ދިރާގު މޮބައިލް ލެޖެންޑްސް ކޮންކުއެސްޓްގެ ގްރޭންޑް ފިނާލޭ މާދަމާ

ދިރާގުން ބޭއްވި މޮބައިލް ލެޖެންޑްސް ކޮންކުއެސްޓުގެ ގްރޭންޑް ފިނާލޭ މާދަމާ އޮންނާނެ އެވެ.

މި މުބާރާތުގެ ހަތް ދުވަހުގެ މެޗުތައް އޮންލައިންކޮށް ކުރިއަށް ގެންދިއުމަށް ފަހު ގްރޭންޑް ފިނާލޭގެ މުބާރާތް ބާއްވަން ހަމަޖެހިފައި ވަނީ ދިރާގު ހެޑް އޮފީހުގަ އެވެ. އެ ތަނުގައި ގްރޭންޑް ފިނާލޭ ބާއްވަން ނިންމީ މުބާރާތުގެ ބައިވެރިންގެ އާއިލާ އާއި ރައްޓެހިން ބައިވެރިކޮށް ފޯރިގަދަ މާހައުލެއްގައި މުބާރާތް ބެލޭނެ އިންތިޒާމު ހަމަޖެއްސުމަށް ކަމަށް ދިރާގުން ބުންޏެވެ.

ދިރާގުން ބުނީ ގްރޭންޑް ފިނާލޭ އިވެންޓުގައި އެއް ދުވަހުގެ ފީފާ ޓޯނަމަންޓަކާއި ތަފާތު ވީ.އާރު ގޭމްތައް ކުޅެވޭނެ އިންތިޒާމުތައް ހަމަޖައްސާފައި ހުންނާނެ ކަމަށެވެ.

ދިރާގުން ބުނީ މި އިވެންޓުގެ ފީފާ ޓޯނަމަންޓުން އެއް ވަނައަށް ދާ ފަރާތަކަށް ޕްލޭސްޓޭޝަން 5 އެއް ލިބޭނެ ކަމަށެވެ. މި ޓޯނަމަންޓްގައި ބައިވެރިވުމަށް މިހާރު އޮންލައިންކޮށް ރަޖިސްޓްރީވުމަށް ވަނީ ހުޅުވާލައިފަ އެވެ. މި ޓޯނަމެންޓު ކުރިއަށްގެންދާނީ 35 ކުޅުންތެރިންނަށް ލިމިޓުކޮށްގެންނެވެ.

ދިރާގުގެ މޮބައިލް ލެޖެންޑްސް ކޮންކުއެސްޓުގެ މުބާރާތްތައް ސޯޝަލް މީޑިއާ އަދި ޔޫޓިއުބް މެދުވެރިކޮށް ވަނީ ލައިވް ސްޓްރީމްކޮށްފަ އެވެ.

މި މުބާރާތަކީ 100،000ރ. ގެ ޕްރައިޒް ޕޫލެއް ހުށަހަޅައިގެން ކުރިއަށް ގެންދާ ރާއްޖޭގެ އެންމެ ބޮޑު އެއް އީ-ސްޕޯޓްސް މުބާރާތެކެވެ.