ވަޒީރުކަމަށް އައްޔަންކުރާ މަޖިލިސް މެމްބަރުން އިސްތިއުފާ ދެއްވަން ފައްޓަވައިފި

ރައީސް ޑރ. މުހައްމަދު މުއިއްޒުގެ ވަޒީރުންގެ މަޖިލީހުގައި ހިމެނިވަޑައިގަންނަވާ ރައްޔިތުންގެ މަޖިލީހުގެ މެމްބަރުން އިސްތިއުފާ ދެއްވަން ފައްޓަވައިފި އެވެ.

ރައީސް ޑރ. މުހައްމަދު މުއިއްޒު މިއަދު ހަވީރު މަގާމުގެ ހުވާ ކުރައްވައި، އެ މަނިކުފާނު ވަޒީރުންގެ މަޖިލީހުގެ 22 މެމްބަރުން މިރޭ ރައީސް އޮފީހުގައި ބާއްވާ ރަސްމިއްޔާތެއްގައި މަގާމުގެ ހުވާ ކުރައްވާނެ އެވެ.

ޕީޕީއެމް/ޕީއެންސީ ތަމްސީލު ކުރައްވާ މެމްބަރުންގެ ތެރެއިން، މަޑުއްވަރީ ދާއިރާގެ މެމްބަރު އާދަމް ޝަރީފާއި، މާވަށު ދާއިރާގެ މެމްބަރު މުހައްމަދު ސައީދާއި، ނައިފަރު ދާއިރާގެ މެމްބަރު އަހުމަދު ޝިޔާމްގެ އިތުރުން ގުރައިދޫ ދާއިރާގެ މެމްބަރު މުހައްމަދު ޣައްސާން މައުމޫން މިރޭ އާ ރައީސްގެ ކެބިނެޓަށް އައްޔަނުކުރައްވާނެ ކަމަށް ވަނީ މައުލޫމާތު ލިބިފަ އެވެ.

މީގެއިތުރުން، ސަރުކާރު ކޯލިޝަންގައި ހިމެނޭ ޕީއެންސީ ތަމްސީލު ކުރައްވާ ވިލިމާލެ ދާއިރާގެ މެމްބަރު އަހުމަދު އުޝާމް ވަނީ ދައުލަތުގެ އާ ބަންޑާރަ ނައިބުގެ މަގާމަށް އައްޔަނު ކުރައްވާނެ ކަމަށް ބެލެވޭ އިރު، އޭނާ ވަނީ މެމްބަރު ކަމުން އިސްތިއުފާ ދެއްވި ސިޓީ މަޖިލީހުގެ ރައީސަށް ފޮނުއްވައިފަ އެވެ.

އުޝާމްގެ އިތުރުން، އާދަމް ޝަރީފް ވެސް ވަނީ މެމްބަރުން ކަމުން އިސްތިއުފާ ދެއްވި ކަން މަޖިލީހުގެ ރައީސަށް އަންގަވައިފަ އެވެ.

އެ ފަސް ބޭފުޅުންގެ އިތުރުން، މިއަދު ނައިބު ރައީސް ކަމުގެ ހުވާ ކުރެއްވި ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް ވެސް މީގެ ކުރިން ވަނީ މެމްބަރުކަމުން އިސްތިއުފާ ދެއްވައިފަ އެވެ.

މަޖިލީހުގައި މިހާރު ވެރިކަމުގައި އޮތް ޕީޕީއެމް/ޕީއެންސީ ތަމްސީލު ކުރައްވާނީ އެންމެ ހަތަރު މެމްބަރުންނެވެ. ނަމަވެސް، އޭގެ ތެރެއިން، ފެލިދޫ ދާއިރާގެ މެމްބަރު އިބްރާހިމް ފަޒުލް ރަޝީދު، އާބަންކޯގެ އެމްޑީ ކަމަށް އައްޔަނުކުރާނެ ކަމަށް މައުލޫމާތު ލިބިފައިވެ އެވެ.

އާ ސަރުކާރާ އެކު މަޖިލީހުގެ ގިނަ މެމްބަރުންތަކެއް އިސްތިއުފާ ދެއްވި ނަމަވެސް، އެ ދާއިރާތަކުގެ ބައި-އިލެކްޝަނެއް ނޯންނާނެ އެވެ.

ގާނޫނުއަސާސީގެ 78 ވަނަ މާއްދާގައި ބުނާ ގޮތުން މެންބަރަކު ވަކިވުމުގެ ސަބަބުން ހުސްވާ ގޮނޑި އަށް އެ ގޮނޑި ހުސްވި ތާރީހުން ފެށިގެން 60 ދުވަހުގެ ތެރޭގައި މެންބަރަކު އިންތިހާބު ކުރަން ޖެހޭނެ އެވެ.

ނަމަވެސް މެންބަރެއްގެ ގޮނޑި ހުސްވާ ތާރީހާއި ރައްޔިތުންގެ މަޖިލީހުގެ އިންތިހާބާ ދެމެދު ހަ މަސް ނުވަތަ އެއަށް ވުރެ ކުރު މުއްދަތެއް އޮތް ނަމަ އެ ގޮނޑިއަކަށް މެންބަރަކު އިންތިހާބު ކުރާކަށް ނުޖެހެ އެވެ.

ރައްޔިތުންގެ މަޖިލީހުގެ އިންތިހާބު އަންނަ އަހަރު ކުރީކޮޅު ބާއްވާނެ އެވެ.