ރަފަހް އަށް އެރުމުގެ އޮޕަރޭޝަން ފަށާނަން: އިޒްރޭލް

ފަލަސްތީނުގެ ޣައްޒާގެ އުތުރުގައި ދޮޅު މިލިއަން މީހުން ހިމާޔަތް ހޯދަމުން އަންނަ ރަފަހް އަށް އަރައި އަސްކަރީ އޮޕަރޭޝަނެއް ހިންގުމުގެ ޕްލޭން ދޫކޮށްނުލާ ކަމަށާއި އެކަން ކުރިއަށް ގެންދާނެ ކަމަށް އިޒްރޭލުން އިއްޔެ ބުނުފި އެވެ.

ރަފަހް އަކީ އިޒްރޭލުން މީގެ ހަ މަސް ކުރިން ޣައްޒާއަށް ދޭން ފެށި ހަމަލާތަކާ ގުޅިގެން ޣައްޒާގެ އެހެން ހިސާބުތަކުން ހިމާޔަތް ހޯދަން މީހުން ވަދެ ތިބި ސަރަހައްދު ކަމަށްވާ ރަފަހް އަށް އަރަން އުޅޭތީ އެކަން ނުކުރުމަށް ބައިނަލްއަގުވާމީ މުޖުތަމައުން ދަނީ ގޮވާލަމުންނެވެ.

"ރަފަހް އަށް އަރައި ހަމާސްގެ ބާރު ނައްތާލުމުގެ އޮޕަރޭޝަން ހިންގުމުގެ ޕްލޭން އިޒްރޭލުން ކުރިއަށް ގެންދާނެ،" އިޒްރޭލު ސަރުކާރުގެ ތަރުޖަމާނު ޑޭވިޑް މެންސާ ޕްރެސް ކޮންފަރެންސެއްގައި ބުންޏެވެ.

އޭނާ ބުނީ ހަމާސްގެ ހަތަރު ފައުޖެއް ރަފަހްގައި ގާއިމުވެ ހިމާޔަތް ހޯދާ ކަމަށާއި އިޒްރޭލުގައި ތިބެގެން އެ ބާރުތައް ނައްތާލެވެން ނެތް ކަމަށެވެ. އެހެންވެ އޮތީ ރަފަހް އަށް އަރައި ހަމަލާ ދިނުން ކަމަށް ބުންޏެވެ.

މެންސާ ބުނީ އިޒްރޭލު ސިފައިންގެ ރިޒާވް ދެ ބްރިގޭޑެއް ޣައްޒާގައި ހަމާސްއާ ދެކޮޅަށް މިހާރު ހަރަކާތްތެރިވާން ފަށާފައިވާ ކަމަށެވެ. އޭނާ ބުނި ގޮތުގައި އޮކްޓޫބަރު 72 ގައި އިޒްރޭލުން ޣައްޒާއަށް އެރި ފަހުން ހަމާސްގެ 24 ފައުޖުގެ ތެރެއިން 18 ނުވަތަ 19 ފައުޖު ނައްތާލެވިފައިވާ ކަމަށެވެ.

ރަފަހް އަށް އަރައި އަސްކަރީ އޮޕަރޭޝަނެއް ފަށައިފި ނަމަ އެތައް ހާސް ބައެއްގެ ފުރާނަ ގެއްލިދާނެ ކަމަށާއި މިއީ ވަރަށް ބޮޑު ނުރައްކަލަކަށް ވެދާނެ ކަމުގެ އިންޒާރު އިޒްރޭލުގެ އެކުވެރި އެމެރިކާ އާއި އެކި ގައުމުތަކުން އަންނަނީ ދެމުންނެވެ. އެކަމަކު ބޮޑުވަޒީރު ބިންޔާމީން ނަތަންޔާހޫ ވެސް ވަނީ ރަފްހް އަށް އަރާނެ ކަމުގެ އިންޒާރު ތަކުރާރުކޮށް ދީފަ އެވެ.

އޮކްޓޫބަރު 7 ގައި ހަމާސް އިން އިޒްރޭލަށް ހަމަލާދީ ހާހަކަށް ވުރެ ގިނަ މީހުން މަރާލައި 250 މީހަކު ރަހީނުކުރުމުން ހަމާސް ނައްތާލަން ކަމަށް ބުނެ އިޒްރޭލުން ދޭން ފެށި ހަމަލާތަކުގައި ފަލަސްތީނުގެ 34،000 މީހަކު ވަނީ މިހާތަނަށް ޝަހީދުކޮށްލައިފަ އެވެ. -- އޭއެފްޕީ