އަޅުގަނޑު އިންދާ އެހެން މެންބަރަކާ ރިޔާސަތު ހަވާލުކޮށްފި ނަމަ އަމީންއާންމު ގާނޫނާ ހިލާފުވާނެ: އީވާ

ރައްޔިތުންގެ މަޖިލީހުގެ ނައިބު ރައީސް އިވާ އަބްދުﷲ ރިޔާސަތު ބަލަހައްޓަވަމުން ގެންދަވަނިކޮށް އެހެން ބޭފުޅަކާ ރިޔާސަތު ހަވާލުކޮށްފި ނަމަ މަޖިލީހުގެ އަމީންއާންމު ފާތިމަތު ނިއުޝާ ގާނޫނުއަސާސީ އާއި ސުޕްރީމް ކޯޓުގެ ހުކުމާ ވެސް ހިލާފުވާނެ ކަމަށް އީވާ ވިދާޅުވެއްޖެ އެވެ.

މަޖިލީހުގައި ނަޝީދުގެ އިތުބާރު ނެތް މައްސަލަ ކުރިޔަށް ގެންދިޔުމަށް މިއަދު 11:00 ގައި ޖަލްސާއެއް އެޖެންޑާ ކުރި ނަމަވެސް ރިޔާސަތުގައި އީވާ އިންނަވައި އެ ޖަލްސާ ކުރިޔަށް ގެންދަން ފުރުސަތު ނުދެއްވި އެވެ.

އެކަމާ ގުޅޭ ގޮތުން އެމްޑީޕީގެ މެންބަރުން ކަންބޮޑުވުން ފާޅުކުރަމުން ދިޔައިރު ނިއުޝާ ދިޔައީ އީވާއާ ވާހަކަ ދައްކަވައިގެން މައްސަލަ ހައްލުކުރުމަށް މަސައްކަތް ކުރައްވަމުންނެވެ.

ނަމަވެސް ރިޔާސަތުން ތެދުވެވަޑައިގަތުމަށް އިންކާރުކުރައްވައި، ޖަލްސާ ކުރިޔަށް ގެންދިޔަ ނުދީ ހިފަހައްޓަނިކޮށް މަޖިލީހުން މިއަދު ހަވީރު 4:00 އަށް ވެސް ވަނީ ނަޝީދުގެ އިތުބާރު ނެތް މައްސަލަ ކުރިޔަށް ގެންދަން އިތުރު ޖަލްސާއެއް އެޖެންޑާކޮށްފަ އެވެ.

އެ މައްސަލާގައި ނިއުޝާ އަށް އީވާ ފޮނުއްވި ސިޓީއެއްގައި ވިދާޅުވީ އެމްޑީޕީން ހުށަހަޅާފައިވާ ގަރާރަކީ ޝަރުތު ފުރިހަމަ ނުވާ ގަރާރެއް ކަމަށްވާތީ ރިޔާސަތުން އިއްޔެ އެ މައްސަލަ ބޭރު ކޮށްލާފައިވާ ކަމަށެވެ.

އެހެންވެ ނަޝީދު މަގާމުން ވަކި ކުރުމުގެ މައްސަލައެއް މިހާރު މަޖިލީހުގެ ނިޒާމުގެ ތެރޭގައި ނުވާ ކަމަށާއި އެ ނިންމުން ނަފީކޮށް އަމީންއާންމު އެހެން ގޮތަކަށް އެ ނިންމުން މާނަ ކުރައްވައި އަލުން ޖަލްސާ އަށް ގޮވާލުމުގެ ބާރު އަމީންއާމަށް ލިބިވަޑައިނުގަންނަވާ ކަމަށް އީވާ ވިދާޅުވި އެވެ.

ސުޕްރީމް ކޯޓުގެ ހުކުމުގައިވާ ގޮތުން ވެސް 44 ވަނަ މާއްދާގެ ބޭނުން ހިފައިގެން އެހެން ބޭފުޅަކަށް މަޖިލީހުގެ ރިޔާސަތު ބެލެހެއްޓުން ހަވާލު ކުރެވޭނީ ހަމައެކަނި ނައިބު ރައީސް އުޒުރުވެރިވާ ހާލަތެއްގައި ކަމަށް އީވާ ވިދާޅުވި އެވެ.

ނަމަވެސް ސުޕްރީމް ކޯޓުގެ ހުކުމުގެ ތަރަހައިން ބޭރުވެ، މަޖިލީހުގެ ނައިބު ރައީސް އުޒުރުވެރި ނުވާ ހާލަތެއްގައި ރިޔާސަތު ބަލަހައްޓަން އެހެން މެންބަރަކު ކަނޑައެޅުމުގެ އެއްވެސް ބާރެއް ވެސް އަމީންއާންމަަށް ލިބިގެން ނުވާ ކަމަށް އީވާ ވިދާޅުވި އެވެ.

އީވާ ރިޔާސަތު ބެލެހެއްޓުމުން މިއަވުގަށް އެއްފަރާތް ވުމަށް މަޖިލީހުގެ އަމީންއާންމު އެދިވަޑައިގަންނަވަނީ އެޓާނީ ޖެނަރަލް އިބްރާހިމް ރިފްއަތު ދެއްވި ލަފައެއް މަޖިލީހުގެ އާންމު ކޮމިޓީން ފާސްކޮށްފައިވާތީ އެވެ. އެ ލަފާގައި ބުނާ ގޮތުން ނަޝީދުގެ މަސްލަހަތު އޮންނަ އެއްވެސް ބޭފުޅަކަށް ރިޔާސަތުގައި ނުހުންނެވޭނެ އެވެ.

ނަމަވެސް އީވާ ވިދާޅުވި ގޮތުގައި މަޖިލީހުގެ ކަންކަމުގައި ގާނޫނީ ލަފާ އަރުވާނީ މަޖިލީހުގެ ކައުންސިލް ޖެނަރަލް އެވެ. އޭޖީ ފަނޑިޔާރު މަޖިލީހުގައި ލަފާ އެރުވިޔަސް މަޖިލީހަށް އެއްވެސް ލަފައެއް ދިނުމުގެ ގާނޫނު ތަން ނުދޭ ކަމަށް އިވާ ވިދާޅުވި އެވެ.