ހޯނޑެއްދޫ އިހުތިސާސްގެ ތެރޭ އޮތް ކަޑެވާރެހާ އަށް ޓޫރިޒަމްގެ ވައުދު

ގދ. ހޯނޑެއްދޫ ކައިރީގައި އޮތް ކަޑެވާރެހާގައި ޓޫރިޒަމްގެ މަޝްރޫއުތައް ހިންގޭނެ ފުރުސަތު ހުޅުވާލައްވާނެ ކަމަށް ޕީއެންސީ/ޕީޕީއެމްގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

މި ރަށަށް މުއިއްޒު ވަޑައިގަތުމުން ކުޑަކުދިންތަކެއް ވަނީ ބޭނުންވާ ކަންކަން ހިމެނޭ ލިޔުންތަކެއް އޭނާއާ ހަވާލުކޮށްފަ އެވެ. އެއް ލިޔުމުގައި އޮތީ ހޯނޑެއްދޫގެ އިހްތިސާސްގެ ތެރޭ އޮތް ކަޑެވާރެހާ އަށް ޓޫރިޒަމް ގެނައުމެވެ.

ރަށުގެ ރައްޔިތުންނާ ވާހަކަ ދައްކަވަމުން މުއިއްޒު ވިދާޅުވީ އެކަމުގައި ގާނޫނީ ގޮތުން ހުރި ކަންކަން ބެެއްލެވުމަށް ފަހު، ކަޑެވާރެހާ އަށް ޓޫރިޒަމް ގެނެސް، ރައްޔިތުންނަށް އާމްދަނީ ލިބޭނެ މަގު އޭނާގެ ވެރިކަމެއްގައި ފަހިކޮށްދެއްވާނެ ކަމަށެވެ.

ރަށުގެ ބޮޑު މަގުތަކުގައި ތާރު އެޅުމާއި ރިވެޕްމެންޓް ޖަހައި ގިރާ ސަރަހައްދު ހިމާޔަތް ކުރުމާއި ކުޅިވަރު ވަސީލަތްތައް ގާއިމް ކުރުމާއި ސިއްހީ މަރުކަޒު ތަރައްގީކޮށް، ލެބޯޓަރީއެއް ހެދުމާއި މިސްކިތެއް ހެދުމާއި ކްލާސްރޫމްތައް އެޅުމާއި ގެދޮރުވެރިކަމުގެ މަޝްރޫއުއެއް މުއިއްޒު އިއުލާން ކުރެއްވި އެވެ.

މުއިއްޒު ވިދާޅުވީ އޭނާ އަށް ވެރިކަން ދީފި ނަމަ ނަތީޖާ ނެރެދެއްވާނެ ކަމަށް ޔަގީންކަން ދެއްވާ ކަމަށެވެ. ރަށްރަށުން ފެނިވަޑައިގަތީ މިހާރުގެ ވެރިކަން ބަދަލުކުރުމުގެ ރޫހު ކަމަށާއި އެ ރޫހުގައި އިންތިހާބުގައި ނުކުމެ އޭނާ އަށް ވޯޓު ދިނުމަށް އެދިވަޑައިގެންނެވި އެވެ.

ރައްޔިތުންގެ މާލިއްޔާ އިން ބޮޑު ހަރަދެއް ކޮށްގެން ދެވަނަ ބުރަކަށް ދިޔުމުގެ ބޭނުމެއް ނެތް ކަމަށާއި އެއްބުރުން މިކަން ނިންމަން ޖެހޭ ކަމަށް ވެސް މުއިއްޒު ވިދާޅުވި އެވެ. ވިދާޅުވީ މި ސަރުކާރުން ވަނީ ރަށްރަށަށް ވަރަށް ބޮޑަށް އިހުމާލުވެފައި ކަމަށާއި ހާއްސަކޮށް ސިއްހީ އަދި ތައުލީމީ ދާއިރާ އިން އެކަން ފެންނަ ކަމަށް ވިދާޅުވި އެވެ.

"އެހެންވީމާ އަންނަ މަހު މި އޮތީ ގޮތް ނިންމުން ރައްޔިތުންނަށް. ނިންމަންވީ ނަތީޖާ ނެރެދެވޭނެ ބަޔަކު ހޮވާނީތޯ ނޫނީ ކުރަން އުޅެ ނުވި ބަޔަކު ހޮވަންތޯ. އަޅުގަނޑުމެންނަށް ފުރުސަތު ދެއްވާ. މިއީ ކުރެވޭނެ ކަންކަން، ނަތީޖާ ދައްކާނަން،" މުއިއްޒު ވިދާޅުވި އެވެ.