ފެއާތަކާއި ނައިޓްމާކެޓުތައް ގިނަވެގެން 10 ދުވަހަށް ބޭއްވޭ ގޮތަށް ހަދައިފި

ފެއާތަކާއި ނައިޓްމާކެޓުތަކާއި މަގުމަތީ ބާޒާރުތައް ކުރިއަށް ގެންދެވޭނެ މުއްދަތު އިތުރުކޮށް، ގިނަވަގެން 10 ދުވަހަށް ބޭއްވޭ ގޮތަށް އުސޫލަށް އިސްލާހު ގެނެސްފި އެވެ.

އިކޮނޮމިކް މިނިސްޓްރީން އިއްޔެ ގެޒެޓްކުރި ފެއާ، ނައިޓްމާކެޓް ނުވަތަ މަގުމަތީ ބާޒާރު ހިންގުމުގެ ހުއްދަ ދޫކުރުމުގައި އަމަލުކުރާނެ އުސޫލަށް ގެނައި އިސްލާހުގައިވާ ގޮތުން އެ ހަރަކާތްތައް ބޭއްވުމުގެ ހުއްދަ ދެން ދޫކުރާނީ ގިނަވެގެން 10 ދުވަހުގެ މުއްދަތަކަށެވެ.

ފެއާތަކާއި ނައިޓްމާކެޓުތަކާއި މަގުމަތީ ބާޒާރުތައް ބޭއްވުމަށް މީގެ ކުރިން ހުއްދަ ދެނީ ގިނަވެގެން ހަތް ދުވަހަށެވެ.

ފެއާ، ނައިޓްމާކެޓް ނުވަތަ މަގުމަތީ ބާޒާރު ހިންގުމުގެ ހުއްދަ ދޫކުރުމުގައި އަމަލުކުރާނެ އުސޫލަކީ 2019 ވަނަ އަހަރުން ފެށިގެން އިކޮނޮމިކް މިނިސްޓްރީން އެކުލަވާލައި އަމަލުކުރަމުން އަންނަ އުސޫލެކެވެ.