މަޖިލީހުގެ ނައިބު ރައީސްގެ މަގާމުން އީވާ ވަކިކުރަން ގަރާރު ހުށަހަޅައިފި

ރައްޔިތުންގެ މަޖިލީހުގެ 50 މެންބަރުންގެ ސޮޔާ އެކު، މަޖިލީހުގެ ނައިބު ރައީސް އީވާ އަބްދުﷲ އެ މަގާމުން ވަކިކުރަން ގަރާރު ހުށަހަޅައިފި އެވެ. އެމްޑީޕީ ޕާލިމެންޓަރީ ގުރޫޕުން ހުށަހަޅާފައިވާ ގަރާރުގައި އެމްޑީޕީގެ 49 މެންބަރުންގެ އިތުރުން މިނިވަން މެންބަރެއް ކަމަށް ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ ވަނީ ސޮއިކުރައްވައިފަ އެވެ.

މަޖިލީހަށް މިއަދު ހުށަހެޅި ގަރާރުގައި ބުނެފައިވާ ގޮތުގައި، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ގެންދިއުމަށް ހުރަސް އެޅުމަށް އީވާ ގެންދަވަނީ އެކި ގޮތް ގޮތުން ނުފޫޒު ފޯރުވައި އަމިއްލަ މަސްލަހަތު އިސްކުރައްވަމުންނެވެ.

އަދި ގަސްތުގައި ގަވައިދާ ހިލާފަށް އެތައް ފަހަރެއްގެ މަތީން އަމަލުކޮށްފައިވާ ކަމަށް ތުހުމަތުކޮށްފައިވެ އެވެ.

ގަރާރުގައި ބުނެފައިވާ ގޮތުގައި އީވާ އާއި ނަޝީދަކީ ދެބެންދެދަރި ބޭފުޅުން ކަމަށްވީއިރު، ނަޝީދުގެ މައްސަލައިން ތަނާޒުލުވާން ދެކޮޅު ހައްދަވާފައިވަނީ ގާނޫނު އަސާސީގެ 75 ވަނަ މާއްދާއާ ކަނޑައެޅިގެން ހިލާފަށެވެ.

އީވާ އެ މަގާމަށް އިންތިހާބުކުރީ އެމްޑީޕީ ޓިކެޓުގައި ކަން ފާހަގަކޮށް، އިންތިހާބު ވެއްޖެނަމަ އެމްޑީޕީގައި ދެމިހުންނާނެ ކަމަށް އިގްރާރެއްގައި ސޮއިކޮށްފައިވީނަމަވެސް، އަމިއްލައަށް އެދިގެން ޕާޓީއިން ވަކިވެވެފައިވާތީ އެ އިގުރާރާ ވެސް ހިލާފުވެފައިވާ ކަމަށް ފާހަގަކޮށްފައިވެ އެވެ.

ނަޝީދު މަގާމުން ވަކިކުރަން އެމްޑީޕީގެ 49 މެމްބަރުންގެ ސޮޔާ އެކު ހުށަހަޅާފައިވާ ގަރާރު ފަސް ފަހަރެއްގެ މަތިން އެޖެންޑާކޮށްގެން ވެސް ކުރިއަށް ނުގެންދެވުނީ އީވާ އާލާސްކަންފުޅާ އުޅުއްވާ ކަމަށް ވިދާޅުވެ އެ ޖަލްސާތަކަށް ސަލާން ފޮނުއްވުމުންނެވެ. އޭރު މަޖިލީހުގެ އިދާރާއިން ނިންމާފައި އޮތީ، މަޖިލީހުގެ ގަވާއިދުގައި ބުނެފައިވާ ގޮތަށް، މަޖިލީހުގެ ރައީސްގެ މަގާމުން ވަކި ކުރުމުގެ ގަރާރެއް ކުރިއަށްދާ ޖަލްސާގެ ރިޔާސަތު އިންނަވާނީ މަޖިލީހުގެ ނައިބު ރައީސް ކަމަށެވެ. އެކަމާ ހިތްހަމަނުޖެހިގެން، ގަވާއިދު މާނަކޮށްދޭން އެމްޑީޕީން ސުޕްރީމް ކޯޓަށް ހުށަހެޅި ދުސްތޫރީ މައްސަލާގައި މިދިޔަ ބުރާސްފަތި ދުވަހު ކުރި ހުކުމްގައި ވަނީ އީވާ ނެތަސް ރިޔާސަތު ބެލެހެއްޓޭނެ ކަމަށް ގަވާއިދުގެ ދަށުން ކަނޑައަޅާފައިވާ މެމްބަރުންނަށް އެފަދަ ޖަލްސާއެއްގެ ރިޔާސަތު ވެސް ބެލެހެއްޓޭނެ ކަމަށެވެ.

އެހެންނަމަވެސް މިއަދު ތާވަލްކުރި ޖަލްސާގައި އެހެން މެންބަރަކު ރިޔާސަތު ބެލެހެއްޓިޔަ ނުދިނުމަށް އީވާ ރިޔާސަތުން ފައިބައިވަޑައިގަންނަވަން ދެކޮޅު ހައްދަވައިގެން އިންނެވި ކަމަށް މެންބަރުން ތުހުމަތު ކުރެ އެވެ.