މި މަޖިލީހުން ރައްޔިތުންގެ ހައްގު ކަށަވަރު ނުކުރާނެކަން ޔަގީންވެއްޖެ: އެމްޑީޕީ

ސަރުކާރު ހިންގާ ޕީއެންސީއަށް ސުޕަ މެޖޯރިޓީ އޮތް މިހާރުގެ ރައްޔިތުންގެ މަޖިލީހުން ރައްޔިތުންގެ ހައްގުތައް ކަށަވަރު ނުކޮށްދޭނެ ކަން މިއަދު ޔަގީންވެފައިވާ ކަމަށް އިދިކޮޅު އެމްޑީޕީން ބުނެފި އެވެ.

މިދިޔަ ސަރުކާރުން މާލޭގެ ރައްޔިތުންނަށް ދޫކުރި ފްލެޓާއި ގޯތި މައްސަލާގައި ހައުސިން މިނިސްޓަރު ޑރ. އަލީ ހައިދަރު މަޖިލީހަށް ހާޒިރުކޮށް، ކުރި ސުވާލުތަކަށް ދެއްވި ޖަވާބާ މެދު ހިތްހަމަނުޖެހިގެން އެމްޑީޕީގެ މެމްބަރުން ވަނީ އިހްތިޖާޖްކޮށްފަ އެވެ.

މި އިހްތިޖާޖާ ހެދި ޖަލްސާ ކުރިއަށް ގެންދަން ހުރަސްއެޅުމުން މަޖިލީހުގެ ރައީސް ވަނީ އެމްޑީޕީގެ ހަތަރު މެމްބަރެއްގެ ނަން އިއްވައިފަ އެވެ. އެކަމަކު ތަޅުމުން ނުނިކުންނަވައި، ކުރެއްވި އިހްތިޖާޖާ ގުޅިގެން މިއަދުގެ ޖަލްސާ މެދުކަނޑާލަން ވެސް ޖެހުނެވެ.

އޭގެ ތެރޭގައި އެމްޑީޕީގެ ޕީޖީ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވެސް ހިމެނިވަޑައިގަންނަވަ އެވެ.

އެމްޑީޕީގެ ޕީޖީ ގުރޫޕުން ބޭއްވި ނޫސްވެރިންގެ ބައްދަލުވުމުގައި ނާޒިލް ވިދާޅުވީ މަޖިލިސް މެންބަރުންގެ ޒިންމާއަކީ އަދި އެމްޑީޕީގެ މަޖިލިސް މެންބަރުން މަސައްކަތް ކުރަނީ ވެސް ރައްޔިތުންގެ ހައްގުތައް ރައްކާތެރިކޮށް، ސަރުކާރު ޖަވާބުދާރީކުރުވަން ކަމަށެވެ. ނަމަވެސް އެ މަސައްކަތް ކުރަން ސަރުކާރުން، އެމްޑީޕީގެ މެމްބަރުންނަށް ހުރަސްއަޅަމުންދާ ކަމަށް ނާޒިލް ވިދާޅުވި އެވެ.

"މިއަދު މަޖިލީހުގެ ރިޔާސަތުން އަމަލު ކުރި ގޮތުން އެބަ ސާފުވޭ މި މަޖިލީހުގެ ސުޕަ މެޖޯރިޓީއާ އެކު ޕީއެންސީ މެންބަރުންނާއި މަޖިލީހުގެ ބާރުވެރިކަމާ އެކު ރައްޔިތުންގެ ހައްގުތައް ކަށަވަރުކޮށް ނުދޭނެކަން ވަރަށް ސާފުކޮށް އެބަ އެނގޭ،" ނާޒިލް ވިދާޅުވި އެވެ.

އޭނާ ވިދާޅުވީ، މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ހައިދަރު ވިދާޅުވަމުން ގެންދެވީ ކަނޑުން ދޫކޮށްފައިވާ ގޯތިތަކެއް ހުރި ކަމުގެ ވާހަކަ ކަމަށާއި އެގޮތަށް ދޫކޮށްފައިވާ ގޯއްޗެއް ނޯންނާނެ ކަމަށެވެ.

ކުރީ ސަރުކާރުން ގޯތި ދޫކުރި ބައެއް ސަރަހައްދުތަކަކީ ވަރަށް ތިލަ ފަޅެއް ކަމަށާއި އެ ބިންތައް ހިއްކުމުގެ މަސައްކަތް އޭރު ސަރުކާރުން ބާރު ސްޕީޑްގައި ކުރަމުންދިޔަ ކަމަށް ނާޒިލް ވިދާޅުވި އެވެ.

ނާޒިލް ވިދާޅުވި ގޮތުގައި އެ މަސައްކަތް ހުއްޓާލައި ފުށިދިއްގަރުފަޅަށް މުޅި ފޯކަސް މި ސަރުކާރުން ވަނީ ބަދަލުކޮށްފަ އެވެ. މާލޭގެ ރައްޔިތުންނަށް ދޫކުރި ގޯތިތައް ދިނުން މަޑުޖެހިފައިވާ ކަމަށާއި އެ ގޯތިތައް ދޫކުރެވޭނެ ތާރީހެއް ނޭނގޭ ކަމަށް މިނިސްޓަރު ވިދާޅުވުމަކީ އެމްޑީޕީން އިންތިހާއަށް ކަންބޮޑުވާ ކަމެއް ކަމަށް ނާޒިލް ވިދާޅުވި އެވެ.

މަޖިލީހުގެ މިއަދުގެ ޖަލްސާގައި މެމްބަރުންގެ ސުވާލުތަކަށް ޖަވާބު ދެއްވަމުން ވެސް މިނިސްޓަރު ހައިދަރު ކަންބޮޑުވުން ފާޅުކުރެއްވީ ކުރީގެ ސަރުކާރުން ބިންތައް ރައްޔިތުންނަށް ދީފައިވާ ގޮތުންނެވެ. އޭނާ ވިދާޅުވި ގޮތުގައި، ހުޅުމާލެ 2 އިން ވެސް ބިންތައް ދޫކޮށްފައި ވަނީ މަގުތަކަށް އަރާ ގޮތަށާއި އެކި ކުންފުނިތަކުން ސާމާނުތައް ބަހައްޓާފައި ހުރި ތަންތަނުންނެވެ. އަދި ކަނޑުންނާއި ފަޅުން ވެސް ގޯތިތައް ދީފައިވާއިރު، އެ ތަންތަނަށް ގޯތި ނުކިޔޭނެ ކަމަށް ހައިދަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި، ބިންވެރިޔާ ސްކީމުގެ ދަށުން ހުޅުމާލެ 2 އިން ދޫކުރި ހުރިހާ ގޯތިތައް އެ ތަންތަނުގެ ވެރިފަރާތްތަކާ އަންނަ އޮކްޓޫބަރު މަހުގެ ނިޔަލަށް ހަވާލުކޮށް ނިމޭނެ އެވެ.