ހިތަދޫގެ މަގެއްގައި ހުރި ކާރުތަކެއްގައި ރޯވެ، އަލިފާނުގެ ހާދިސާއެއް!

އައްޑޫ ހިތަދޫގެ މަގެއްގައި ޕާކުކޮށްފައި ހުރި ބާ ކާރުތަކެއްގައި މިއަދު ރޯވެ، އަލިފާނުގެ ހާދިސާއެއް ހިނގައިފި އެވެ.

އެމްއެންޑީއެފުން ބުނީ އެ ހާދިސާ ހިނގީ ހިތަދޫ އުސްގަނޑު ސަރަހައްދުގައި އޮތް ބާ ކާރުތަކެއްގައި ރޯވެގެން ކަމަށެވެ.

އެ ހާދިސާ ހިނގި ކަމުގެ ރިޕޯޓު ލިބުނީ މިއަދު ހެނދުނު 7:30 ހާއިރު ކަމަށާއި އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔާ ސްޓޭޝަންގެ ފަޔާ ފައިޓަރުން ހަރަކާތްތެރިވެ، 8:00 ހާއިރު ނިއްވާލާފައިވާ ކަމަށް ވެސް އެމްއެންޑީއެފުން ބުންޏެވެ.

އެ ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވާ ކަމަށް އެމްއެންޑީއެފުން ބުނި ނަމަވެސް އެއީ ކިހިނެތް ހިނގި ހާދިސާއެއް ކަމެއް ނުބުނެ އެވެ.

ދައުރުވަމުންދާ ފޮތޯތަކުން ފެންނަނީ އަލިފާން ނިއްވައިލެވުނުއިރު، އެ ކާރުތައް ވަރަށް ބޮޑަށް އަނދާފައިވާ ތަނެވެ. އެ ސަރަހައްދުގައި އޮތް ތިން ކާރެއްގެ އިތުރުން އެ ސަރަހައްދުގައި ހުރި ގަސްތަކަށް ވެސް ވަނީ އަލިފާނުގެ އަސަރުކުރި އެވެ.