Roadha Mihaaru
ބޮއްސުންލާފައިވާ އެފްއޭއެމްގެ އާ ޖީއެސްއަކަށް ޖައުޝަން

ބޮއްސުންލާފައިވާ އެފްއޭއެމްގެ އާ ޖީއެސް އަކަށް ޖައުޝަން

27 ނޮވެމްބަރ 2023

ހިންގުން ބޮއްސުންލާފައިވާ، އެފްއޭއެމްގެ އާ ޖެނެރަލް ސެކްރެޓަރީއަކަށް، އެ އެސޯސިއޭޝަންގެ ލީގަލް ޑައިރެކްޓާގެ މަގާމުގައި ހުންނެވި މުހައްމަދު ޖައުޝަން ޝަރީފް ހަމަޖައްސައިފި އެވެ.

ހުސެއިން ހަބީބް ހުސެއިން ހަބީބް

ހިންގުން ބޮއްސުންލާފައިވާ، އެފްއޭއެމްގެ އާ ޖެނެރަލް ސެކްރެޓަރީއަކަށް، އެ އެސޯސިއޭޝަންގެ ލީގަލް ޑައިރެކްޓާގެ މަގާމުގައި ހުންނެވި މުހައްމަދު ޖައުޝަން ޝަރީފް ހަމަޖައްސައިފި އެވެ.

ގާތްގަނޑަކަށް މިދިޔަ އަށެއްކަ އަހަރު، ޖެނެރަލް ސެކްރެޓަރީގެ މަގާމުގައި ހުންނެވި ހުސައިން ޖަވާޒު، މިއަދު ވަނީ އެ މަގާމުން އިސްތިއުފާ ދީފަ އެވެ.

އެފްއޭއެމްގެ އިދާރީ ހިންގުމުގެ އެންމެ އިސް މަގާމަށް މީހަކު އައްޔަން ކުރަންޖެހޭނީ އެ އެސޯސިއޭޝަނުގެ ރައީސް އަށް ފެންނަ ނަމެއް އެކްސްކޯ އަށް ހުށަހަޅައި، އެ ނަމަކަށް އެކްސްކޯއިން ރުހުން ލިބިއްޖެނަމަ އެވެ.

އެ އިދާރާގެ ރައީސް ބައްސާމް އަދީލް ޖަލީލް، އެ އެސޯސިއޭޝަނުގެ ވައިބާ ގުރޫޕަށް މިރޭ ފޮނުވި މެސެޖުގައި ވިދާޅުވި ގޮތުގައި ޖެނަރަލް ސެކްރެޓަރީގެ މަގަށް ޖައުޝަން އައްޔަން ކުރީ އެކްސްކޯގެ ފުރިހަމަ އަގުލަބިއްޔަތާ އެކު އެވެ.

އޭގެ ކުރިން މީޑީއާ އަށް ބައްސާމް ފޮނުއްވި މެސެޖްގައި އޭނާ ވަނީ ޖަވާގެ އިސްތިއުފާ ގަބޫލުކުރިކަން ހާމަކޮށްފަ އެވެ. ބައްސާމް ވިދާޅުވީ ފުޓްބޯޅަ އަށް ޖަވާޒުކޮށްދެއްވީ އަގުހުރި ހިދުމަތްތަކެކެވެ.

ޖައުޝަން އާއި ޖަވާޒު: ޖަވާޒު ވަނީ އަށް އަހަރަށް ފަހު މަގާމުން އިސްތިއުފާ ދީފަ --- ފައިލް ފޮޓޯ: ފަޔާޒު މޫސާ | މިހާރު

ޖައުޝަން އާއި ޖަވާޒު: ޖަވާޒު ވަނީ އަށް އަހަރަށް ފަހު މަގާމުން އިސްތިއުފާ ދީފަ --- ފައިލް ފޮޓޯ: ފަޔާޒު މޫސާ | މިހާރު

ކުޅިވަރުގެ ގާނޫނީ ރޮނގުން މާސްޓާސް ޑިގްރީ ހާސިލު ކުރި ޖައުޝަން އަކީ އޭއެފްސީ ލީގަލް ކޮމިޓީގެ މެންބަރުކެވެ. އެޑްމިނިސްޓްރޭޓާއެއްގެ ގޮތުގައި 2007 ގައި އެފްއޭއެމްއާ ގުޅުނު ޖައިޝަން އަކީ ނިޔޭގެ އެންޓި ޑޯޕިން އެޖެންސީ އިން އޭޝިއާ އަދި އޯޝޭނިއާ ސަރަހައްދުގެ ސެންޓްރަލް ރިޒަލްޓް މެނޭޖްމަންޓް ޕެނަލްގެ މެންބަރެއްވެ މެއެވެ.

ހޭންޑްބޯލް އެސޯސިއޭޝަންގެ މިދިޔަ ދައުރުގައި ޖެނަރަލް ސެކްރެޓަރީކަން ވެސް ކުރެއްވި ޖައުޝަން، އެފްއޭއެމްގެ ޖެނަރަލް ސެކްރެޓަރީކަމަށް އައްޔަން ކުރުމުން، "މިހާރު" އަށް އޭނާ ވިދާޅުވީ މުހިންމު މަސައްކަތުގައި އެއްބާރުލުން ދެއްވުމަށް އެދޭ ކަމަށެވެ.

"ފުޓްބޯޅައިގެ ކުރިއެރުމަށް ކުރާ މި މުހިންމު މަސައްކަތްުގައި ތިޔަ ބޭފުޅުންގެ އެއްބާރުލުމާއި ހިތްވަރު އަޅުގަނޑަށް ލިބޭނެކަމަށް އުންމީދުކުރަން،" ދިވެހި ފުޓްބޯޅަ ލެޖެންޑް އިބްރާހިމް ޝަރީފް (ގަރޭ) ގެ ދަރިފުޅު ޖައުޝަން ފޮނުވި މެސެޖުގައި ވެއެވެ.

ޖައުޝަން އަށް އޮތީ އުނދަގޫ ޓާސްކެކެވެ. ގިނަ ދުވަސްތަކެއް ވަންދެން މުސާރަ ނުދޭތީ، އެފްއޭއެމްގެ ގިނަ މުވައްޒަފުން މަސައްކަތަކަށް ނުނިކުމެ އެވެ. ޖަވާ ވެސް މަގާމުން އިސްތިއުފާ ދިން އިރު އޭނާ އަށް ވެސް ހަ މަހުގެ މުސާރައެއް ނުދެ އެވެ. ލީގު މެޗުތައް ކުރިއަށް ދިއުން ފިޔަވައި ފުޓްބޯޅައިގައި ހިނގަހިނގާ ހުރި މަސައްކަތެއް މިހާރު ނެތެވެ.