އުނދަގޫ ހާލަތުގައި އޮވެ ޔޫވީ އިން މޮޅަކާ އެކު ލީގު ނިންމާލައިފި

މެޗުތަކަށް ކުޅުންތެރިން ހަމަކުރުމުގައި އުނދަގޫ ހާލަތެއްގައި އޮތް ޔުނައިޓެޑް ވިކްޓަރީ (ޔޫވީ) އިން ދިވެހި ޕްރިމިއާ ލީގުގައި އެޓީމުގެ ފަހު މެޗުގައި 4-3 އިން ބުރު ސްޕޯޓްސް ކްލަބް ބަލިކޮށްފި އެވެ.

މިއީ ޒުވާން ސްކޮޑެއް ހިމެނޭ ޔޫވީ އިން ލީގުގައި ކުޅުނު 13 މެޗުން ހޯދި ތިންވަނަ މޮޅެވެ. ހަތަރުވަނަ މޮޅަކީ ކްލަބް ގްރީން ސްޓްރީޓްސް އިން މެޗު ދޫކޮށްލުމުން އެޓީމަށް ލިބުނު މޮޅެކެވެ.

މި ނަތީޖާއާ އެކު ޔޫވީ ނިންމާލީ 12 ޕޮއިންޓާ އެކު ލީގުގެ ހަވަނައިގަ އެވެ. ބުރު ސްޕޯޓްސް ކްލަބަށް އެއް މެޗު ބާކީ އޮތްއިރު އެޓީމު އޮތީ 18 ޕޮއިންޓާ އެކު ފަސްވަނައިގަ އެވެ. އެޓީމަށް ބާކީ އޮތީ އަންގާރަ ދުވަހުގެ ރޭ މާޒިޔާ ސްޕޯޓްސްއާ ދެކޮޅަށް ކުޅޭ މެޗެވެ. އެ މެޗުން ކޮންމެ ނަތީޖާއެއް ނުކުތަސް ބުރުގެ މަގާމަށް ބަދަލެއް ނާންނާނެ އެވެ.

ގަލޮޅު ދަނޑުގައި ރޭ ކުޅުނު މެޗަކީ މިއަހަރު ޕްރިމިއާ ލީގަށް އަލަށް ޕްރޮމޯޓްވި ބުރު ސްޕޯޓްސް ކްލަބް، ތިން މަސް ފަހުން ކުޅުނު ފުރަތަމަ މެޗެވެ. ރޭގެ ކުރިން އެޓީމު އެންމެ ފަހުން ވާދަވެރި މެޗެއް ކުޅުނީ މިދިޔަ އޮގަސްޓް 29 ވަނަ ދުވަހުގެ ރޭ ލީގުގައި ޓީސީ ސްޕޯޓްސް އާ ދެކޮޅަށެވެ.

ބުރު އަަދި ޓީސީ އޮގަސްޓް މަހު ކުޅުނު މެޗަށް ފަހު ލީގު ދެ މަހަށް މެދު ކަނޑާލި ނަމަވެސް އެފްއޭއެމްގެ ވެރިންގެ މައްޗަށް ކުރެވޭ ހިޔާނާތުގެ ތުހުމަތުތަކާ ގުޅިގެން ފުލުހުން އެފްއޭއެމަށް ވަދެ ކުރިއަށް ގެންދިޔަ ތަހުގީގުތަކާ ގުޅިގެން ލީގު އަލުން ފެށުން އެފްއޭއެމުން ލަސްކުރި އެވެ.

ގާތްގަނޑަކަށް 80 ދުވަސް ފަހުން ލީގު އަލުން ފެށިއިރު ޔޫވީ އަށް އޮތީ ކުޅުންތެރިންގެ ދަތިކަން އިންތިހާއަށް ދިމާވެފަ އެވެ. އޭގެ ފަހުން އެޓީމު ކުޅެމުން އައީ ބެންޗުގައި ހަތަރު ކުޅުންތެރިން ތިއްބައިގެންނެވެ. ފުރަތަމަ 11 ގައި ހިމަނައިގެން ކުޅުވީ ފުރަތަމަ ޑިވިޝަނަށް މުޅިް އާ، 17 އަހަރުގެ ގޯލްކީޕަރު އިބްރާހިމް ފައިރޫޝް ފައިސަލް އެވެ. މިދިޔަ ހަފްތާ މާޒިޔާއާ ދެކޮޅަށް ކުޅުނު މެޗުގައި ފައިރޫޝް އަށް އަނިޔާވެގެން މެޗުގެ ފަހު 30 މިނިޓަށް ގޯލު ބެލެހެއްޓީ އެޓީމުގެ ޑިފެންޑަރު މުހައްމަދު ފާރިސް އެވެ.

