އިންޑިއާގައި ކޮވިޑް ވެކްސިން އުފެއްދި ގޮތުގެ މައްޗަށް ހެދި ފިލްމުގެ ޓްރެއިލާ ނެރެފި

އިންޑިއާގައި ކޮވިޑް ވެކްސިން (ކޯވެކްސިން) އުފެއްދި ގޮތުގެ މައްޗަށް ހެދި ފިލްމު "ދަ ވެކްސިން ވޯ"ގެ ޓްރެއިލާ ނެރެފި އެވެ.

ހަގީގީ ހާދިސާއެއްގެ މައްޗަށް ބިނާކޮށް ގެނެސްދޭ މި ފިލްމުގެ ޓްރެއިލާ ނެރުނީ މިދިޔަ އަންގާރަ ދުވަހެވެ.

"ދަ ވެކްސިން ވޯ" އަކީ މިދިޔަ އަހަރު ނުކުތް ބޮކްސް އޮފީހުގައި ކާމިޔާބު ފިލްމު "ދަ ކަޝްމީރު ފައިލްސް"ގެ ޑައިރެކްޓަރު ވިވެކް އަގްނިހޯތުރީގެ ފިލްމެކެވެ. މި ފިލްމުގައި ވެސް ލީޑު ރޯލުތައް ކުޅެނީ "ދަ ކަޝްމީރު ފައިލްސް"ގައި އުޅުނު އަނުޕާމް ކޭރު އާއި ޕައްލަވީ ޖޯޝީ އެވެ.

މުހިންމު ރޯލުތަކުން ނާނާ ޕަޓޭކަރާއި ސަޕްތަމީ ގޯޑާ އާއި ރައިމާ ސެން އަދި ޕަރިތޯޝް ސާންދު ވެސް ފެންނާނެ އެވެ.

ޑައިރެކްޓަރު ވިވެކް ބުނި ގޮތުގައި، މި ފިލްމުގައި ދައްކާނީ ކޮވިޑް ވެކްސިން އުފައްދަން އިންޑިއާގެ ސައިންސްވެރިން ކުރި ބުރަ މަސައްކަތެވެ.

މި ފިލްމު ސިނަމާތަކުގައި ދައްކަން ފަށަނީ މި މަހު 28 ގަ އެވެ.