ގަލޮޅު ދަނޑުގެ ލައިޓްތަކުގެ މައްސަލަ ޖެހޭތީ މެޗުތައް ހަވީރަށް

ގަލޮޅު ދަނޑުގެ ލައިޓިން ސިސްޓަމަށް ދިމާވެފައިވާ މައްސަލައަށް ހައްލެއް ނުލިބޭތީ، ދިވެހި ޕްރިމިއާ ލީގުގެ ބާކީ ދެ މެޗު ކުޅޭ ވަގުތު ހަވީރަށް ބަދަލު ކޮށްފި އެވެ.

ލީގުގައި ބާކީ އޮތް ދެ މެޗަކީ، މާދަމާ ރެއަށާއި އަންނަ ހަފްތާގެ އަންގާރަ ދުވަހުގެ ރޭ ކުޅުމަށް ތާވަލް ކޮށްފައި ހުރި މެޗުތަކެވެ. ނަމަވެސް ރޭގަނޑު 9 ޖަހާއިރު ފަށަން އޮތް މި ދެ މެޗު ވެސް ހަވީރު 3:50 ގައި ފަށާގޮތަށް ހަމަޖެއްސިކަން އެފްއޭއެމުން ވަނީ ހާމަ ކޮށްފަ އެވެ.

"ދިވެހި ޕްރިމިއާ ލީގު 2023 ގައި ބާކީ އޮތް ދެ މެޗު ފަށާ ގަޑިއަށް ވަނީ ބަދަލު ގެނެވިފައި، އެއީ ގަލޮޅު ދަނޑުގެ ލައިޓް ސިސްޓަމަށް ދިމާވެފައިވާ މައްސަލައާ ގުޅިގެން،" އެފްއޭއެމްގެ އެކްސްކޯ އަށް ދާދި ފަހުން އައްޔަނުކުރި އަބްދުﷲ ޝިބާއު (ޝިބާ)، އެފްއޭއެމްގެ މީޑިއާ ގުރޫޕުގައި ހާމަ ކުރެއްވި އެވެ.

ލީގުގައި ބާކީ އޮތް މެޗުތައް:

• 15 ޑިސެމްބަރު، 15:50 : މާޒިޔާ - ޓީސީ ސްޕޯޓްސް

• 19 ޑިސެމްބަރު، 15:50 : މާޒިޔާ - އީގަލްސް

ގަލޮޅު ދަނޑުގެ ލައިޓްތަކަށް ދިމާވެފައިވާ މައްސަލައަށް ހައްލެއް ނުލިބި ގިނަ ދުވަސްތަކެއް ވެފައި ވާއިރު، މި ސީޒަންގެ ލީގުގައި އެކަން ވަނީ ތަޖުރިބާ ކުރަން ޖެހިފަ އެވެ.

އެގޮތުން އެންމެ ފަހުން ލީގުގައި މެޗެއް ކުޅުނީ މިދިޔަ ހަފްތާ އެވެ. މާޒިޔާ އާއި ބުރު ސްޕޯޓްސް ރޭގަނޑު ކުޅުނު އެ މެޗުގެ ދެވަނަ ހާފު ފެށި ތަނާހެން ދަނޑުގެ ހުރިިހާ ލައިޓެއް ނިވިގެން ކުޅލުން މެދުކަނޑާލަން ޖެހުނެވެ. އަދި މައްސަލައަށް ވަގުތީ ހައްލެއް ހޯދައި، މެޗު ކުރިއަށް ގެންދެވޭވަރުވީ 32 މިނިޓަށް ފަހު އެވެ.