ޣައްޒާ ރައްޔިތުންނަށް ހިމާޔަތެއް ލިބޭ ހަމައެކަނި ސިޓީއަށް އިޒްރޭލު ސިފައިން ވަންނަނީ

އިޒްރޭލުން ވަޔާއި އެއްގަމު މަގުން ހަމަލާ ދެމުން ގެންދާ ފަލަސްތީނުގެ ޣައްޒާގައި އާންމުން ހިމާޔަތް ހޯދަން މިހާރު އޮތް ހަމައެކަނި ސިޓީ ކަމަށްވާ ރަފާ އަށް އިޒްރޭލު ސިފައިން ވަދެގަތުމަށް ތައްޔާރުވަމުން ދާތީ އެކި ފަރާތްތަކުން އެކަން ކުށްވެރިކޮށް އިޒްރޭލު ދޭން ފަށައިފި އެވެ.

ހަމަލާތަކުގެ ސަބަބުން ގެދޮރު ގެއްލިފައިވާ މީހުން ޓެންޓުތަކާއި އެކި ތަންތަނުގައި ހިޔާވަހިކަން ހޯދާ، މިހާރު މިލިއަނަކަށް ވުރެ ގިނަ މީހުންނާ އެކު ތޮއްޖެހިފައިވާ ރަފާއަށް ސިފައިން ވަނުމާ ގުޅޭ ޕްލޭނެއް ހުށަހަޅަން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ އަސްކަރިއްޔާއަށް އަންގައިފަ އެވެ.

ޣައްޒާއަށް މީގެ ހަތަރު މަސް ކުރިން ދޭން ފެށި ހަމަލާތަކުގައި ފަލަސްތީނުން ޝަހީދުވި މީހުންގެ އަދަދު 28،000 އިން މައްޗަށް ގޮސްފައި ވާއިރު ރަފާ އަށް ސިފައިން ވަދެގެންފި ނަމަ އިތުރު އެތައް ހާސް ބައެއްގެ ފުރާނަ ގެއްލިދާނެ ކަމުގެ ބިރު އެބަ އޮތެވެ.

ފަލަސްތީނުގެ ރައީސް މަހްމޫދު އައްބާސްގެ އޮފީހުން ނެރުނު ބަޔާނެއްގައި އިޒްރޭލުގެ މި އަމަލު ވަނީ ކުށްވެރިކުރައްވައިފަ އެވެ.

"އިޒްރޭލުގެ އިސްތިއުމާރީ ބާރުގެ މި އަމަލަކީ މުޅި ސަރަހައްދާއި މުޅި ދުނިޔޭގެ ސަލާމަތަށް ވެސް އޮތް ނުރައްކަލެއް. މިއީ ފާޅުގައި ހުރިހާ ރަތް ރޮނގެއް ހުރަސްކުރުން،" ބަޔާނުގައި ބުނެފައިވެ އެވެ.

ސައޫދީ އަރަބިއްޔާއިން ބުނީ އިޒްރޭލުން ކުރަން އުޅޭ ކަންތަކުގެ ސަބަބުން އިންސާނީ ބޮޑު ކާރިސާއެއް ކުރިމަތިވާނެ ކަމަށެވެ. މިއީ މަޖުބޫރުން ވަޒަނުން ބޭރުކުރުން ކަމަށާއި އދ.ގެ ސަލާމަތީ މަޖިލީހުން މިކަން ހުއްޓުވަން ޖެހޭނެ ކަމަށް ވެސް ސައޫދީން ބުންޏެވެ.

އަސްކަރީ ކަންކަމާއި އެހެން ހުރިހާ ކަމެއްގައި އިޒްރޭލަށް އެންމެ އެހީވާ އެމެރިކާގެ ރާގު ވެސް އިޒްރޭލާ މެދު ބަދަލުވަމުންދާ ކަމުގެ އަލާމަތްތައް އަންނަނީ ފެންނަމުންނެވެ. އެމެރިކާގެ ރައީސް ޖޯ ބައިޑެން ވިދާޅުވީ އިޒްރޭލުން ދޭ ހަމަލާތައް ހުއްޓަން ވެއްޖެ ކަމަށެވެ. ކުށެއް ނެތް އެތައް އާންމުންނެއް ބަނޑަށްޖެހި އަދި މަރުވަމުންދާ ކަމަށެވެ. އެމެރިކާގެ ސްޓޭޓް ޑިޕާޓްމަންޓުން ވެސް ބުނީ ރަފާ އަށް އިޒްރޭލު ސިފައިން އެރުމަށް ތާއީދު ނުކުރާ ކަމަށާއި މިއީ ވަރަށް ރަނގަޅަށް ޕްލޭން ކޮށްގެން ނޫނީ ނުކޮށްފި ނަމަ ބޮޑު ކާރިސާއަކަށް ވެދާނެ ކަމަށެވެ.

އިޒްރޭލުން ޣައްޒާއަށް ހަމަލާދޭން ފެށީ، ފަލަސްތީނުގެ ބިންތައް ހިފައިގެން ތިބޭ އިޒްރޭލާ ދެކޮޅަށް ހަމާސް އިން އޮކްޓޫަބަރު 7 ގައި ދިން ކުއްލި ހަމަލާތަކެއްގައި 1،140 މީހަކު މަރާލައި 250 މީހަކު ރަހީނުކުރުމާ އެކުގަ އެވެ. މިއިން ޒަމާނަކު ވެސް އިޒްރޭލަށް ނުދޭހާ ވަރުގަދަ ހަމަލާތަކާ އެކު އިޒްރޭލުން ހަމަލާތައް ފެށީ ހަމާސް ނައްތާލުމުގެ ނަމުގަ އެވެ.

އިޒްރޭލުް ބުނަނީ ރަފާގައި ހަމާސްގެ ހަތަރު މަރުކަޒެއް އެބަހުރި ކަމަށާއި އެ ތަންތަން ނައްތާނުލައި ހަނގުރާމަ ނިންމައިފި ނަމަ ނަތީޖާ ހާސިލްނުވާނެ ކަމަށެވެ.

ރަފާ އަށް އެއްގަމު މަގުން އެރުމުގެ ކުރިން ވެސް އިޒްރޭލުން ވަނީ ވައިގެ މަގުން ހަމަލާދީފަ އެވެ. އެ ހަމަލާތަކުގައި ފަންސަވީހަކަށް މީހުން ރަފާއިން ޝަހީދުވި ކަމަށް ސިއްހީ އިދާރާތަކުން ވަނީ ބުނެފަ އެވެ.

ރަފާގައި އުޅޭ މީހުން ބުނަމުން ދަނީ އެ މީހުން އެތަނަށް ދިޔައީ ރައްކާތެރިކަން ހޯދަން ކަމަށާއި މިހާރު ވެސް މިސްރުގެ ބޯޑަރާ ހިސާބަށް ފަހަތަށް ޖައްސާފައި ތިބި އިރު ދެން އިތުރަށް ދާނެ ތަނެއް އެ މީހުންނަށް ނެތް ކަމަށެވެ. --އޭއެފްޕީ