ފަލަސްތީނުގެ ތާރީހާ ގުޅޭ ފޯރަމެއް މިރޭ ބާއްވަނީ

ފަލަސްތީނުގެ ތާރީހާ ގުޅޭ ފޯރަމެއް މިރޭ ބާއްވަން އިސްލާމިކް މިނިސްޓްރީން ނިންމައިފި އެވެ.

އިސްލާމިކް މިނިސްޓްރީން ބުނީ "ފަލަސްތީނާއި އުއްމަތުގެ އެއްބައިވަންތަކަން"ގެ ނަމުގައި ބާއްވާ އެ ފޯރަމަކީ އެ މިނިސްޓްރީ އާއި އިސްރާ އެސޯސިއޭޝަން ގުޅިގެން ކުރިއަށް ގެންދާ ހަރަކާތެއް ކަމަށެވެ.

ފޯރަމް އޮންނާނީ މިރޭ 8:30 ގައި އިސްލާމީ މަރުކަޒުގެ ޖަލްސާކުރާ މާލަމުގަ އެވެ.

ފޯރަމްގައި ވާހަކަ ދައްކަވާނީ ދީނީ އިލްމުވެރިޔާ ޑރ. އަބްދުއްސައްތާރު އަބްދުއްރަހްމާނާއި ޑރ. އަބްދުލްހައްނާން ވަހީދެވެ.

ފަލަސްތީނަށް އެހީވުމަށްޓަކައި ސަރުކާރުން އިސްނަގައިގެން މި ފަހުން ވަނީ ގިނަ ހަރަކާތްތަކެއް ބާއްވައިފަ އެވެ. ފަލަސްތީނުގައި ހާލުގައި ޖެހިފައިވާ މީހުންނަށް އެހީވުމަށް ޒަކާތު ފަންޑުން 100،000 ޑޮލަރު ދޭން ވަނީ ނިންމައިފަ އެވެ.

ސަރުކާރާއި ދައުލަތުގެ މީޑިއާ ޕީއެސްއެމް ގުޅިގެން ފަލަސްތީނަށް އެހީވުމަށް ބޭއްވި ޓެލެތޯނުން ވަނީ 19 މިލިއަން ރުފިޔާ ވެސް އެއްކޮށްފަ އެވެ. ފަލަސްތީނަށް އެހީވާ އދ. ގެ ފަންޑަށް ރާއްޖެއިން ކޮންމެ އަހަރަކު ދޭ އެހީ 5،000 ޑޮލަރުން 50،000 ޑޮލަރަށް ވެސް މިހާރު ވަނީ މަތިކޮށްފަ އެވެ.