ތަރައްގީއަށް ހުރަސްއަޅަން ކުރިމަތިލި ކެންޑިޑޭޓުން އުޅޭ: ރައީސް

ތަރައްގީގެ އެއްވެސް އަމާޒެއް ނެތި، ތަރައްގީއަށް ހުރަސްއެޅުމުގެ ނިޔަތުގައި އިންތިހާބަށް ކުރިމަތިލީ ބައެއް ކެންޑިޑޭޓުން ވެސް މި އަހަރުގެ ރިޔާސީ އިންތިހާބުގައި ވާދަކުރައްވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ އެވެ.

ރައީސް ހުވަދުއަށް ކުރައްވާ ރިޔާސީ ކެމްޕެއިން ދަތުރުފުޅުގައި ގދ. ހޯޑެއްދޫގައި ބޭއްވި ޖަލްސާގައި ވިދާޅުވީ ސިޔާސީ ވިސްނުން ތަފާތުވިޔަސް، ތަރައްގީއަށް ކުރާ މަސައްކަތްތަކަށް އެއްވެސް ބަޔަކު ހުރަސްއަޅައިގެން ނުވާނެ ކަމަށެވެ.

"ސިޔާސީ ވިސްނުން ތަފާތުވިޔަސް، ތަރައްގީއަށް މި ކުރާ މަސައްކަތުގައި ބައިވެރިވެވަޑައިގަންނަވާ. އޭގެ ފައިދާ ލިބޭނީ މި ރަށްރަށުގެ ރައްޔިތުންނަށް،" ރައީސް ވިދާޅުވި އެވެ.

"ވަރަށް ސާފުކޮށް އެބަ އެނގޭ ކުރިއަށް އޮތް ރިޔާސީ އިންތިހާބުގައި ވޯޓު އެޅިގެންދާނެ ގޮތް. ނަމެއްގައި [ރިޔާސީ އިންތިހާބަށް] ކުރިމަތިލައިގެން ވޯޓުތައް ބައިބައިކޮށްލަން، އެމީހުންގެ މާ ބޮޑު ވިޝަންއެއް ނެތް. ހަމައެކަނި މަގުސަދަކީ އެ އަންނަ ސިޔާސީ ހިޔާލު ތަފާތުވުންތަކުގައި ބަޔަކަށް ލިބެން އޮތް ފަސޭހަަތަކަށް ހުރަސްއަޅެން."

އަންނަ މަހުގެ 9 ގައި ބާއްވާ ރިޔާސީ އިންތިހާބުގައި 8 ކެންޑިޑޭޓަކު ވާދަކުރެ އެވެ. މިއީ ރިޔާސީ އިންތިހާބެއްގައި އެންމެ ގިނަ ކެންޑިޑޭޓުން ވާދަކުރައްވާ ފަހަރެވެ. ދެވަނަ އަށް އެންމެ ގިނަ ކެންޑިޑޭޓުން ވާދަކުރީ 2008 ވަނަ އަހަރު އެވެ. އެ ފަހަރު ހަ ބޭފުޅަކު ރިޔާސީ އިންތިހާބުގައި ވާދަކުރެއްވި އެވެ.

ރިޔާސީ އިންތިހާބަށް ވާދަކުރަން ފޯމު ހުށަހެޅި ޕާޓީތަކަކީ އެމްޑީޕީ އާއި ޖުމްހޫރީ ޕާޓީ އާއި ޕީއެންސީ އާއި އެމްއެންޕީ އަދި ޑިމޮކްރެޓްސް އެވެ. އަމިއްލަ ގޮތުން ވާދަކުރައްވަން ފޯމު ހުށަހެޅުއްވީ ކުރީގެ ހޯމް މިނިސްޓަރު އުމަރު ނަސީރާއި އެމްއާރުއެމްގެ ރައީސް އަހުމަދު ފާރިސް މައުމޫނާއި ޑިފެންސް މިނިސްޓްރީގެ ނައިބަކަށް ކުރިން ހުންނެވި ހަސަން ޒަމީލެވެ.