ފައިސަލް ގާފަރަށް ވަޑައިގަތުމުން މަރުހަބާ ކިޔަން ގިނަ ބަޔަކު ނުކުމެއްޖެ

ނައިބު ރައީސް ފައިސަލް ނަސީމް އިއްޔެ ކ. ގާފަރަށް ވަޑައިގަތުމުން އެ މަނިކުފާނަށް މަރުހަބާ ކިޔަން ގިނަ ބަޔަކު ނުކުމެއްޖެ އެވެ.

ފައިސަލް ގާފަރަށް ވަޑައިގަތީ އެ ރަށު ކައުންސިލުގެ 8 ވަނަ ގުރުއާން މުބާރާތުގެ ނަތީޖާ ފާޅުކުރުމުގެ ރަސްމިއްޔާތު ޝަރަފުވެރި ކޮށްދެއްވުމަށެވެ.

ގާފަރަކީ ފައިސަލް ކުރިން ރައްޔިތުންގެ މަޖިލީހުގެ މެމްބަރުކަން ކުރެއްވި ކާށިދޫ ދާއިރާގެ ރަށެކެވެ. އެހެންވެ، އޭރުއްސުރެ އެ ރަށާއި ފައިސަލްގެ ގާތް ގުޅުމެއް އަބަދުވެސް އޮވެ އެވެ. ފައިސަލަކީ އިޖުތިމާއީ އެކި ކަންކަމުގައި އުޅުއްވާ ބޭފުޅަކަށް ވެސް ވާތީ ދާއިރާގެ ރައްޔިތުންގެ ހިތުގައި އެ މަނިކުފާނަށް ހާއްސަ ލޯތްބެއް އޮވެ އެވެ. ކާށިދު އާއި ގާފަރަށް ވެސް ފައިސަލް ވަނީ ގިނަ ކަންތައްތަކެއް ކޮށްދެއްވައިފަ އެވެ.

ފައިސަލަށް މަރުހަބާ ކިޔަން ގާފަރުން ގިނަ ބަޔަކު އިއްޔެ ބަނދަރު ސަރަހައްދަށް ނުކުތީ ވެސް އެ ގާތް ގުޅުމުގެ ސަބަބުން ކަމަށް އެ މަނިކުފާނާ ގާތް ބޭފުޅަކު ވިދާޅުވި އެވެ.

"އެ ގުޅުމުގެ ސަބަބުން ކަމަށް ބެލެވެނީ މިހާ ގިނަ ބަޔަކު ނުކުތީ. 250 އެއްހާ މީހުން ސަލާންކުރަން ނުކުމެ ތިބި،" އޭނާ ވިދާޅުވި އެވެ.

ރައީސް އިބްރާހިމް މުހައްމަދު ސޯލިހު ދެ ވަނަ ދައުރަކަށް ވާދަކުރައްވާއިރު، ދެ ވަަނަ ދައުރެއްގައި ވެސް އެ މަނިކުފާނުގެ ރަނިންމޭޓެއްގެ ގޮތުގައި ވާދަކުރެއްވުމުގެ ޝައުގުވެރިން ފައިސަލް ފާޅުކުރެއްވި އެވެ. ނަމަވެސް، ފަހުން ރައީސް ނިންމެވީ އެމްޑީޕީގެ ޕާލަމެންޓްރީ ގުރޫޕްގެ ލީޑަރު މުހައްމަދު އަސްލަމް ރަނިންމޭޓަކަށް ހަމަޖައްސަވާށެވެ.

ފައިސަލް ފަހުން ވިދާޅުވެފައި ވަނީ އެ މަނިކުފާނު އިސްކުރައްވާނީ ގައުމަށް ފައިދާ ހުރި ގޮތެއް ކަމަށެވެ. އަދި އޭގެ ފަހުން ސިޔާސީ މަސައްކަތްތަކުން އެހާ ބޮޑަށް ފައިސަލް ނުފެނެ އެވެ.