ގޭގައި އުފައްދައިގެން ވިއްކާ ކާބޯތަކެއްޗަށް ހާއްސަ ލޯގޯއެއް

ގޭގައި ކާބޯތަކެތި ހަދައިގެން ވިއްކާ މީހުންނަށް ބިޒްނަސް ސެންޓާ ކޯޕަރޭޝަން (ބީސީސީ) އިން ޑިޒައިންކުރި ހާއްސަ ލޯގޯއެއް ބޭނުންކުރެވޭ ގޮތް ހަދައިފި އެވެ.

އިސްލާމީ މަރުކަޒުގައި ބޭއްވި ރަސްމިއްޔާތެއްގައި، 24 ގަޑިއިރުގެ ތެރޭގައި މުއްދަތު ހަމަނުވާ އެއްޗެހި ބަންދުކޮށް، އެ ޕެކްގައި ބޭނުންކުރާ ލޯގޯ އިފުތިތާހު ކޮށްދެއްވީ، ކާބޯތަކެތީގެ ރައްކާތެރިކަމާ ގުޅޭ ދާއިރާއިން މަތީ ތައުލީމް ހާސިލްކުރައްވާފައިވާ ފަސްޓް ލޭޑީ ސާޖިދާ މުހައްމަދެވެ.

އެ ރަސްމިއްޔާތުގައި އެ ކަމަނާ ވިދާޅުވީ ކާބޯތަކެތީގެ ރައްކާތެރިކަން ކަށަވަރުކުރަން އެމްއެފްޑީއޭ އިން ކަނޑައަޅާފައިވާ މިންގަނޑުތަކާ އެއްގޮތަށް އަމަލުކުރާ މީހުންނަށް ލޯގޯއެއް ދިނުމަކީ އެ ތަކެތީގެ ރައްކާތެރިކަމާ މެދު އާންމުންގެ އިތުބާރު ބޮޑުވާނެ ކަމެއް ކަމަށެވެ.

ގޭގައި ތިބެގެން މަސައްކަތްކުރާ މީހުންނަށް އެ މީހުންގެ ވިޔަފާރި ފުޅާކުރުމަށް ފުރުސަތު ފަހިވެ، ހާއްސަކޮށް އަންހެނުން ކުރާ ވިޔަފާރިތަކަށް ފައިދާ ލިބޭނެ ކަމަށް ފަސްޓް ލޭޑީ ވިދާޅުވި އެވެ.

ސާޖިދާ ވަނީ ރައްޔިތުންގެ މަޖިލީހަށް 2021 ވަނަ އަހަރު ހުށަހެޅި ކާބޯތަކެތީގެ ރައްކާތެރިކަމުގެ ބިލު އަވަހަށް ގާނޫނަކަށް ވެ، އެ ގާނޫނު ތަންފީޒު ކުރުމަށް އެދިވަޑައިގެންފަ އެވެ. އޭގެ ސަބަބުން އާއްމުންނާއި ގައުމުގެ ކުރިއެރުމަށް މަގުފަހިވާނެ ކަމަށް ވިދާޅުވި އެވެ.

އާމްދަނީ ހޯދުމަށްޓަކައި ގޭގައި އުފައްދައި ބަންދުކުރާ ކާބޯތަކެއްޗަށް ހާއްސަ ލޯގޯ ހޯދަން ހުށަހެޅަން ޖެހޭނީ އެމްއެފްޑީއޭގެ ދިރިތި ޕޯޓަލް މެދުވެރިކޮށެވެ. އެ ޕޯޓަލަށް ހުށަހެޅޭނީ ވެސް، ގޭގައި ކާބޯތަކެތި ވިއްކާ މީހުންނަށް ބީސީސީން ހާއްސަ ކޮށްފައިވާ ޕޯޓަލްގައި ރަޖިސްޓަރީވުމަށް ފަހު، އެ ސެންޓަރުން ދޭ ލިޔުމެއް ހުށަހެޅުމުންނެވެ.

އިކޮނޮމިކް މިނިސްޓްރީގެ ދަށުން ހިންގާ ބީސީސީގެ އޮފިޝަލަކު ވިދާޅުވީ ލޯގޯ ބޭނުންކުރާނީ ތެލުލިފަތާއި ރިހާކުރާއި މަސްމިރުސް ފަދަ ގިނަ ދުވަހު ހުންނަ ތަކެތީގަ އެވެ.

އޭނާ ވިދާޅުވީ ލޯގޯ ދިނުމުގެ ކުރިން، އެ މަސައްކަތްކުރާ ތަން އެމްއެފްޑީއޭއިން ފާހެއް ނުކުރާނެ އެވެ. ހުށަހަޅަނީ ތެދު މައުލޫމާތުކަން އިގުރާރުވާން ޖެހޭއިރު، އެމްއެފްޑީއޭ އިން ބަލާނީ މައްސަލައެއް ދިމާވުމުން ކަމަށް އޮފިޝަލް ވިދާޅުވި އެވެ.

މި ލޯގޯ ބޭނުންކުރުމަކީ މި ވަގުތު އަމިއްލަ އިހުތިޔާރުގައި އޮތް ކަމެކެވެ. ނަމަވެސް، އެ ބޭނުންކުރުމުގެ ސަބަބުން، އެ ގަންނަނީ ރައްކާތެރި ތަކެތިކަން، ގަންނަ މީހާއަށް ޔަގީން ވާނެ ކަން ބީސީސީން ފާހަގަކުރެ އެވެ.