ބިދޭސީން ހިންގާ ތަންތަން ހޯދަން ކައުންސިލް ނުކުމެއްޖެ

ބިދޭސީން ގަވައިދާ ހިލާފަށް ހިންގާ ތަންތަން ހުއްޓުވަން މާލޭ ސިޓީ ކައުންސިލުން ވެސް ނުކުމެއްޖެ

29 އޯގަސްޓް 2024

މާލޭގައި ބިދޭސީން ގަވާއިދާ ހިލާފަށް ހިންގާ ތަންތަން ހުއްޓުވަން މާލޭ ސިޓީ ކައުންސިލުން ވެސް ނުކުމެއްޖެ އެވެ.

އިފްރާޒް އަލީ

މާލޭ ސިޓީ ކައުންސިލްގެ ކޮމިއުނިޓީ އެންގޭޖުމަންޓް އޮފިސަރުން އިއްޔެ ވަނީ މާލޭގައި ބިދޭސީން ގަވާއިދާ ހިލާފަށް ހިންގާ ބައެއް ތަންތަން ހޯދައިފަ އެވެ. އަދި އެ ތަންތަނުގެ މައްސަލަ މޯލްޑިވްސް އިމިގްރޭޝަނަށް ސިޓީ ކައުންސިލުން ވަނީ ރިޕޯޓްކޮށްފަ އެވެ.

މއ.އަންނާރުގޭގައި ޤަވާއިދާ ހިލާފަށް ހުއްދަ ނެތި ކާބޯތަކެތި ވިއްކަމުން ދާ ބައެއް . މި ތަން މިހާރު ވަނީ @ImmigrationMV އަށް ރިޕޯޓް ކުރެވިފައި pic.twitter.com/KzMxwHq2sE
— Malé City Council (@MaleCitymv) August 28, 2024

ސިޓީ ކައުންސިލުން އެކްސްގައި ކޮށްފައިވާ ޕޯސްޓުތަކަށް ބަލާއިރު، މއ. އަންނާރުގޭގައި ބިދޭސީން ގަވާއިދާ ހިލާފަށް، ހުއްދަ ނެތި ކާބޯތަކެތި ވިއްކަމުން ދާ ތަނެއް ވަނީ ހޯދައިފަ އެވެ.

ހުރަވީ ގޯޅިތެރޭގައި ގަވާއިދާ ހިލާފަށް ގެސްޓް ހައުސް ވިޔަފާރި ކުރަމުންދާ ތަނެއް ވެސް ސިޓީ ކައުންސިލުން ވަނީ ހޯދައިފަ އެވެ. އެތަނުގައި ސިގިރޭޓާއި އެނާޖީ ޑްރިންކްސް ވިއްކާ ކަމަށް ވެސް ސިޓީ ކައުންސިލުން ބުންޏެވެ.

ހުރަވީ ގޯޅިތެރޭ ޤަވާއިދާ ހިލާފަށް ގެސްޓް ހައުސް ވިޔަފާރި ކުރަމުންދާތީ ޗެކުކުރުން, މިތަނުގައި ސިގިރޭޓް އަދި އެނާރޖީ ޑްރިންކް ވިއްކަމުންދާކަން ވަނީ ފާހަގަ ކުރެވިފައި . މި މައްސަލަ ވަނީ @ImmigrationMV އަށް ރިޕޯޓް ކުރެވިފައި pic.twitter.com/ebn4HDXelr
— Malé City Council (@MaleCitymv) August 28, 2024

ރައްޔިތުންގެ މަޖިލީހުގެ ބިއްދޮށުގައި އޮންނަ ސިއްކަ ގޯޅީގައި ހުރި ގެއެއްގައި ބަދިގެއެއް ހަދައިގެން ހުއްދަ ނެތި, ގަވާއިދަށް ހިލާފަށް ކާބޯތަކެތި ތައްޔާރުކުރާ ބިދޭސީންތަކެއް ވެސް ވަނީ ހޯދައިފަ އެވެ. ސިޓީ ކައުންސިލުން ބުނި ގޮތުގައި، އެތަނުގައި ތައްޔާރުކުރާ ތަކެތި ވިއްކަން ގެންދަނީ ސޯސަން މަގުގައި ހުންނަ ނެޗުރަލް ކެފޭއަށެވެ.

ގަވާއިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަންގެ 200 އަށް ވުރެ ގިނަ އޮފިސަރުންނާ އެކު އިއްޔެ މާލޭގައި ބޮޑު އޮޕަރޭޝަނެއް ވެސް ފެށި އެވެ. އެ އޮޕަރޭޝަންގެ ތެރެއިން ވެސް ގިނަ ބަޔަކު ހުއްޓުވި އެވެ.

މެދުޒިޔާރަތްމަގު,މަޖިލިސް ކައިރި ގޯޅިގަނޑުގެ އެތެރެބައިގެ ހުރި ގޭގެ ބަދިގެ ހަދައިގެން ނެޗުރަލް ކެފޭ އަށް ކާބޯތަކެތި ތައްޔާރުކުރުމުގއ ހުއްދަ ނެތި, ޤަވާއިދަށް ނުފެތޭ ގޮތައް ކާއެއްޗެހި ތައްޔާރުކުރަމުން ދާ ތަނެއް. މި ތަން ވަނީ @ImmigrationMV އަށް ރިޕޯޓް ކުރެވިފައި . pic.twitter.com/l8U4wma1qc
— Malé City Council (@MaleCitymv) August 28, 2024

މި ސަރުކާރު ވެރިކަމަށް އައި ފަހުން މިދިޔަ ނުވަ މަސްދުވަހުގެ ތެރޭގައި އެންމެ ބޮޑު އިސްކަން ދިން އެއް ކަމަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީން އަތުލައިގަތުމެވެ. މިދިޔަ އަހަރުގެ ނޮވެމްބަރު 17 އިން މިދިޔަ އާދިއްތަ ދުވަހާ ހަމައަށް 3،000 އަށް ވުރެ ގިނަ ބިދޭސީން ޑީޕޯޓްކޮށް އަދި 200 އަށް ވުރެ ގިނަ ތަންތަން އިމިގްރޭޝަނުން ވަނީ ރެއިޑްކޮށްފަ އެވެ.

Comments