މާހިރާ ހާން ކައިވެނިކޮށްފި

ކުރިން ބޮލީވުޑްގައި ވެސް މަސައްކަތް ކުރި ޕާކިސްތާނުގެ މަޝްހޫރު ތަރި، މާހިރާ ހާން އޭނާގެ ގިނަ ދުވަސްވީ ލޯބިވެރިޔާއާ ކައިވެނިކޮށްފި އެވެ.

މިދިޔަ އާދިއްތަ ދުވަހު މާހިރާ ކައިވެނިކުރީ އޭނާ މިދިޔަ ފަސް އަހަރު ލޯބީގެ ގޮތުން ގުޅިގެން އުޅުނު ޕާކިސްތާނުގެ ވިޔަފާރިވެރިޔާ ސާލިމް ކަރީމްއާ އެވެ. މިއީ މާހިރާގެ ދެވަނަ ކައިވެންޏެވެ.

މާހިރާ އެންމެ ފުރަތަމަ މަޝްހޫރުވީ ޕާކިސްތާނުގެ ޑްރާމާ ސިލްސިލާ "ހަމްސަފަރު" އިންނެވެ. އަދި 2017 ވަނަ އަހަރު ޝާހްރުކް ހާންއާ އެކު ކުޅުނު ބޮލީވުޑްގެ ފިލްމު "ރައީސް" އަށް ފަހު ގިނަ ބަޔަކު ދަންނަ މޫނަކަށް އޭނާ ވި އެވެ.

މާހިރާ ކައިވެނި ކުރި ކަން އެނގުނީ އޭނާގެ މެނޭޖަރު ސޯޝަލް މީޑިއާގައި އިއްޔެ އާންމުކުރި ވީޑިއޯއަކުންނެވެ.

ސާލިމްއާ ރައްޓެހިވެގެން އުޅޭ ކަމަށް މާހިރާ އެންމެ ފުރަތަމަ ބުނީ 2020 ވަނަ އަހަރު ޕާކިސްތާނުގެ ޓީވީ ޝޯއެއްގަ އެވެ. އަދި ފަހުން އިންސްޓަގްރާމް ލައިވްއެއްގައި ވެސް އެ ދެމީހުންގެ ގުޅުމާ ބެހޭ ގޮތުން ފޭނުންނާ ގިނަ ވާހަކަތަކެއް ދެއްކި އެވެ.

މާހިރާ ކުރިން ކައިވެނިކޮށްގެން އުޅުނީ އަލީ އަކްސަރުއާ އެވެ. އެމީހުން ކައިވެނިކުރީ 2007 ވަނަ އަހަރުގަ އެވެ. އެ ކައިވެނި 2015 ވަނަ އަހަރު ރޫޅުނުއިރު، އެ މީހުންގެ ކައިވެންޏަށް ފިރިހެން ކުއްޖަކު ވެސް ހުރެ އެވެ. އެ ކުއްޖާގެ އުމުރުން މިހާރު 14 އަހަރެވެ.