ކުރިއަށް އޮތް 50 އަހަރަށް ރާއްޖެ ތަރައްގީ ކުރާނެ ޕްލޭނެއް ހަދާނަން: ނާޒިމް

ކުރިއަށް އޮތް 50 އަހަރަށް ރާއްޖެ ތަރައްގީ ކުރާނެ ގޮތުގެ ޕްލޭނެއް އޭނާގެ ވެރިކަމެއްގައި ހައްދަވާނެ ކަމަށް މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރިޔާސީ ކެންޑިޑޭޓް މުހައްމަދު ނާޒިމް ރޭ ވިދާޅުވެއްޖެ އެވެ.

އަންނަ މަހުގެ 9 ގައި ބާއްވާ ރިޔާސީ އިންތިހާބުގެ ކެމްޕެއިނަށް އައްޑު އާއި ފުވައްމުލަކަށް މިހާރު ކުރައްވަމުން ގެންދަވާ ދަތުރުގައި ރޭ ހިތަދޫގައި ބޭއްވި ޖަލްސާގައި ނާޒިމް ވިދާޅުވީ، ރާއްޖޭގެ ތަރައްގީ އަށް ބޭނުންވަނީ ދުރުވިސްނޭ ޕްލޭނެއް ކަމަށެވެ.

އެފަދަ ޕްލޭނެއް ނެތް ނަމަ ތަރައްގީ ނުފެންނާނެ ކަމަށާއި ރާއްޖެ އަށް ބޭނުންވަނީ 50 އަހަރުގެ ޕްލޭނެއް ކަމަށް އޭނާ ވިދާޅުވި އެވެ.

"އަޅުގަނޑުމެން ފަސް އަހަރަކަށް ނޫން، ރާއްޖޭގައި އޮންނަން އެބަ ޖެހޭ ނޭޝަނަލް ޑިވެލޮޕްމެންޓް ޕްލޭނެއް. އެއީ ލާޒިމް ކުރާ ކަމެއް. އަޅުގަނޑު ބޭނުން ސިޔާސީ ބޭފުޅުންނާ އެކީ އިށީންނަން. ކުރިއަށް އޮތް 50 އަހަރަށް ރާއްޖޭގެ ޕްލޭނެއް ހެދިފައި އޮންނަން ޖެހޭނެ. އަޅުގަނޑު ހިތައް އެރީމައި ބްރިޖު ހަދާފައި، އަނެއް ދުވަހު ދެ ރަށް އުވާލާ ގޮތަށް އޮވެގެން ނުވާނެ،" ޑިފެންސް މިނިސްޓަރުކަމާއި ހެލްތު މިނިސްޓަރުކަން ކުރެއްވި ނާޒިމް ވިދާޅުވި އެވެ.

"ރަށަކަށް ވަޑައިގަންނަވާ ތަނުން މީހަކު މި ބުނީ ރަށް ހިއްކައިދޭށޭ، ބުނީމަ ހަމަ އެ ހިއްކާލީ. އެ ގޮތަށް ކަމަކު ނުދާނެ."

ބޮޑެތި މެގަ ޕްރޮޖެކްޓްތައް ހިންގަން ވާނީ ހުރިހާ އެންމެންނާ މަޝްވަރާ ކުރުމަށް ފަހު ކަމަށާއި އެހެން ނުހަދައިފި ނަމަ ދައުލަތަށް ވަރަށް ބޮޑު ގެއްލުމެއް ލިބޭ ކަމަށް ވެސް ނާޒިމް ވިދާޅުވި އެވެ.

އެމްއެންޕީގެ ވެރިކަމެއްގައި މަޝްރޫއުތައް ފެށުމުގެ ކުރިން ރައްޔިތުންނާއި ސިޔާސީ ޕާޓީތަކާ އެކު މަޝްވަރާ ކުރައްވާނެ ކަމަށާއި އެ ކަންކަން ކުރައްވާނީ ރައްޔިތުންނަށް އެންމެ ފައިދާ ވާނެ ގޮތަށް ހަރަދު ކުޑަވާނެ ގޮތަކަށް ކަމަށް ނާޒިމް ވިދާޅުވި އެވެ. އެމްއެންޕީގެ ވެރިކަމެއްގައި މަސައްކަތް ކުރަނީ ރައްޔިތުންނަކީ ފުދުންތެރި، ތަނަވަސް ބަޔަކަށް ހެދުމަށް ކަމަށް ވެސް އޭނާ ވިދާޅުވި އެވެ.

ރާއްޖޭގެ އިގްތިސޯދު ރަނގަޅުވުމުން އިޖްތިމާއީ މައްސަލަތަކަށް ވެސް ހައްލު ލިބޭނެ ކަމަށް ނާޒިމް ވިދާޅުވިއިރު، އިގްތިސޯދު ރަނގަޅު ކުރުމަށް ކުރާނެ ކަންކަން އެ ޕާޓީގެ މެނިފެސްޓޯގައި ވެސް ހިމަނާފައި ވެ އެވެ.

ނާޒިމް ވިދާޅުވި ގޮތުގައި އައްޑޫ އެކަނި ތަރައްގީ ކޮށްގެން ގައުމުގެ އިގްތިސޯދަށް މާ ބޮޑު ބަދަލެއް ނާންނާނެ އެވެ. އެހެންވެ އެމްއެންޕީގެ މެނިފެސްޓޯގައި އައްޑުއާ އެކު ފުވައްމުލަކާއި ހުވަދު އަތޮޅު ވެސް ތަރައްގީ ކުރައްވާނެ ކަމަށް ވިދާޅުވި އެވެ.