ކަމަދޫ ސަގާފީ ކުޅިވަރު ގުރޫޕަށް އުއްޗުގެ ހާއްސަ މެހެމާންދާރީއެއް

ބ. ކަމަދޫގައި ނިމިދިޔަ އީދުގެ ކުޅިވަރުތަކުގައި ގިނަ ބައެއްގެ ސަމާލުކަން ހޯދި އެ ރަށު ސަގާފީ ކުޅިވަރު ގުރޫޕަށް ލިބުނު ތަރުހީބު ފާހަގަ ކުރުމަށް މަޝްހޫރު ވިޔަފާރިވެރިޔާ މުހައްމަދު މޫސާ (އުއްޗު) ގެ ފަރާތުން ހާއްސަ ޝޯއެއް ބާއްވައިފި އެވެ.

ކަމަދޫގެ ސަގާފީ ކުޅިވަރު ގުރޫޕާއި އެ ރަށު ކައުންސިލްގެ މެންބަރުން އިއްޔެ އުއްޗުގެ ރިސޯޓް ކަމަށްވާ ކުރެއްދޫއަށް އޭނާގެ ދައުވަތަކަށް ގޮސްފައިވެ އެވެ.

ކުރެއްދޫގައި ހުންނަ އުއްޗުގެ "ގަނޑުވަރުގައި" ކަމަދޫގެ ކުޅިވަރު ގުރޫޕަށް ހާއްސަ ސައި ފޮދެއް އިއްޔެ ހަވީރު އުއްޗު ވަނީ ދެއްވައިފަ އެވެ. އަދި ރޭ ކަމަދޫގެ ސަގާފީ ކުޅިވަރުތައް ދައްކާލުމަށް ހާއްސަ ޝޯއެއް ކުރެއްދޫގައި ބޭއްވި އެވެ.

މި ޝޯގައި، މިދިޔަ ބޮޑު އީދުގައި ރާއްޖޭގެ ގިނަ ބައެއްގެ ސަމާލުކަން ހޯދި ކަމަދޫގެ ސަގާފީ ކުޅިވަރު ގުރޫޕްގެ ގިނަ ހުށަހެޅުންތަކެއް ދައްކާލާފައިވެ އެވެ. އަދި އެ ގުރޫޕަށް އުއްޗުގެ ފަރާތުން ހާއްސަ ހަދިޔާއެއް ވެސް އަރުވާފައިވެ އެވެ.

ރޭ ބޭއްވި ހަފުލާގައި އުއްޗުގެ ޗަމްގިރީގެ ނަން ޗަމްޕާ ރޮމޭންޓިކް އައިލެންޑްގެ ނަމަށް ރީބްރޭންޑް ވެސް ކުރި އެވެ.

އުއްޗުގެ ކުރެއްދޫގައި މިފަދަ ހާއްސަ ޝޯތަކާއި ހަފުލާތައް އަބަދުވެސް ބާއްވަ އެވެ.