އެހްނެ ނަމަވެސް ރޭގެ މެޗުގައި ބުރު ސްޕޯޓްސްއާ ދެކޮޅަށް ޔޫވީގެ ގޯލު ބެލެހެއްޓީ ޓީމުގެ ހަތަރުވަނަ ކީޕަރު އަހުމަދު އަނަފް ޒަރިޔަންދެވެ.

މެޗުގައި ފުރަތަމަ ލީޑު ނެގީ ބުރުންނެވެ. ފުރަތަމަ ހާފުގެ އިތުރު ވަގުތުގެ ތެރޭގައި ބުރަށް ލީޑު ނަގައިދިން ގޯލު ޖަހައިދިނީ މުހައްމަދު ނާއިމް އެވެ. އަދިދެވަނަ ހާފުގައި މެޗުގެ 61 ވަނަ މިނިޓުގައި މުހައްމަދު ހުޒެއިފްގެ ގޯލުން ބުރުން ލީޑު ފުޅާކުރި އެވެ.

ޔޫވީ އިން ފަރަގު ކުޑަކުރީ 70 ވަނަ މިނިޓުގައި މުހައްމަދު ފައިޒާން ފަރީން ޖަހައިދިން ގޯލުންނެވެ. މިއީ އޭނާ އޭނާ ކުޅެން ނުކުމެ ތިން މިނިޓުތެރޭ ކާމިޔާބު ކޮށްދިން ލަނޑެކެވެ. އޭގެ ހަތަރު މިނިޓު ފަހުން ޔޫވީ އިން ނަތީޖާ އެއްވަރުކުރީ ލިބުނު ޕެނަލްޓީއަކުންނެވެ. ޕެނަލްޓީ ކާމިޔާބު ކޮށްދިނީ އަރީން އަބްދުﷲ އިބްރާހިމް އެވެ.

މެޗުގެ 87 ވަނަ މިނިޓުގައި ޒުވާން ސްޓްރައިކަރު ޝަނާން ރަޝާދު ވަނީ ގޯލެއް ޖަހައި ޔޫވީ އަށް މެޗުގައި ފުރަތަމަ ފަހަރަށް ވަނީ ލީޑު ނަގައިދީފަ އެވެ. މިއީ އުމުރުން 18 އަހަރުގެ ސްޓްރައިކަރު ލީގުގައި ކުޅުނު 13 މެޗުން ޖަހައިދިން ހަތްވަނަ ގޯލެވެ.

ޝަނާން ވަނީ ބުރާ ދެކޮޅަށް ކުޅުނު ދެ މެޗުގެ އިތުރުން، ކްލަބް ވެލެންސިއާ އާއި ކްލަބް އީގަލްސްއާ ދެކޮޅަށް ކުޅުނު މެޗުތަކުގައި ވެސް ގޯލު ޖަހައިފަ އެވެ. އަދި ލީގުގައި ފުރަތަމަ ގޯލު މާޒިޔާ ކޮޅަށް ޖަހާފައި ވަނީ އޭނާގެ އުމުރުން 17 އަހަރުގަ އެވެ.

މެޗުގެ ފުރިހަމަ ވަގުތު ހަމަވެގެން ކުޅުނު އިތުރު ވަގުތުގެ ފުރަތަމަ މިނިޓުގައި ނާއިމް ވަނީ އިތުރު ގޯލެއް ޖަހައި ބުރަށް ނަތީޖާ ހަމަހަމަ ކޮށްދީފަ އެވެ. އޭގެ ދެ މިނިޓު ފަހުން ބުރުގެ އިބްރާހިމް އުސާމާ ހަސަން މަޖީދަށް ދެވަނަ ރީނދޫ ކާޑަކާ އެކު ރަތް ކާޑެއް ދެއްކުމުން އެޓީމުން އެކަކު މަދުކޮށް ކުޅެނިކޮށް، އިތުރު ވަގުތުގެ ފަސްވަނަ މިނިޓުގައި ޔޫވީ މޮޅުކޮށްދިން ގޯލު ޖެހީ، މޮޅު ކުޅުންތެރިއަކަށް ވެސް ހޮވުނު ލޫތު އިބްރާހިމް އެވެ.