ކުންފުންޏެއްގެ އެކައުންޓުން 1.9 މިލިއަން ނެގި ބޮޑު ސްކޭމެއް، 158 މީހަކު ބައިވެރިވޭ!

ވިޔަފާރި ކުންފުންޏެއްގެ އެކައުންޓުން 1.9 މިލިއަން ރުފިޔާ ފޭރިގަނެ ބޮޑު ސްކޭމެއް ހިންގާފައިވާ ކަމަށާއި އެކަމުގައި އަމަލީ ގޮތުން 158 މީހުން އަމަލީ ގޮތުން ބައިވެރިވެފައިވާ ކަމަށް ފުލުހުން ބުނެފި އެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި އެންޓި ސްކޭމް ޑިޕާޓްމެންޓްގެ އިންސްޕެކްޓާ އޮފް ޕޮލިސް އާދަމް ނަވީދު ވިދާޅުވީ 1.9 މިލިއަން ރުފިޔާ އަމިއްލަ ކުންފުންޏެއްގެ އެކައުންޓުން މިދިޔަ މަހު ފޭރިގެންފައިވާ ކަމަށެވެ. މި ބޮޑު ސްކޭމް ހިންގަން ހޭދަވީ ގާތްގަނޑަކަށް 5-10 މިނެޓް ކަމަށް ވެސް އޭނާ ވިދާޅުވި އެވެ.

ނަވީދު ވިދާޅުވި ގޮތުގައި މި ސްކޭމް ހިންގީ ރަސްމާލެ މަޝްރޫއުއަށް، ބައެއް ތަކެތި ސަޕްލައިކޮށްދޭން ކުރި މަޝްވަރާތަކެއް ކަމަށް ބުނެ އެވެ. މި މައްސަލައިގެ ތުހުމަތަށް ހައްޔަރުކުރީ ޕެރޯލްގެ ދަށުން ޖަލުން ދޫކޮށްފައި ހުރި މީހެކެވެ.

ސްކޭމުން ފައިސާ ޖަމާވި މީހުންގެ ތެރޭގައި ޖަލު އޮފިސަރުން ހިމެނޭ ކަމަށް ފުލުހުން ބުންޏެވެ.

ނަވީދު ވިދާޅުވި ގޮތުގައި މި ސްކޭމް ހިންގީ ކުންފުންޏެއްގެ ހިއްސާދާރެއްގެ މެއިލް ހެކްކޮށް، ކުންފުނީގެ ބޭންކް އެކައުންޓުގެ އިންޓަނެޓް ބޭންކިންއަށް އެކްސެސްވެެގެންނެވެ. މި ފައިސާތައް ނަގަމުން ދިޔައިރު ވެސް ކުންފުނީގެ ހިއްސާދާރު ގެންދިޔައީ ސްކޭމަރާ ވަޓްސްއެޕް އިން ވާހަކަ ދައްކަމުން ކަމަށް އޭނާ ވިދާޅުވި އެވެ.

އެ ސްކޭމްގައި، އެ ކުންފުނީގެ އެކައުންޓުގައި ހުރި ފައިސާ އިން 70 ޕަސެންޓް ވަނީ ފޭރިގެންފަ އެވެ.

އެކައުންޓުން ގިނަ އަދަދެއްގެ ފައިސާ މަދުވިކަން އެނގުނީ، ނަވީދު ވިދާޅުވި ގޮތުގައި، ކުންފުނީގެ ހިއްސާދާރަކު ބޭންކް އެޕްލިކޭޝަނަށް ވަދެ ބެލުމުންނެވެ. ވަގުތުން ބޭންކަށް މައްސަލަ ރިޕޯޓްކޮށް، އެކައުންޓް ބްލޮކްކުރި އިރު، އެކައުންޓުގައި ބާކީ ހުރީ އަށް ލައްކައެއްހާ ރުފިޔާ އެވެ.

158 މީހުން ބައިވެރިވޭ، ހައްޔަރުކުރީ އެކަކު

ފުލުހުން ބުނި ގޮތުގައި އެ ކުންފުނީގެ އެކައުންޓުން ނެގި ފައިސާ ގާތްގަނޑަކަށް 50 އެކައުންޓަކަށް ވަނީ ޖަމާކޮށްފަ އެވެ. އޭގެ ފަހުން ވެސް އެ ފައިސާ އެހެން އެކައުންޓްތަކަށް ދައުރުކޮށްފައިވެ އެވެ. އަދި ބައެއް އެކައުންޓްތަކުން އޭޓީއެމް މެދުވެރިކޮށް ފައިސާ ނެގި އެވެ.

މި މައްސަލައާ ގުޅިގެން، ތަހުގީގުގެ ފުރަތަމަ 72 ގަޑިއިރު ތެރޭގައި ފައިސާ ޖަމާވި 50 އެކައުންޓް ނިސްބަތްވާ މީހުންގެ ތެރެއިން 80 ޕަސެންޓް މީހުން ހޯދައި، އެމީހުންނާ ސުވާލުކޮށްފައިވާ ކަމަށް ނަވީދު ވިދާޅުވި އެވެ. އަދި ބޭންކްތަކުގެ ތެރޭގައި ދައުރުވި ފައިސާގެ ތެރެއިން ލައްކައެއްހާ ރުފިޔާ ވަނީ ހޯލްޑްކޮށްފަ އެވެ. މިހާތަނަށް ފަސް ލައްކައެއްހާ ރުފިޔާ ފުލުހުން ވަނީ ހޯދައިފަ އެވެ.

ތަހުގީގަށް 60 މީހަކު ބަލައިފާސްކޮށް ސުވާލުކޮށްފައިވާއިރު 57 އެކައުންޓެއް ވަނީ ފްރީޒްކޮށްފަ އެވެ. ނަމަވެސް، މި މައްސަލާގައި މިހާތަނަށް ހައްޔަރުކޮށްފައިވަނީ އެންމެ މީހެކެވެ. ހައްޔަރުކުރި މީހަކީ ޕްރޯލްގެ ދަށުން ދޫކޮށްލާފައިވާ މީހެކެވެ. އެމީހާ މިހާރު ވަނީ ބަންދުކޮށްފަ އެވެ.

ނަވީދު ވިދާޅުވީ މި ސްކޭމްގައި ފޭރިގަތް ފައިސާ، ރާއްޖޭގެ ބޭންކް ސިސްޓަމުން ނެރުމަށް 12 ރަށަކުން 158 މީހުން އަމަލީ ގޮތުން ބައިވެރިވެފައިވާ ކަން ތަހުގީގަށް ހޯދިފައިވާ ކަމަށެވެ. އޭޓީއެމްއިން ފައިސާ ނެގުމަށް ވެސް ބަޔަކު ހަރަކާތްތެރިވެފައިވާތީ، އެކަން ވެސް ބަލަމުންދާ ކަމަށް ވިދާޅުވި އެވެ.

އަމަލީ ގޮތުން ބައިވެރިވި މީހުންގެ ތެރޭގައި ގިނައީ އެ ފައިސާ އަކީ ކުށް ކޮށްގެން ހޯދި ފައިސާކަން ނޭނގި ކުދިކުދި އެހެން މަންފާތަކަށް އޭޓީއެމް ފައިސާ ނެގުމުގެ ކަންކަން ކޮށްދިން މީހުން ކަމަށް ވެސް ނަވީދު ފާހަގަކުރެއްވި އެވެ.