏެވެ.

"މި ވެދާނެ މި ގައުމުގައި މިހާތަނަށް އަހަންނަށް ފެނުނު އާބާދުކުރުމުގެ އެންމެ ބޮޑު ސްކީމަށް. އުއްމީދަކީ މިއީ ދުނިޔޭގައި ހުރި އެންމެ ފެންވަރު ރަނގަޅު ފުޓްބޯޅަ ސްޓޭޑިއަމަށް ހެދުން. އޭގެ ސަބަބުން ވަށައިގެން ދިރިއުޅޭ މީހުންނަށް އޭގެ ފައިދާ ތަކެއް ލިބިގެންދާނެ ކަމަށް އުއްމީދު ކުރެވޭ،" ބާންހަމް ވިދާޅުވި އެވެ.

މިދިޔަ ހަފުތާގައި ޔުނައިޓެޑުން ވަނީ އެ މަސައްކަތުގެ ޕްލޭން އެކުލަވާލުމަށް އިންޖިނިއަރިން ދާއިރާގެ ކުންފުނި ފޮސްޓާ ޕްލަސް ޕާޓްނާސްއާ ހަވާލުކޮށްފަ އެވެ. ކްލަބްގެ ސްޕޯޓަރުންގެ ހިޔާލު ވެސް ހޯދަން ޔުނައިޓެޑުން ވަނީ ނިންމައިފަ އެވެ. އެ މަސައްކަތުގައި އެ ކްލަބްގެ ކުރީގެ ކެޕްޓަން ގެރީ ނެވީލް ވެސް ބައިވެރިވެ އެވެ.