މީދަލަކަށް ވިޔަސް މިވަރު ކޮށްލާކަށް ނުވާނެ

ޗައިނާގައި ކާޑު ވިއްކާ ފިހާރައެއްގައި ހުރި ހަނޑޫ ގޯންޏަކަށް އެރި، ހަނޑޫ ކާން އޮތް މީދަލަކަށް އަދަބު ދިން ގޮތުން ގިނަ ބަޔަކު ނުރުހުން ފާޅުކޮށްފި އެވެ.

މީދަލަށް އަދަބު ދިނުމަށް ފިހާރައިގެ މުވައްޒަފުން ވަނީ ޓްރޮލީއެއްގައި މީދަލުގެ ހަތަރެސްފަޔަށް ވާންކޮށް ދަމައި އެއްސުމަށް ފަހު އެސޮރުގެ ކަރުގައި ލިޔުމެއް ވެސް އަޅުވައިފަ އެވެ.

ޗައިނާގެ މައިކްރޯ-ބްލޮގިން ޕެލްޓްފޯމެއް ކަމަށްވާ ވީބޯގައި މި މީދަލުގެ ފޮޓޯތައް ޕޯސްޓްކޮށްފައިވެ އެވެ. މީދަލުގެ ކައިރީގައި ހަރުކޮށްފައިވާ ލިޔުމުގައި ވަނީ "ދުވަހަކުވެސް މިފަދަ ކަމެއް ދެން ނުކުރާނެ ކަމަށް ހުވާ ކުރަމެވެ." މިހެންނެވެ.

އެހެން ލިޔުމެއް ވެސް މީދަލުގެ ކައިރީގައި އޮތެވެ. އެ ލިޔުމުގައި ވަނީ "އަހަންނަށް ވަރަށް ގިނަ ކަންތައްތައް ކުރުމުގެ ކުޅަދާނަކަން ލިބިފައިވޭ. އެކަމަކު ތަޅައި މެރިޔަސް ހަނޑޫ ވަގަށް ނެގި ކަމަކަށް އެއްބަހެއް ނުވާނަން؛" މިހެންނެވެ.

މި މީދަލަށް ދިން އަދަބުގެ ވާހަކަ ނޫސްތަކުގައި ޖެހުމުން ގިނަ ބަޔަކު އެ މީދަލަށް ހަމްދަރުދީ ފާޅުކުރި އެވެ. މީދާ ދެކެ ރުޅި އަންނަ މީހުން މި އަދަބަށް ތާއީދުކުރި އިރު މިކަން މާ މަޖާ ކަމަކަށް ވެގެން ވެސް ބަޔަކު އުޅެ އެވެ.