އަހަރެއް ފަހުން ނިއު ކުޅުނު ފުރަތަމަ މެޗު ކާމިޔާބު

ރާއްޖޭގެ އެންމެ މަގުބޫލް ނިއު ރޭޑިއަންޓް ސްޕޯޓްސް ކްލަބް އަހަރު ފަހުން ކުޅުނު ފުރަތަމަ ވާދަވެރި މެޗުގައި 3-0 އިން ދަ ގްރާންޑޭ ސްޕޯޓްް ކްލަބް ބަލިކޮށްފި އެވެ.

މި މެޗަކީ މިދިޔަ ޑިސެމްބަރު މަހުގެ 31 ވަނަ ދުވަހު ކުޅެން ތާވަލް ކުރެވުނު މެޗެކެވެ. ނަމަވެސް އެދުވަހުގެ މޫސުން ގޯސްވެ ގަދަ ވިއްސާރައިގެ ސަބަބުން މެޗު ނުކުޅެވި ފަސްކުރަން ޖެހުނީނެވެ.

މި މެޗުގެ ކުރިން އެންމެ ފަހުން ނިއު ރޭޑިއަންޓް ރަސްމީ މެޗެއް ކުޅެފައި ވަނީ 2022 ވަނަ އަހަރުގެ ދެވަނަ ޑިވިޝަންގަ އެވެ. އޮގަސްޓް 14 ވަނަ ދުވަހު ކުޅުނު މުބާރާތުގެ ސެމީ ފައިނަލުން ނިއު ބަލިވީ ޕެނަލްޓީ ޖަހައިގެންނެވެ.

މިދިޔަ ހޮނިހިރު ދުވަހު ނިއު އާއި ކްލަބް ޓީނޭކް ބައްދަލުކުރަން އޮތް ނަމަވެސް، ޓީނޭޖް ދަނޑަށް ހާޒިރު ނުވާތީ މެޗު ނުކުޅެ، ނިއު އަށް ވަނީ ތިން ޕޮއިންޓް ލިބިފަ އެވެ.

ދިވެހި ޕްރިމިއާ ލީގުން 2022 ވަނަ އަހަރު ރެލިގޭޓްވި ދަ ގްރާންޑޭ އަށް މިވަނީ މިއަހަރުގެ ދެވަނަ ޑިވިޝަންގެ ގުރޫޕް ސްޓޭޖުގެ ފުރަތަމަ ތިން މެޗުން ވެސް ބަލިވެ، ކުރިއަށް ދިޔުމުގެ ފުރުސަތު ގެއްލިފަ އެވެ. އެޓީމަށް ބާކީ އޮތީ ޓީނޭޖާ ދެކޮޅަށް ކުޅޭ މެޗެވެ.

ކޯޗު އަހުމަދު ނިމާދު (ނިމާ) ގެ އިރުޝާދުގެ ދަށުން ކުޅުނު ނިއު ފުރަތަމަ ހާފު ނިންމާލީ 23 ވަނަ މިނިޓުގައި އެޓީމުގެ އަބޫ ސަނޫނޫ ޖަހައިދިން ގޯލުން ލީޑު ހޯދައިގެންނެވެ. ދެވަނަ ހާފު ފެށިގެން މިނިޓެއް ނުވަނީސް ކޯފޫ އޮވޫސޫ ނިއު އަށް ލީޑު ފުޅާ ކޮށްދިން އިރު، އޭރިއާ ބޭރުން ފޮނުވާލި ބާރު ހަމަލާއަކުން ފަހު ލަނޑު މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައި ވަނިކޮށް ޖަހައިދިނީ އަހުމަދު އަޔާޒް (އަޔާ) އެވެ.

މި ނަތީޖާއާ އެކު ނިއު އާއި ޓެންޓް ސްޕޯޓްސް ކްލަބް ވެސް ވަނީ ގުރޫޕް ބީގައި ކުޅުނު ފުރަތަމަ ދެ މެޗުން ހަ ޕޮއިންޓް ހޯދައިފަ އެވެ. ބީޖީ ސްޕޯޓްސް ކްލަބް ތިން މެޗުން ހަ ޕޮއިންޓް ހޯދާފައި ވާއިރު ގްރާންޑޭ އާއި ޓީނޭޖަށް ޕޮއިންޓެއް ނުލިބެ އެވެ.

ބީޖީން ހަ ޕޮއިންޓް ހަމަކުރީ މިދިޔަ ބުދަ ދުވަހު 5-1 އިން ގްރާންޑޭ ބަލިކޮށްފަ އެވެ. އެ މެޗުގައި ބީޖީން ފަސް ގޯލު ވެސް ޖެހީ ފުރަތަމަ ހާފުގަ އެވެ. މެޗު ނިމެން 15 ވަރަކަށް މިނިޓަށް ވެފައި ވަނިކޮށް ގްރާންޑޭ އަށް ސުން ކަނޑުވާލައިދިނީ އިސްމާއިލް ނަޒީހް އެވެ.

ބީޖީގެ ފޯވާޑް މުޒްދާން ހަސަން ވަނީ މިމެޗުގައި ހެޓްރިކް ހަދައިފަ އެވެ. އަނެއް ދެ ލަނޑު ޖެހީ މުހައްމަދު ސަފީރާއި މުހައްމަދު ނިޝާން އެވެ.

ބުރާސްފަތި ދުވަހު ގުރޫޕް ސީގެ ކްލަބް ޕީކޭ އާއި ލޮރެންޒޯ ސްޕޯޓްސް ކްލަބް ބައްދަލުކުރި މެޗު 1-0 އިން ކާމިޔާބު ކުރީ ޕީކޭ އެވެ. އެޓީމުން ޖެހި ހަމައެކަނި ލަނޑު ދެވަނަ ހާފުގައި، ހާފުގެ މެދަކާ ހަމައިން ލިބުނު ހިލޭޖެހުމަކުން ޖަހައިދިނީ އަހުމަދު ނިޒާމް (ނިޒާމްބެ) އެވެ.

މިއީ ޕީކޭ ކުޅުނު ތިން މެޗުން ހޯދި ފުރަތަމަ މޮޅެވެ. ލޮރެންޒޯ ވެސް ވަނީ ތިން މެޗުން ތިން ޕޮއިންޓް ހޯދައިފަ އެވެ. މި ދެޓީމު ހިމެނޭ ގުރޫޕް ސީގައި ކުޅޭ ވިކްޓަރީ ސްޕޯޓްސް ކްލަބާއި ލެގޫންސް ސްޕޯޓްސް ކްލަބް ކުޅުނު ދެ މެޗު ވެސް ކާމިޔާބު ކޮށްފައި ވާއިރު، ބިސްބުރު ސްޕޯޓްސް ވަނީ ކުޅުނު ދެ މެޗުން ވެސް ބަލިވެފަ އެވެ.