ފަލަސްތީނުގެ ބިންތަކުން އިޒްރޭލު ފައިބަން ކޯޓުން އަމުރު ނުކުރަން އެމެރިކާއިން އެދެފި

އިޒްރޭލުން ހިފާފައިވާ ފަލަސްތީނުގެ ބިންތަކުން އިޒްރޭލު ފައިބައި އެ ބިންތައް ދޫކޮށްލަން ގާނޫނީ ގޮތުން މަޖުބޫރުވާނެ ގޮތަކަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އަމުރު ނުކުރުމަށް އެ ކޯޓުގައި އެމެރިކާއިން ބުދަ ދުވަހު އެދެފި އެވެ.

އައިސީޖޭގައި ހަފްތާއެއްގެ މުއްދަތަށް މިހާރު ކުރިއަށް ގެންދާ އަޑުއެހުންތަަަކަކީ އދ.ގެ އެދުމަކަށް ކުރިއަށް ގެންދާ އަޑުއެހުންތަކެކެވެ. މި އަޑުއެހުމުގައި، މީގެ ކުރިން ދުވަހަކު ވެސް ފަލަސްތީނާއި އިޒްރޭލުގެ މައްސަލައިގައި ގައުމުތަކުން ބަސް ނުކިޔާ ވަރަށް ބައިވެރިވުން ބޮޑެވެ. މި އަޑުއެހުންތަކުގައި ހިޔާލު ފާޅުކުރުމަށް 52 ގައުމަކުން ބައިވެރިވެ އެވެ.

ވާހަކަ ދެއްކި ގިނަ ގައުމުތަކުން ބުނެފައިވަނީ 1967 ގެ "ހަ ދުވަހުގެ ހަނގުރާމަ" އަށް ފަހު އިޒްރޭލުން ހިފި ފަލަސްތީނުގެ ބިންތަކުން އިޒްރޭލު ފައިބަންޖެހޭނެ ކަމަށެވެ. އެކަމަކު އަބަދުވެސް އިޒްރޭލުގެ ދިފާއުގައި މަސައްކަތްކުރާ އެމެރިކާއިން ކޯޓުގައި ވެސް ނުކުތީ އިޒްރޭލުގެ ދިފާއުގަ އެވެ.

"އިޒްރޭލުން ހިފާފައިވާ ބިންތަކުން، ޝަރުތުތަކާ ނުލައި ފޭބުން ގާނޫނީ ގޮތުން ލާޒިމުވާ ކަމަށް ކޯޓުން ނިންމައިގެން ނުވާނެ،" އެމެރިކާގެ ސްޓޭޓް ޑިޕާޓްމަންޓުގެ ލީގަލް އެޑްވައިޒަރު ރިޗާޑް ވިސެކް ވިދާޅުވި އެވެ.

"ހުޅަނގު އައްސޭރި އާއި ޣައްޒާއިން އިޒްރޭލު ފޭބުމަށް ޝަރުތުކުރުމާ ދިމާލަށް އަޅާ ކޮންމެ ފިޔަވަޅެއް އަޅަން ޖެހޭނީ އިޒްރޭލުގެ ސަލާމަތާއި ރައްކާތެރިކަން ކަށަވަރުކޮށްފައި،" އޭނާ ވަކާލާތު ކުރައްވަމުން ވިދާޅުވި އެވެ.

މިހާރު އިޒްރޭލުން ޣައްޒާއަށް ދެމުން ގެންދާ ހަމަލާތަކުގެ ފެށުން ކަމަށްވާ، މިދިޔަ އަހަރުގެ އޮކްޓޫބަރު ހަތެއްގައި ހަމާސް އިން އިޒްރޭލަށް ދިން ހަމަލާތަކަށް އިޝާރާތްކުރައްވަމުން އޭނާ ވިދާޅުވީ އެއީ އިޒްރޭލަށް ސަލާމަތީ ކަންކަން ކަށަވަރުކޮށްދޭންޖެހޭކަން އެންމެންނަށް އަންގައިދޭ ހާދިސާއެއް ކަމަށެވެ.

އިރުމަތީ ގުދުސް ހިމެނޭ ގޮތަށް ފަލަސްތީނުގެ ބިންތައް ހިފައިގެން އިޒްރޭލު އޮތުމުގެ ސަބަބުން ކުރިމަތިވާ ގާނޫނީ ނަތީޖާތަކާ ބެހޭ ގޮތުން" އިސްތިޝާރީ ލަފައެއް ދިނުމަށް އދ. އިން އެދުމާ ގުޅިގެން ކުރިއަށް ގެންދާ އަޑުއެހުންތަކަށް ފަހު ލަފައެއް ދޭނީ މި އަހަރުގެ ފަހުކޮޅު ކަމަށް ބެލެވެ އެވެ. މި އަޑުއެހުންތަކަށް އިޒްރޭލުން ވަނީ ލިޔުމުން ރައްދު ހުށަހަޅައިފަ އެވެ. އިޒްރޭލުން ބުނީ ކޯޓުން ކުރަނީ ތަފާތުކުރުން ބޮޑު އަދި ބޭއިންސާފުގެ މަގަށް އުފައްދާ ސުވާލުތަކެއް ކަމަށެވެ. -- އޭއެފްޕީ