އައިސީސީގެ ނިންމުމަކީ ކުރިއަށް އެޅި މުހިންމު ފިޔަވަޅެއް: ރައީސް

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރަން އިންޓަނޭޝަނަލް ކްރިމިނަލް ކޯޓް (އައިސީސީ) އިން އިއްޔެ ނެރުނު އަމުރަށް ރާއްޖެ އިން މަރުހަބާ ކިޔާ ކަމަށާއި އެއީ ފަލަސްތީނުގެ ރައްޔިތުންނާ ދެކޮޅަށް ހިންގި ޖަރީމާތަކާއި އިންސާނިއްޔަތާ ހިލާފު އަމަލުތަކަށް ޖަވާބުދާރީ ކުރުވުމަށް ކުރިއަށް އެޅި ވަރަށް ވަރަށް މުހިންމު ފިޔަވަޅެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އަމިއްލަ ދަތުރުފުޅެއްގައި މިވަގުތު އިނގިރޭސި ވިލާތުގައި ހުންނެވި ރައީސް މުއިއްޒު "އެކްސް" ގައި ވިދާޅުވީ، އިންސާނިއްޔަތާ ހިލާފު އަދި ހަނގުރާމައިގެ ޖަރީމާތަކެއް ހިންގާފައިވާތީ ނަތަންޔާހޫ ހައްޔަރުކުރަން އައިސީސީން ނެރުނު އަމުރަށް ރާއްޖެ އިން ފުރިހަމަ އަށް އިހުތިރާމް ކުރާ ކަމަށެވެ.

"ސަރަހައްދީ ހަމަޖެހުމަށްޓަކައި ބައިނަލްއަގްވާމީ ގާނޫނުތައް ނަގަހައްޓަައި ފަލަސްތީނުގެ ރައްޔިތުންނަށް އިންސާފު ހޯދައި ދިނުމަކީ ކޮންމެހެން މުހިންމު ކަމެއް،" ރައީސް ވިދާޅުވި އެވެ.

ރާއްޖެ އިން އޮންނަނީ އަބަދުވެސް އިޒްރޭލާ ދެކޮޅަށް އަދި ފަސްތީނުގެ ރައްޔިތުންގެ ދިފާއުގައި ކަމަށް ވާއިރު، ރައީސް މުއިއްޒު ގެންދަވަނީ އެކިއެކި ފޯރަމްތަކުގައި ރާއްޖޭގެ އަޑުތައް އިތުރަށް ގަދަ ކުރައްވަމުންނެވެ. އެންމެ ފަހުން އެ މަނިކުފާނު ފަލަސްތީނުގެ ރައްޔިތުންގެ ހައްގުގައި ވާހަކަފުުޅު ދެއްކެވީ، އިޒްރޭލްގެ ޖަރީމާތަކާ ގުޅިގެން ސައޫދީ އަރަބިއްޔާ އިން އިސްނަގައިގެން އެ ގައުމުގައި މި މަހުގެ ކުރީކޮޅު ބޭއްވި ޖޮއިންޓް އަރަބް-އިސްލާމިކް ސަމިޓުގަ އެވެ.

އެ ސަމިޓުގައި ރައީސް ވިދާޅުވީ، އިޒްރޭލަށް ވާގިވެރިވެގެން ތިބި ބާރުގަދަ ގައުމުތަކުގެ އަމަލުތަކުން، ފަަލަސްތީނުގެ ނިކަމެތި ރައްޔިތުންގެ ފުރާނައިގެ އަގެއް ނެތް ކަން ހާމަވާ ކަމަށެވެ.

އައިސީސީން ވަނީ ނަތަންޔާހޫގެ އިތުރުން އިޒްރޭލްގެ ކުރީގެ ޑިފެންސް މިނިސްޓަރު ޔޯވް ގަލަންޓް އާއި ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރު ކުރަން ވެސް އަމުރު ނެރެފަ އެވެ.

"އިންސާނިއްޔަތާ ހިލާފ ޖަރީމާތައް ހިންގުމާއި ހަނގުރާމައިގެ ކުށްތައް 8 އޮކްޓޫބަރު 2023 އިން، މި މީހުން ހައްޔަރުކުރުމުގެ އަމުރަށް އެދި ޕްރޮސިކިއުޓަރުން މައްސަލަ ހުށަހެޅި ތާރީހު ކަމަށްވާ 20 މެއި 2024 އަށް ހިންގާފައި ވާތީ ބެންޖަމިން ނަތަންޔާހޫ އާއި ޔޯވް ގަލަންޓާއި ދެ މީހުން ހައްޔަރުކުރުމަށް އަމުރު ނެރެން،" ދަ ހޭގްގައި ހުންނަ އައިސީސީން ނެރުނު ބަޔާނުގައި ބުންޏެވެ.

ނަތަންޔާހޫ އާއި ގަލަންޓް ހައްޔަރުުކުރުމުގެ އަމުރަކަށް މިދިޔަ މެއި މަހު އެދުނީ އައިސީސީގެ ޕްރޮސެކިޔުޓާ ކަރީމް ޚާން އެވެ. އެއީ ފަލަސްތީނުގައި ހިންގަމުންދާ ބަނޑަށް ޖެއްސުމާއި މީހުން މެރުމާއި ނަސްލު ނައްތާލުމުގެ ޖަރީމާތަކާ ގުޅިގެންނެވެ.

ނަމަވެސް ނަތަންޔާހޫ ވަނީ މި މަހުގެ ކުރީކޮޅު ގަލަންޓް ޑިފެންސް މިނިސްޓަރުކަމުގެ މަގާމުން ވަކިކޮށްފަ އެވެ.

އައިސީސީގެ މެންބަރު ގައުމުތަކުގެ އަދަދު 124 އަށް އަރާއިރު އެއިން ގައުމަކަށް މި އަމުރު ރައްދުވާ މީހަކު ހިނގައްޖެ ނަމަ ހައްޔަރުކުރަން ލާޒިމުވާނެ އެވެ. އެކަމަކު އެފަދަ އަމުރުތައް ތަންފީޒު ކުރުމުގެ ބާރު އައިސީސީއަކަށް ނޯވެ އެވެ.