ފުށިދިއްގަރުފަޅު ހިއްކައިގެން 11،000 ގޯއްޗާއި 26،000 ފްލެޓް ދޭނަން: މުއިއްޒު

އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ވެރިކަމެއްގައި ކ. ފުށިދިއްގަރުފަޅު ހިއްކައިގެން 11،000 އަށް ވުރެ ގިނަ ގޯތި ދޭން އޭނާ މިރޭ ވައުދުވެވަޑައިގެންފި އެވެ.

މުއިއްޒުގެ ބޯހިޔާވަހިކަމުގެ މެނިފެސްޓޯ އިއުލާން ކުރުމަށް ހުޅުމާލޭގެ ހިޔާ ސަރަހައްދުގައި ބޭއްވި ބޮޑު ޖަލްސާގައި މުއިއްޒު ވިދާޅުވީ، ފުށިދިއްގަރުފަޅުން 1،200 ހެކްޓަރުގެ ބޮޑު ސަރަހައްދެއް އޭނާގެ ވެރިކަމުގައި ހިއްކާނެ ކަމަށާއި އެތަނުން 11،900 އަށް ވުރެ ގިނަ ގޯއްޗާއި 26،000 ފްލެޓް އިމާރާތް ކުރާނެ ކަމަށެވެ.

"ފުށިދިއްގަރު ފަޅުގައި 1،280 ހެކްޓަރުގެ ބޮޑު ސަރަހައްދެއް އިރާދަކުރެއްވިއްޔާ ހިއްކޭނެ. އެއީ ހުޅުމާލެ އަށް ބަލަންޏާ ހުޅުމާލޭގެ ދެ ހުޅުމާލެ، ފޭސް ވަން، ފޭސް ޓޫ އެއްކޮށްލީމާ ވާ ސައިޒުގެ ތިން ގުނަ،" މާލޭގެ މޭޔަރުކަން ވެސް ކުރީގެ ހައުސިން މިނިސްޓަރު ވިދާޅުވި އެވެ.

އެ ސަރަހައްދުން ދޫކުރާ ގޯތިތަކުގައި 1،400 އަކަފޫޓުން ފެށިގެން 1،600 އަކަފޫޓު ހުންނާނެ ކަމަށް އޭނާ ވިދާޅުވި އެވެ. ގިރާވަރު ފަޅުން 89 ހެކްޓަރުގެ ބިން ހިއްކައިގެން 1،000 ވުރެ ގިނަ ގޯއްޗާއި 2،800 ފްލެޓް ދިނުމުގެ އިތުރުން ގުޅިފަޅުގެ 300 ހެކްޓަރުގެ ބިން ހިއްކައިގެން 3،500 އަށް ވުރެ ގިނަ ގޯއްޗާއި 7،800 ފްލެޓް އިމާރާތް ކުރާނެ ކަމަށް ވެސް މުއިއްޒު ވިދާޅުވި އެވެ.

އޭނާ ވިދާޅުވި ގޮތުގައި ކުރިއަށް 20 އަހަރަށް އަމާޒުކޮށްގެން ހަދާފައިވާ އެ މެނިފެސްޓޯގެ ދަށުން ފުށިދިއްގަރުފަޅާއި ގިރާވަރުފަޅާއި ގުޅިފަޅާއި ހުޅުމާލެ އާއި މާލެ ހިމެނޭހެން 65،000 ގޯތި ނުވަތަ ފްލެޓް ދޭނެ އެވެ. އޭރުން ބޯހިޔާވަހިކަން ނުލިބޭ މީހަކު މާލެ ސަރަހައްދުގައި ނުހުންނާނެ ކަމަށް އޭނާ ވިދާޅުވި އެވެ.

"މާލޭގެ ހުރިހާ ލޮބުވެތި ރައްޔިތުންނަށް ގެދޮރު ޔަގީން ވެގެންދަނީ. މާލޭގައި ދިރިއުޅޭ ހުރިހާ ރައްޔިތުންނަށް ގެދޮރު ޔަގީން ވެގެން ދަނީ. އަދި މި ސަރަހައްދަށް އަންނަން ބޭނުންވާ ހުރިހާ ރައްޔިތުންނަށް ގެދޮރު ލިބިގެންދަނީ. އެކަން އިރާދަކުރެއްވިއްޔާ އަޅުގަނޑުމެން ހާސިލް ކޮށްދޭނަން،" މުއިއްޒު ވިދާޅުވި އެވެ.

މުއިއްޒުގެ މެނިފެސްޓޯގައި ހިމަނާފައިވާ ގޮތުން ބިމެއް އޮތް ކޮންމެ މީހަކަށް ބިމުގައި ގެދޮރު އަޅައިދޭން ސަރުކާރުން ހާއްސަ ފަންޑެއް ގާއިމްކޮށް، ގެދޮރު އަޅައިދޭނެ އެވެ. ގެދޮރު އަޅައިދޭނީ ފަހުން ފައިސާ ދައްކާ ގޮތަށް އަދި ވެރިފަރާތުން ބޭނުންވާ ޑިޒައިނަކަށް ކަމަށް މުއިއްޒު ވިދާޅުވި އެވެ.

މީގެ އިތުރުން ގެދޮރު އިމާރާތްކުރަން ލުއި ލޯނު ހަމަޖައްސައި ދިނުމާއި މާލެ ސަރަހައްދުގެ އިތުރުން ދެކުނާއި އުތުރުގައި ހާއްސަ އާބަން ހަތް ސަރަހައްދެއް ތަރައްގީ ކުރުމާއި ސިނާއީ މަސައްކަތްތައް ތަރައްގީ ކުރުމާ އެކު ޓްރާންސްޝިޕްމަންޓް ބަނދަރުތަކެއް ގާއިމްކުރުން ވެސް މުއިއްޒުގެ ވައުދުތަކުގެ ތެރޭގައި ހިމެނެ އެވެ.