ޓިކެޓް ގަތް ފަހުން ވިސާ ހަމަނުޖެހި 15 މީހަކަށް އައިޓީބީ ފެއާއަށް ނުދެވުނު

ޖަރުމަނުވިލާތުގެ ބާލިންގައި އަންގާރަ ދުވަހު ފަށާ ދުނިޔޭގެ އެންމެ ބޮޑު ޓޫރިޒަމް ފެއާ، އައިޓީބީ އަށް ދިއުމަށް ހަމަޖެހިފައިވާ 15 މީހެއްގެ ޓިކެޓާއި ހޮޓެލް ބުކިން ވެސް ހަމަޖެއްސިފަހުން ވިސާ ނުލިބިގެން އެ ފެއާ އަށް ދެވޭ ގޮތެއް ނުވި އެވެ.

"މިހާރު" އަށް އެނގިފައިވާ ގޮތުގައި އެ ފެއާ އަށް އެމްއެމްޕީއާރްސީ މެދުވެރިކޮށް ދާން އޮތް 10 މީހުންނާއި ޓޫރިޒަމް ދާއިރާގެ ފަސް މީހަކަށް ވެސް ވިސާ ނުލިބެ އެވެ. އެމްއެމްޕީއާރްސީން ފޮނުވާ 10 ވަރަކަށް މީހުންގެ ޓިކެޓް އާއި ރީ ރޫޓުތަކުގެ ދަތުރުތަކާއި ބައެއް މީހުންގެ ހޮޓެލް ބުކިންތައް ވެސް ހުރީ ހަމަޖައްސައިފަ އެވެ.

ވިސާ ނުލިބުނު މީހުންގެ ތެރޭގައި ބޭންޑާއި، ސަގާފީ ހަރަކާތްތައް ހިންގާ ބައެއް މީހުންގެ އިތުރުން މީޑިއާތަކުން ދާ މީހުން ވެސް ހިމެނެ އެވެ.

ވިސާތައް ރިޖެޓް ކުރި އިރު، އެ މީހުންގެ ވިސާގެ ކަންކަން އެމްއެމްޕީއާރްސީން ފެށީ މިދިޔަ މަހުގެ 20 ހިސާބުގަ އެވެ. ޖާމަނީގެ ޝެންގަން ވިސާ ނުލިބުމުން ބައެއް މީހުން ޔޫރަޕްގެ އެހެން ގައުމުތައް މެދުވެރިކޮށް ޝެންގަން ވިސާ ލިބޭތޯ މަސައްކަތް ކޮށްފައިވެ އެވެ.

ކޮންމެ އަހަރެއްގެ ވެސް ބާލިން ފެއާ ކުރިއަށްދަނީ މާޗް މަހުގެ ފުރަތަމަ ހަފްތާގަ އެވެ. މި އަހަރުގެ ފެއާ ކުރިއަށް ދަނީ 5-7 އަށެވެ.

ބާލިން ފެއާ އަކީ 1966 ވަނަ އަހަރުން ފެށިގެން ބާއްވަމުން އަންނަ ދުނިޔޭގެ އެންމެ ބޮޑު ޓްރެވަލް ފެއާ އެވެ. މި އަހަރުގެ ފެއާގައި ވެސް 180 ގައުމަކުން 10،000 އަށް ވުރެ ގިނަ އެގްޒިބިޓަރުން ބައިވެރިވެ އެވެ. މިއަހަގެ ފެއާގައި ރާއްޖެއިން 106 ކުންފުންޏަކުން 247 މީހުން ބައިވެރިވެ އެވެ.