ހޮޑުލުމާއި ބޭރަށް ހިންގުމުގެ ރޯގާއެއް ފެތުރި ހޮސްޕިޓަލްތައް ފުރިއްޖެ

ހޮޑުލުމާއި ބޭރަށް ހިންގުމުގެ ރޯގާއެއް މާލޭގައި ފެތުރި ގިނަ އަދަދެއްގެ ކުޑަ ކުދިން އެޑްމިޓްކޮށް ހޮސްޕިޓަލްތައް ފުރިއްޖެ އެވެ.

އޭޑީކޭގެ މެނޭޖިން ޑިރެކްޓަރު އަހުމަދު އަފްއާލް "މިހާރު" އަށް ވިދާޅުވީ ގިނަ އަދަދެއްގެ ކުދިން ހޮޑުލާ ބޭރަށް ހިންގާތީ ރޭ ފަތިހު 5:00 އިން ފެށިގެން ޑޮކްޓަރަށް ދައްކަން އަންނަން ފަށާފައިވާ ކަމަށެވެ. ކުޑަކުދިންގެ އިތުރުން ބޮޑެތި މީހުން ވެސް އަންނަނީ ހާލު ދެރަވެގެން ފަރުވާ ހޯދަމުންނެވެ.

މި ވަގުތާ ހަމައަށް އީއާރު ފުރިފައިވާ ކަމަށާއި އިތުރަށް ފަރުވާ ދިނުމަށް އެހެން އިންތިޒާމްތައް ވެސް ހަމަޖައްސަމުން އަންނަ ކަމަށް އަފްއާލް ވިދާޅުވި އެވެ.

"އަދި ސީދާ ކޮން ކަމަކާ ގުޅިގެން ކަމެއް ޑޮކްޓަރުންގެ ފަރާތުން މައުލޫމާތެއް ނުލިބޭ. ހުރިހާ ކުދިން ވެސް ހަމަ ހޮޑުލާ ބޭރަށް ހިންގަނީ،" އަފްއާލް ވިދާޅުވި އެވެ.

އެނގިފައިވާ ގޮތުގައި އައިޖީއެމްއެޗާއި ސެނަހިޔާގައި ވެސް ގިނަ އަދަދެއްގެ ކުޑަ ކުދިން އެބަތިއްބެވެ. އަދި އެ ހޮސްޕިޓަލްތަކުގެ އީއާރު ވެސް ވަނީ ފުރިފަ އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ބޭރަށް ބޭރަށް ހިންގުމާއި ހޮޑުލުން ކުއްލިއަކަށް ގިނަވި ސަބަބު ދެނެގަތުމަށް މަސައްކަތް ކުރަމުން އަންނަ ކަމަށެވެ.

ސޯޝަލް މީޑިއާގައި ބައެއް މީހުން ލިއެފައިވާ ގޮތުގައި ހޮޑުލުމާއި ބޭރަށް ހިންގުމުގެ ރޯގާއެއް ފެތުރޭތާ 3-4 ދުވަސް ވެއްޖެ އެވެ.

މި ރޯގާ ޖެހޭ މީހުން އިތުރުވެފައިވާތީ ޑޮކްޓަރުން ވެސް ގެންދަނީ އިރުޝާދު ދެއްވަމުންނެވެ.

ކުޑަކުދިންގެ ޑޮކްޓަރު އަހްމަދު ފައިސަލް އިރުޝާދު ދެއްވަނީ ވީހާވެސް ބޮޑަށް ސާފުތާހިރުކަމަށް ސަމާލުކަން ދިނުމަށެވެ. އަވަސް އަވަހަށް އޮތްދޮވުމަށާއި ބޭރަށް ހިންގައި ހޮޑުލާ ނަމަ ގިނައިން ދިޔާއެއްޗެހި ދޭން ޖެހޭނެ ކަމަށް ވިދާޅުވި އެވެ.

"ފެންމަދުވިޔަ ނުދީވޭތޯ ބަލާތި. މާވަރުދެރަވެ ހީސްނުލާ އަށް ގަޑިއިރުވީމަ ޖެހޭނީ އައިވީކޮޅެއް ދޭން،" ފައިސަލްގެ ޓުވީޓުގައިވެ އެވެ.

ބައެއް މީހުން ބުނާ ގޮތުގައި ކުއްލިއަކަށް އެހާ ބޮޑަށް ފެތުރުނީ ޕެރޭޑާއި ފުޅަނދުބުރު ބަލަން ޖަމާވުމުން ކަމަށް ވުން އެކަށީގެންވެ އެވެ. ޑޮކްޓަރަށް ދައްކަން ގޮސް ތިބި މީހުންގެ ތެރޭގައި ފުޅަނދުބުރު ބަލަން ރޭ ނުކުތް މީހުން ހިމެނޭ ކަމަށް ފޭސްބުކާއި ޓުވިޓާގައި ލިއެފައިވެ އެވެ.

އެކަމަކު އޭގެ ކުރިން ވެސް ހޮޑުލުމާއި ބޭރަށް ހިންގާތީ ނުނިކުންނަ ކަމަށް ވެސް ބައެއް މީހުން ބުނެފައިވެ އެވެ.

ބޭރަށް ހިންގުމާއި ހޮޑުލުން ފެތުރެން އާންމުކޮށް މެދުވެރިވަނީ ކާބޯތަކެތީގެ ޒަރީއާއިން ނުވަތަ ބަލިޖެހިފައިވާ މީހެއްގެ ފަރާތުންނެވެ. މިއީ ކާބޯތަކެއްޗާއި ފެނުގެ ޒަރީއާ އިން ފެތުރޭ ބައްޔަކަށް ވާތީ ސާފުތާހިރުކަމަށާއި ކާބޯތަކެތީގެ ރައްކާތެރި ކަމަށް ހާއްސަ ސަމާލުކަމެއް ދޭން ޖެހޭނެ އެވެ.

އާދަޔާހިލާފަށް ކަރު ހިއްކުމާއި ކުޑަކަމުދާ މިންވަރު މަދުވުމާއި މާ ބޮޑަށް ވަރުދެރަވުމާއި އާދަޔާ ހިލާފަށް ބަނޑުގައި ރިއްސުމުގެ އިތުރުން ހޮޑުލެވުމާއި ބޮޑުކަމު ދާއިރު ލޭގެ އަސަރު ހުރުން ފަދަ އަލާމާތްތައް ފާހަގަ ކުރެވޭ ނަމަ، ވީހާ ވެސް އަވަހަކަށް ޑޮކްޓަރަށް ދައްކަން ސަމާލުކަން ދޭނެ ޖެހޭނެ ކަމަށް ޑޮކްޓަރުން ލަފާ ދެއްވަ އެވެ.