ވިކްޓިމް ސަޕޯޓް ދާއިރާއަށް ހާއްސަކޮށް ޕީޖީ އޮފީހުން ނިއުސް ލެޓާއެއް ލޯންޗްކޮށްފި

ވިކްޓިމް ސަޕޯޓް ދާއިރާއަށް ހާއްސަކޮށް ޕްރޮސެކިއުޓާ ޖެނެރަލް (ޕީޖީ) އޮފީހުން ހާއްސަ ނިއުސް ލެޓާއެއް ލޯންޗްކޮށްފި އެވެ.

ޕީޖީ އޮފީހުން ބުނީ "ނިޔާވެހި" ގެ ނަމުގައި މިއަދު ނެރެން ފެށި ނިއުސް ލެޓާއަކީ ވިކްޓިމް ސަޕޯޓަށް ހާއްސަކޮށް، ޖިނާއީ އަދުލުގެ ނިޒާމާއި ކުޑަކުދިންގެ އަދުލުގެ ނިޒާމުގައި މަސައްކަތްކުރާ ފަރާތްތަކަށް ހާއްސަކޮށްގެން ނެރެންފެށި ނިއުސް ލެޓާއެއް ކަމަށެވެ.

އެކި ކުށްތަކުގައި އަނިޔާލިބޭ ފަރާތްތައް ހިމެނޭ މައްސަލަތަކުގައި އަމަލުކުރާ އުސޫލުތަކަށް އަންނަ ބަދަލުތަކާއި ކޯޓުތަކުން އެފަދަ މައްސަލަތަކުގައި ނިންމާ ނިންމުންތަކާއި ޕީޖީ އޮފީހުން އަމަލުކުރާ އުސޫލުތައް އެ ނިއުސް ލެޓާގައި ޝާއިއު ކުރާނެ ކަމަށް ޕީޖީ އޮފީހުން ބުންޏެވެ.

ޕީޖީ އޮފީހުން ބުނިގޮތުގައި ވިކްޓިމް ސަޕޯޓް ދާއިރާގައި މަސައްކަތްކުރާ މީހުންނަކީ ދުނިޔޭގެ ފެންވަރުގެ ހިދުމަތެއް ދޭ ބަޔަކަށް ހެދުމަކީ އެ އޮފީހުގެ އަމާޒެކެވެ. އެހެންވެ، އެ ދާއިރާއާ ގުޅުންހުރި މުހިންމު އުސޫލުތައް އެންމެންނަށް ފެންނަން ހުރުމަކީ މުހިންމު ކަމެއް ކަމަށް އެ އޮފީހުން ބުންޏެވެ.

ކޮންމެ މަހަކު އެއްފަހަރު ނެރޭ އެ ނިއުސް ލެޓާގައި ލިޔުންތައް ޝާއިއު ކުރުމުގެ ފުރުސަތު އެ ދާއިރާގެ ބޭފުޅުންނަށް ވެސް އޮންނާނެ ކަމަށް ޕީޖީ އޮފީހުން ބުންޏެވެ.