އާ ފުޓްބޯޅަ ސްޓޭޑިއަމް ހުޅުމާލޭގައި އަޅަން ސަރުކާރުން ނިންމައިފި

ގަލޮޅު ދަނޑު ތަޅާލައި، އެ ތަން ހުރި ބިމުގައި އިންޑިއާގެ އެހީގައި އާ ސްޓޭޑިއަމެއް އަޅަން ކުރީ ސަރުކާރުން ރާވާފައި އޮތް ނަމަވެސް މި ސަރުކާރުން މިހާރު ނިންމާފައި އޮތީ އާ ސްޓޭޑިއަމް ހުޅުމާލޭގައި އަޅަން ކަމަށް ސްޕޯޓްސް މިނިސްޓަރުު އަބްދުﷲ ރާފިއު ވިދާޅުވެއްޖެ އެވެ.

ޒަމާނުއްސުރެ ރާއްޖޭގައި ގައުމީ ފެންވަރުގެ ފުޓްބޯޅަ މެޗުތައް ބާއްވަމުން އަންނަ ގަލޮޅު ދަނޑު ވަނީ ވަރަށް ބޮޑަށް ބާވެ، ވީރާނާވެފަ އެވެ. އެހެންކަމުން މި ޒަމާނަށް ފެތޭ އާ ސްޓޭޑިއަމެއް އަޅަން އިންޑިއާ އިން އެހީ ލިބިފައިވާ ކަމަށް ބުނެ، އާ ސްޓޭޑިއަމުގެ ކުރެހުންތައް ކުރީ ސަރުކާރުގެ ސްޕޯޓްސް މިނިސްޓަރު އަހުމަދު މަހުލޫފު އޭރު ހިއްސާކުރެއްވި އެވެ.

އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިހާރުގެ މިނިސްޓަރު ރާފިއު ވިދާޅުވީ ގަލޮޅު ދަނޑު އެ ހުރި ސަރަހައްދަކީ އާ ސްޓޭޑިއަމެއް އަޅަން އެންމެ އެކަށީގެންވާ ތަނެއް ނޫން ކަމަށާއި، ސެކިއުރިޓީ ކަންކަމާއި، ޕާކިން އަށް ބެލި ނަމަވެސް އެ ސަރަހައްދު އެކަމަށް އެކަށީގެންނުވާ ކަމަށެވެ.

"އެހެންވެ މިހާރު ނިންމާފައި އޮތީ ހުޅުމާލޭ ފޭސް ވަންގައި އާ ސްޓޭޑިއަމް އަޅަން،" ރާފިއު ވިދާޅުވި އެވެެ.

އާ ސްޓޭޑިއަމް ގަލޮޅު ދަނޑު މިހާރު ހުރި ބިމުގައި އަޅަން އޭރު މަހުލޫފު ނިންމެވުމުން ވަރަށް ގިނަ މީހުން ވަނީ އެއީ އެންމެ އެކަށީގެންވާ ތަން ނޫން ކަމަށް ބުނެ ފާޑު ވެސް ކިޔައިފަ އެވެ.

އާ ސްޓޭޑިއަމުގައި އެތުލެޓިކްސް ޓްރެކެއް ވެސް ވެސް އޮންނާނެ ކަމަށް އިޝާރާތްކުރައްވައި ރާފިއު ވިދާޅުވީ އަލަށް އިމާރާތްކުރަނީ މަލްޓި ސްޕޯޓްސް އިންޑޯ ކޮމްޕްލެކްސް އެއް ކަމަށެވެ. އަދި އެ ސްޓޭޑިއަމް ޕްރޮޖެކްޓުގައި ހިމެނިގެން ރާއްޖޭގެ އެކި ހިސާބުތަކުގައި އަޅަން ރާވާފައިވާ ސިންތެޓިކް ޓްރެކްތަކާއި، ވޮލީބޯޅަ، ބާސްކެޓްބޯޅަ، އަދި ޓޭބަލް ޓެނިސް ހޯލުތަކުގެ މަސައްކަތް ވެސް ވަރަށް އަވަހަށް ފަށާނެ ކަމަށް މިނިސްޓަރު ވިދާޅުވި އެވެ.

"ކުރިން އޮތީ އެ ހުރިހާ ކަމެއް އެއް ޕްރޮޖެކްޓެއްގެ ގޮތުގައި. މާނައަކީ ދަނޑު ނޭޅެންޏާ ސިންތެޓިކް ޓްރެކް ނެހެދޭނެ. އެކަމަކު މިހާރު ވަކިން ގެންދެވޭ ގޮތަށް ހުށަހަޅައިގެން އެގޮތަށް ހަމަޖެހިފައި އޮތީ،" ރާފިއު ވިދާޅުވި އެވެ.

އާ ސްޓޭޑިއަމެއް ހުޅުމާލޭގައި އެޅި ނަމަވެސް ގަލޮޅު ދަނޑު ތަޅާލުމުގެ ވިސްނުމެއް ނެތެވެ. މަރާމާތުކޮށްގެން އެތަން ވެސް ބޭނުންކުރަން އޮތީ ރާވައިފަ އެެވެ. މިނިސްޓަރު ވިދާޅުވީ ގަލޮޅު ދަނޑު މަރާމާތުކުރާނީ އާ ސްޓޭޑިއަމް އެޅުމަށް ފަހު ކަމަށާއި، ސަބަބަކީ، އާ ސްޓޭޑިއަމް ބިނާކުރަން ހޭދަކުރާ މުއްދަތުގައި ގަލޮޅު ދަނޑު ބޭނުންކުރަން ޖެހޭނެތީވެ ކަމަށެވެ.

ނަމަވެސް ދާދި ފަހުން އެމްއެންޑީއެފް އާއި، އެސްޓީއޯ އާއި، އެމްޕީއެލްގެ އެހީތެރިކަމާ އެކު ދަނޑުގެ ލައިޓިން ސިސްޓަމް މަރާމާތުކޮށް ރޭގަނޑު ވެސް މެޗުތައް ބޭއްވޭ ގޮތަށް ވަނީ މިނިސްޓްރީން ވަނީ ހަމަޖައްސައިދީފަ އެވެެ.

ރަސްމީ ދަނޑުގެ ގޮތުގައި ގަލޮޅު ދަނޑު ބޭނުންކުރަމުން އަންނަނީ 1960ގެ އަހަރުތަކުން ފެށިގެންނެވެ. އެތަނުގައި ސިޑިބަރި ގާއިމްކުރަން ފެށީ 1980ގެ އަހަރުތަކުގަ އެވެ. އޭގެ ފަހުން ބޮޑެތި މުބާރާތްތަކަށް މަރާމާތުކޮށް އެކި ބަދަލުތައް ގެނެސްފައިވެ އެވެ. އެކަމަކު އެތަން މިހާރު ވަނީ ވަރަށް ބޮޑަށް ބާވެފަ އެވެ. ޒަމާނީ ވަސީލަތްތަކެއް ވެސް ނެތެވެ. އަދި ތަނބުތައް ހުރުމުން ކުޅިބަލާ މީހުންނަށް ދަނޑުގެ ވިއު އިން ބައެއް ގެއްލެ އެވެ.