މެންބަރު ކުޑޫގެ ކެމްޕެއިނުން ބާކީވި ފައިސާ ވައުދާ އެއްގޮތަށް ޓައިނީ ހާޓްސް އަށް ހަދިޔާކޮށްފި

ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުުހައްމަދު އިބްރާހިމް (ކުޑޫ)ގެ ކެމްޕެއިނަށް ލިބުނު ފައިސާގެ ތެރެއިން ބާކީވި ފައިސާ ޓައިނީހާޓްސް ޖަމިއްޔާ އަށް ހަދިޔާކުރައްވައިފި އެވެ.

މިދިޔަ އޭޕްރީލް މަހު އޮތް އިންތިހާބުގެ ކެމްޕެއިން ކުޑޫ ކުރެއްވީ އާންމުންނާއި ސަޕޯޓަރުންގެ އެހީގައި ކްރައުޑް ފަންޑިން ހޯއްދަވައިގެންނެވެ. އެ ފައިސާ އޮޑިޓްކޮށް އަދި ކެމްޕެއިންަށް ފަހު ބާކީ ފައިސާ ހުރި ނަމަ ހަދިޔާކުރައްވާނެ ކަމަށް ކެމްޕެއިންގައި ކުޑޫ ވައުދުވެ ވަޑައިގަތެވެ.

އޭނާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އެ ވައުދު ފުއްދަވައި، ކެމްޕެއިނަށް ކުރި ހަރަދު އޮޑިޓްކުރުމަށް ފަހު ބާކީ ހުރި ފައިސާ ޓައިނީހާޓްސްއަށް ހަދިޔާކުރައްވާފައިވާ ކަމަށެވެ.

އިދިކޮޅު އެމްޑީޕީގެ ޓިކެޓްގައި ގަލޮޅު އުތުރު ދާއިރާގެ މަޖިލިސް ގޮނޑިއަށް ކުޑޫ އިންތިހާބުވީ އެ ގޮނޑީގައި ތިން ދައުރު އިންނެވި އީވާ އަބްދުﷲ ބަލިކުރެއްވުމަށް ފަހު އެވެ.

ކެމްޕެއިންގައި ކުޑޫ ވެވަޑައިގެންނެވި އެންމެ ބޮޑު ވައުދަކީ ދެފުށް ފެންނަ ގޮތަކަށް މަސައްކަތްކުރައްވައި، މަޖިލީހުގައި ތަފާތު ދެއްކެވުމަށެވެ.

"މީހުންނަށް ފިލައިގެން ނޫޅޭނަން. ދާއިރާގައި ކުރާ މަސައްކަތްތައް ދާއިރާގެ ރައްޔިތުންނަށް އެނގޭނެ ދެފުށްފެންނަ ގޮތަށް ހަދަން އޮފީހެއް ވެސް ހުޅުވާނަން. މީހުންނާ ވާހަކަ ދެއްކޭ ގޮތަށް ފެންނަ ހިސާބުގައި އިންނާނަން," ކެމްޕެއިންގައި "މިހާރު" އަށް ދެއްވި އިންޓަވިއުގައި ކުޑޫ ވިދާޅުވެފައިވެ އެވެ.