ނަޝީދުގެ މައްސަލަ ކުރިއަށް ގެންދަން މިއަދު އިތުރު ޖަލްސާއެއް!

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް ހުށަހަހަޅާފައިވާ ގަރާރު ކުރިއަށް ގެންދިއުމަށް މިއަދު ހަވީރަށް އިތުރު ޖަލްސާއެއް ތާވަލްކޮށްފި އެވެ.

އަމީންއާންމު ތާވަލްކުރެއްވި މި ޖަލްސާގައި އެޖެންޑާގައި އޮތީ އެ މައްސަލަ ކުރިއަށް ގެންދިއުން އެކަންޏެވެ.

މިއަދު ހެނދުނު 11:00 އަށް ވެސް އެ މައްސަލައިގެ ޖަލްސާއެއް އެޖެންޑާކުރި ނަމަވެސް، އެކި ފަހަރުމަތީން މެދުކަނޑާލައިގެން އަލުން ކުރިއަށް ނުގެންދެވުމުން ޖަލްސާ ވަނީ ނިންމާލައިފަ އެވެ. ޖަލްސާ ނިންމާލީ ޑިމޮކްރެޓްސްގެ މެންބަރުން އިސްވެ ތިބެ މަޖިލީހުގެ މުޅި ނިޒާމު ނަގާލުމާ ގުޅިގެންނެވެ.

މަޖިލީހުގެ ނައިބު ރައީސް އީވާ އަބްދުﷲ ރިޔާސަތުގައި އިންނަވައިގެން ކުރިއަށް ގެންދިޔަ އެ ޖަލްސާގައި މެންބަރުން ގެންދެވީ ރިޔާސަތުން އީވާ ފޭބުމަށް އަޑުގަދަ ކުރައްވައި ނިޒާމީ ނުކުތާ ނަންގަވަމުންނެވެ. ނަމަވެސް އީވާ ވަނީ ރިޔާސަތުން ދުރުވުމަށް ދެކޮޅު ހައްދަވައިފަ އެވެ.

މަޖިލީހުގެ އާންމު ކޮމިޓީން ވަނީ އެޓާނީ ޖެނަރަލް އިބްރާހިމް ރިފްއަތު ދެއްވި ލަފައާ އެއްގޮތަށް މަޖިލިސް ކުރިޔަށް ގެންދަން އަމީންއާންމަށް ލަފާ އަރުވަން ފާސްކޮށްފަ އެވެ. އެ ލަފާގައި ބުނާ ގޮތުން ނަޝީދުގެ ނުފޫޒު އޮންނަ މެންބަރުންނަކަށް ރިޔާސަތުގައި ނީނދެވޭނެ އެވެ.

އެކަމާ ގުޅިގެން މިއަދު ކުރިއަށް ދިޔަ ޖަލްސާގައި އީވާ ރިޔާސަތުން ފޭބުމަށް އަމީންއާންމު ލަފާ ދެއްވިނަމަވެސް، އެކަމަށް އީވާ ދެކޮޅު ހެއްދެވި ކަމަށް މެންބަރުން ބުނެ އެވެ.

އެ ޖަލްސާ ނިންމާލުމަށް ފަހު އީވާ އަދިވެސް އިންނެވީ މަޖިލިސް ރައީސްގެ ގޮނޑިކޮޅުގަ އެވެ.