"މަގުމަތިވި" ޕީޕީއެމް މެމްބަރުންނަށް ވަހީދު ގޮވާލެއްވީ ގާސިމަށް ވޯޓު ދޭން

ކުރިއަށް އޮތް ރިޔާސީ އިންތިހާބުގައި އެމަނިކުފާނާ އެކު ޕީޕީއެމްގެ މެމްބަރުން ވެސް މަގުމަތިވެފައިވާ ކަމަށާއި، އެ ޕާޓީގެ 40،000 މެމްބަރުން ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމަށް ވޯޓު ދިނުމަށް، ކުރީގެ ނައިބު ރައީސް ޑރ. މުހައްމަދު ވަހީދު މިރޭ ގޮވާލައްވައިފި އެވެ.

މީގެ ދެ ދުވަހެއް ކުރިން، ޑރ. ވަހީދު ޕީޕީއެމުން ވަކިވެވަޑައިގަތީ އެ ޕާޓީގެ ރިޔާސީ ޓިކެޓާ މެދު އުފެދުނު ހިޔާލު ތަފާތުވުންތަކަށް ފަހު ޕީއެންސީގެ ފަރާތުން ޑރ. މުހައްމަދު މުއިއްޒު ރިޔާސީ އިންތިހާބަށް ނުކުންނަވާފައި ވަނިކޮށެވެ. އޭގެ ކުރިން ރިޔާސީ ޓިކެޓަށް ޝައުގުވެރިކަން ފާޅުކުރައްވާފައިވާ ވަހީދު ޕީޕީއެމުން ވަކިވެވަޑައިގަންވަން ހިއްސާކުރެއްވި މެސެޖުގައި ވިދާޅުވީ، އެމަނިކުފާނުގެ އިލްމާއި ތަޖުރިބާގެ ބޭނުން ހިފޭނެ މާހައުލެއް އެ ޕާޓީގައި ނެތް ކަމަށެވެ.

އދ. މާމިގިލީގައި ޖޭޕީން ބޭއްވި ޖަލްސާގައި ވަހީދު އެ ޕާޓީއަށް ސޮއި ކުރައްވައި ވިދާޅުވީ، ގާތްގަނޑަކަށް ދިހަ އަހަރު ހޭދަކުރެއްވި ޕީޕީއެމުގައި ޑިމޮކްރަސީގެ އުސޫލެއް ނެތް ކަމަށާއި އަންނަ މަހު 9 ގައި އޮންނަ އިންތިހާބުގައި އެ ޕާޓީން ކެންޑިޑޭޓެއް ނެރުމުގެ ފުރުސަތު ނުދިން ކަމަށެވެ.

"އޭގެ ސަބަބުން މިއަދު، ޕީޕީއެމްގެ ކެންޑިޑޭޓެއް މިއަަހަރުގެ ރިޔާސީ އިންތިހާބުގެ ބެލެޓް ކަރުދާހަކު ނެތް. ޕިންކް ކުލަ ވެސް ނެތް. ޕީޕީއެމްގެ ކުލައެއް ވެސް ނިޝާނެއް ވެސް ނެތް. ކޮބައިތޯ ޕީޕީއެމްގެ ސާޅީހަކަށް ހާސްް މެމްބަރުން، އަޅުގަނޑު ދަންނަވާނީ އަޅުގަނޑު މަގުމަތިވިއްޔާ އެބޭފުޅުން ވެސް ތިބީ މަގުމަތީގައޭ،" ވަހީދު ވިދާޅުވި އެެވެ.

އެއާ އެކު، ވަހީދު ވަނީ އެމަނިކުފާނާ އެކު "މަގުމަތިވި" ޕީޕީއެމްގެ ހުރިހާ މެމްބަރުން އިންތިހާބުގައި ގާސިމަށް ވޯޓު ދިނުމަށް ގޮވާލައްވައިފަ އެވެ.

ވަހީދު ވިދާޅުވި ގޮތުގައި ރާއްޖޭގެ މިނިވަންކަމާއި ރާއްޖޭގެ ޑިމޮކްރަސީ އަދި އިގްތިސޯދު މިއޮތީ ނުރައްކާތެރި ފައްތަރަކަށް ގޮސްފައި ކަމަށާއި ފިޔަވަޅުތައް ނާޅައިފި ނަމަ، އަވައްޓެރި ސްރީލަންކާއަށް ދިމާވި ހާލަތު ކުރިމަތިވެދާނެ އެވެ.

ވަހީދު ވިދާޅުވީ ރާއްޖޭގެ އިގްތިސޯދު ހަމައަކަށް އެޅުވުމަށް ލޯނުތައް ރީސްޓްރަކްޗާކޮށް އާމްދަނީ އިތުރުކުރެވޭނެ ގޮތްތައް ހޯދަންޖެހޭ ކަމަށެވެ. އަދި އެވަރުގެ ކަންތައްތައް ކުރެވޭނެ ހަމައެކަނި ބޭފުޅަކީ ގާސިމަށް ކަމަށް ވަހީދު ވިދާޅުވި އެވެ.