ޓިކެޓް ނަގާނެ ފައިސާ އެފްއޭއެމްގައި ނެތް، މާދަމާ ފަށާ ކޮލިފައިން މުބާރާތުން ޒުވާން ޓީމު ވަކިވެއްޖެ

މާދަމާ ފަށާ، އޭއެފްސީ 23 އަހަރުންދަށުގެ މުބާރާތުގެ ކޮލިފައިންގައި ޗައިނާ އަށް ދާން ގައުމީ ޓީމަށް ނުފިރި މުބާރާތުން ވަކިވާން ޖެހިއްޖެ އެވެ.

ރާއްޖެ ހިމެނޭ ގުރޫޕްގެ ކޮލިފައިން އޮންނާނީ ޗައިނާގަ އެވެ. "މިހާރު" އާ ވާހަކަ ދެއްކި އެ ޓީމުގެ ބައެއް ކުޅުންތެރިން ބުނީ، މިހާރު ކޮލިފައިންގައި ބައިވެރިނުވާން އެފްއޭއެމުން ނިންމާފައިވާ ކަމަށެވެ.

"(ވިދިވިދިގެން) ތިން ދުވަސްމަތިން ފުރަން ކިޔާފަ އޮތީ. އެކަމަކު މިއަދު ވެސް ނުފުރޭނެތީ މިހާރު ވަނީ ކޮލިފައިންގައި ވާދަ ނުކުރާނެކަން ބުނެފަ،" ވާހަކަ ދެއްކި ކުޅުންތެރިޔާ ބުންޏެވެ.

ކޮލިފައިންގައި ރާއްޖޭގެ ޓީމަށް ވާދަ ނުކުރެވޭނެކަން ޔަގީންވުމުން ޓީމުގެ ހެޑް ކޯޗު އަލީ ސުޒޭން ވެސް ވަނީ ޓީމުގެ މަސައްކަތް މަޑުޖައްސާލާފަ އެވެ. އަދި އޭއެފްސީ ކަޕަށް ތައްޔާރުވާ މާޒިޔާގެ ޕްރެކްޓިސް މިއަދު ގަލޮޅު ދަނޑުގައި ބާއްވާތީ ވަނީ ދަނޑަށް ވެސް ގޮސްފަ އެވެ.

ޒުވާޏް 23 އަހަރުން ދަށުގެ ޓީމުގައި ހިމެނޭ މާޒިޔާގެ ހަސަން ނަޒީމް (ޗޯޓު) ވެސް ވަނީ މިއަދު ބޭއްވި މާޒިޔާގެ ޕްރެކްޓިސްގައި ބައިވެރި ވެފަ އެވެ.

އެފްއޭއެމްގެ އެތެރޭގެ މައުލޫމާތު އެނގޭ މީހަކު ބުނީ ޓިކެޓް ނަގާނެ ފައިސާއެއް އެފްއޭއެމްގައި ނެތް ކަމަށެވެ.

"އެންމެ ފަހުން ވެސް 16 އަހަރުންދަށުގެ ގައުމީ ޓީމު ބޫޓާނަށް ފުރީ ވެސް ސަރުކާރާ ގާތް މީހަކު މެދުވެރިކޮށް ލިބުނު ފައިސާ ކޮޅަކުން،" ނަން ނުޖަހަން ޝަރުތުކޮށް ވާހަކަ ދެއްކި މީހާ ބުންޏެވެ.

ބޫޓާންގައި މި ވަގުތު ތިބި 16 އަހަރުން ދަށުގެ ގައުމީ ޓީމު، މިދިޔަ ބުރާސްފަތި ދުވަހު ހަވީރު ފުރަން ދިޔަ ފަހުން އެ ޓީމަށް ނުފުރޭނެކަން އެންގި އެވެ. އެއީ އޭރު ޓިކެޓް ހަމަނުޖެހޭތީ އެވެ. އެކަމަކު އެރޭ ފަތިހު ޓިކެޓް ހަމަޖެހުމުން ޓީމު ބޫޓާނަށް ފުރީ ހުކުރު ދުވަހުގެ މެންދުރު ކުރީގެ ވަގުތެއްގަ އެވެ.

ކުރިން ވާހަކަ ދެއްކި ފަރާތުން ބުނީ މާލޭގައި ހުރި އެއާލައިންތަކުގެ އޮފީސްތަކުން، ފަހުންދައްކާ ގޮތަށް މިހާރު އެފްއޭއެމަށް ޓިކެޓް ދޫނުކުރާ ކަމަށެވެ.

"ގިނަ އެއާލައިންތަކަށް ދައްކަންޖެހޭ ފައިސާ ގަވާއިދުން ނުދައްކާތީ އެއާއިލައިންތަކުން ވަނީ އެފްއޭ އަށް ކްރެޑިޓަށް ޓިކެޓް ދޫކުރުން ހުއްޓާލާފަ،" އޭނާ ބުންޏެވެ.

