ޔޫރޯ ކާމިޔާބުކުރާނެ ގޮތް އިޓަލީ އަށް މިހާރު އެނގޭ: ކްރިސްޓަންޓް

ހަމްބާގް (ޖޫން 13) – ޔޫރޯ ފުޓްބޯޅަ މުބާރާތް ކާމިޔާބުކުރާނެ ގޮތް މިހާރު އިޓަލީ އަށް އެނގޭކަމަށް އެ ޓީމުގެ މިޑްފީލްޑަރު ބްރަޔަން ކްރިސްޓަންޓް ބުނެފި އެވެ.

މާދަމާ ރޭ ފަށާ މުބާރާތުގައި، އެންމެ ފަހުގެ ޗެމްޕިއަން އިޓަލީގެ ފުރަތަމަ މެޗުގައި ހޮނިހިރު ދުވަހުގެ ރޭ ރާއްޖޭގަޑިން ދަންވަރު 12 ޖަހާއިރު ނުކުންނާނީ އަލްބޭނިއާ އާ ދެކޮޅަށެވެ. އެ މެޗުގައި ރޯމާގެ މިޑްފީލްޑަރު ކްރިސްޓަންޓް ކުޅޭނެ ކަމަށް ބެލެވެ އެވެ.

އެއީ ޓީމުގެ މުހިންމު މިޑްފީލްޑަރު ނިކޮލާ ބަރޭލާ އަދި ނިކޮލާ ފަޖޯލީ މެޗަށް ފިޓް ނުވެދާނެ ކަމަށް ބެލެވިފައިވުމުންނެވެ.

މުބާރާތުގެ ކުރިން ޔޫއެފާގެ ވެބްސައިޓަށް ދިން އިންޓަވިއުގައި ކްރިސްޓަންޓް ބުނީ ޔޫރޯ ކާމިޔާބު ކުރަން މަސައްކަތް ކުރަން ޖެހޭނެ ގޮތަކީ ކޮބައިކަން އިޓަލީގެ ޓީމަށް އެނގޭ ކަމަށެވެ. އަދި އެ ޓީމުން ތިބީ މުބާރާތް ދިފާއު ކުރުމުގެ އުންމީދުގައި ކަމަށް އޭނާ ބުންޏެވެ.

ޔޫރޯގައި އިޓަލީ އަށް މަސްހުނި ނަތީޖާތަކެއް އެބަ ހުއްޓެވެ. ޔޫރޯ 2000 ގެ ފައިނަލުގައި އެ ޓީމު ފްރާންސް އަތުން ބަލިވި އެވެ. އަދި 2016 ގެ ފައިނަލްގައި ސްޕެއިން އަތުން ބަލިވި އެވެ. އެކަމކު 2020 ގެ ޔޫރޯ އިންގްލެންޑް ބަލިކޮށް ކާމިޔާބު ކުރި އެވެ.

"ޔޫރޯ 2020 ވެގެންދާނީ އަހަރެމެންނަށް ވަރަށް ފުރިހަމަ ހަނދާނަކަށް. އެކަމަކު މިއީ ފުޓްބޯޅަ އާ މުބާރާތެއް އިތުރަށް މަސައްކަތް ކުރާން ޖެހޭނެ އަހަރެމެންނަކީ އަދިވެސް އެންމެ މޮޅު ޓީމުކަން ސާބިތުކޮށްދޭން،" އުމުރުން 29 އަހަރުގެ ކްރިސްޓަންޓް ބުންޏެވެ.

މުބާރާތުގެ ފޭވަރިޓުންނަކީ ކޮބައިތޯ ސުވާލު ކުރުމުން ކްރިސްޓަންޓް ބުނީ އިންގްލެންޑާއި ފްރާންސް އެ ލިސްޓޤގައި ހިމެނޭނެ ކަމަށެވެ.

"ނަމަވެސް އަހަރެމެންގެ ސްކޮޑް ވަރަށް ޒުވާން އަދި ތަޖުރިބާވެސް އެބައޮތް. މި ޓީމު ހިމެނޭނެ،" އޭނާ ބުންޏެވެ.