އައިސީޖޭގެ ލަަފައަކީ ފަލަސްތީނުގެ ރައްޔިތުންނަށް ލިބުނު ބޮޑު ކާމިޔާބީއެއް: ރައީސް

އިޒްރޭލުން ވެރިވެގެންފައިވާ ފަލަސްތީނުގެ ބިންތަކުން އިޒްރޭލުން ފައިބަން ޖެހޭނެ ކަަމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ނެރުނު ލަފައަކީ ފަލަސްތީނުގެ ރައްޔިތުންނަށް ލިބުނު ބޮޑު ކާމިޔާބީއެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އައިސީޖޭން މިއަދު ނެެރުނު ލަފާގައިވަނީ ފަލަސްތީނުގެ ބިންތަކުގައި ވަޒަންވެރިކުރުވުމުގެ ހުރިހާ ހަރަކާތެއް އިޒްރޭލުން މިހާރުން މިހާރަށް ހުއްޓާލައި, ހިފާފައިވާ ބިންތަކުގައި ވަޒަންވެރިކޮށްފައިވާ މީހުން އެ ތަންތަން ދޫކޮށް ދާންޖެހޭނެ ކަމަށެވެ.

އެކަމާ ގުޅިގެން ރައީސް މުއިއްޒު މިރޭ އެކްސްގައި ކުރެއްވި ޕޯސްޓެއްގައިވަނީ އައިސީޖޭގެ އެ ލަފައަށް މަރުހަބާ ކިޔާ ކަމަށެވެ. އަދި އެ ނިންމުމަކީ ފަލަސްތީނުގައި މިނިވަން ދައުލަތެއް އުފެއްދުމަށް އެ ގައުުމުގެ ރައްޔިތުން ކުރާ މަސައްކަތަށް ލިބުނު ކާމިޔާބީއެއް ކަމަށް އެމަނިކުފާނުގެ ޕޯސްޓްގައިވެ އެވެ.

އެހެންކަމުން ފަލަސްތީނުގެ ބިންތަކުން އިޒްރޭލުން ވަގުތުން ފޭބުމަށާއި އަދި އެތަންތަަނަށް ދީފައި ހުރި ގެއްލުންތަކުގެ ބަދަލު ދޭން ވެސް ރައީސް ގޮވާލެއްވި އެވެ.

ރައީސްގެ ޕޯސްޓްގައިވަނީ އިރުމަތީ ގުދުސްއަކީ ފަލަސްތީނުގެ ވެރިރަށުގެ ގޮތުގައި ބަލައިގަނެ, ފަލަސްތީނުގައި މިނިވަން ދައުލަތެއް ގާއިމްކުރަން ރާއްޖެއިން ގޮވާލަމުންދާ ގޮވާލުން ވެސް ތަކުރާރު ކުރައްވައިފަ އެވެ.

ރާއްޖެއަކީ އަބަދުވެސް ފަލަސްތީނުގައި މިނިވަން ދައުލަތެއް ގާއިމްކުރަން ގޮވާލާ ގައުމެކެވެ. އަދި އިޒްރޭލުން ފަލަސްތީނަށް ދެމުންދާ ހަމަލާތަކާ ގުޅިގެން ރާއްޖެއިން އިޒްރޭލާ ދެމެދު އެއްވެސް ހާރިޖީ ގުޅުމެއް ނުބާއްވަ އެވެ.

މީގެ އިތުރުން އިޒްރޭލުން ފަލަސްތީނަށް މިހާރު ދެމުންދާ ހަމަލާތަކާ ގުޅިގެން އިޒްރޭލްގެ ޕާސްޕޯޓް ރާއްޖޭގައި މަނާކުރަން ސަރުކާރުން އޮތީ ބިލެއް ވެސް ހުށަހަޅައިފަ އެވެ.