ތޭވިސް އަހަރުންދަށުގެ ޓީމުގެ ދަތުރާ ބެހޭގޮތުން، "މިހާރު" އިން ސުވާލު ކުރުމުން އެފްއޭއެމްގެ ޖެނަރަލް ސެކްރެޓަރީ ހުސައިން ޖަވާޒު (ޖަވާ)، ޖަވާބެއް ނުދެއްވަ އެވެ. އޭނާ އަށް ގުޅުމުން ފޯނު ވެސް ނުނަންގަވަ އެވެ.

އެފްއޭއެމްގެ މީޑިއާ ގުރޫޕްގައި ރެއިން ފެށިގެން ނޫސްވެރިޔަކު ދަތުރާ ބެހޭގޮތުން ސުވާލު ކުރުމުން، ގުރޫޕުގައި އެފްއޭ އިން ޖަވާބުދާރީވީ މިއަދު ހަވީރެވެ. ގުރޫޕަށް ފޮނުވި މެސެޖްގައި ޖަވާ ވިދާޅުވީ، ދަތުރަށް ބޭނުންވާ ފައިސާ ހޯދާފައި ވާ ކަމަށާއި ނަމަވެސް ސްޕޯޓްސް މިނިސްޓްރީގެ ފަރާތުން އިތުރު މާލީ އެހީތެރިކަމެއް ނުލިބުމުގެ ސަބަބުން ކޮލިފައިން އިން ރާއްޖެ ވަކިވާން ނިންމީ ކަމަށެވެ.

"ބޭނުންވާ ވަރަށް ދަތުރުގެ ފައިސާ ވަނީ ހަމަޖައްސާފައި. އެއީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓްގެ އިތުރު މާލީ އެހީތެރިކަމެއް ލިބޭނެ ކަމުގެ އުންމީދުގައި. ޒުވާން ހުރިހާ ޓީމެއްގެ ޓިކެޓް ކޯޓޭޝަން ވާނީ 7 އޮގަސްޓް 2023 ގައި މިނިސްޓްރީއާ ހިއްސާ ކުރެވިފައި، ސަބަބަކީ ގައުމީ ޓީމުތަކުގެ ބައިނަލްއަގުވާމީ ދަތުރުތަކަށް އެހީވާން އެއްބަސްވެފައި ވާތީ،" ޖަވާގެ މެސެޖްގައި ވެއެވެ.

"އަޅުގަނޑުމެން އޯލް އިންޑިއާ ފުޓްބޯޅަ ފެޑެރޭޝަނާ މަޝްވަރާ ކުރެވުނު މެޗު ލަސް ކުރަން، އެކަމަކު ވަގުތު ކުޑަތަން ވެފައި ވާތީ އެފަރާތުން އެއްބަހެއް ނުވި. އިންޑިއާ އިން އެދުނީ މުޅި ޝެޑިއުލް ފަސްކުރަން. މިއާ ގުޅިގެން އޭއެފްސީ 23 އަހަރުން ދަށުގެ އޭޝިއަން ކަޕް ގަތަރު 2024 ކޮލިފަޔާސް އިން އަޅުގަނޑުމެން ރަސްމީކޮށް ވަކިވިކަން ހިތާމައާ އެކު އަންގަން."

އޭޝިއާގެ 23 އަހަރުންދަށުގެ މުބާރާތުގެ ކޮލިފައިންގައި ރާއްޖެ ހިމެނޭ ގުރޫޕް ޖީގައި ހިމެނެނީ ޗައިނާ އާއި ޔުނައިޓެޑް އެރަބް އެމިރޭޓްސްގެ އިތުރުން އިންޑިއާ އެވެ.

ޗައިނާގެ ޑަލިއަންގައި ކުޅޭ އެ ގުރޫޕްގެ ކޮލިފައިންގައި ދިވެހި ޓީމު ކުޅެން ޖެހޭ ފުރަތަމަ މެޗުގައި މާދަމާ ރާއްޖޭގަޑިން 1:30 ގައި އޮތީ އިންޑިއާ އާ ދެކޮޅަށެވެ.

މި މަހު ބާއްވަން ހަމަޖެހިފައިވާ ސާފް ޗެމްޕިއަންޝިޕްގެ 19 އަހަރުންދަށުގެ ސާފް ޗެމްޕިއަންޝިޕްގައި ވެސް ރާއްޖޭން ވާދަ ކުރާ ގޮތަށް އޮތީ ހަމަޖެހިފަ އެވެ. ނޭޕާލުގައި އޮންނަ އެ މުބާރާތަށް ވެސް ގައުމީ ޓީމަށް ދެވޭނެކަމުގެ އެއްވެސް ޔަގީންކަމެއް ނެތެވެ.