ރަށްރަށުގައި ކުނި މެނޭޖުކުރުމަށް ގްރީން ފަންޑުން 30 މިލިއަން ރުފިޔާ ދީފި

ރަށްރަށުގައި ކުނި މެނޭޖުކުރުމަށް މޯލްޑިވްސް ގްރީން ފަންޑުން 30 މިލިއަން ރުފިޔާ ދޭން ސަރުކާރުން މިއަދު ނިންމައިފި އެވެ.

މިއީ ރަށްރަށުގައި ކުނި މެނޭޖުކުރުމުގައި ގްރީން ފަންޑުން ފައިސާގެ އެހީ ދިން ފުރަތަމަ ފަހަރެވެ.

އެ ފައިސާ ރަށްރަށުގެ ކައުންސިލުތަކަށް ހަވާލުކުރުމުގެ ގޮތުން ތިމާވެއްޓާ ބެހޭ މިނިސްޓްރީގައި މިއަދު މެންދުރު ފަހު ހާއްސަ ރަސްމިއްޔާތެއް ބޭއްވި އެވެ. އެ ރަސްމިއްޔާތުގައި ތިމާވެއްޓާ ބެހޭ މިނިސްޓަރު އައިމިނަތު ޝައުނާ ވެސް ބައިވެރިވެވަޑައިގެންނެވި އެވެ. އަދި ރައީސް އޮފީހާއި އެލްޖީއޭ އަދި ކައުންސިލުތަކުގެ އިސްވެރިން ވެސް އެ ރަސްމިއްޔާތުގައި ބައިވެރިވެވަޑައިގެންނެވި އެވެ.

ތިމާވެއްޓާ ބެހޭ މިނިސްޓްރީގެ ނޫސްބަޔާނުގައި ބުނީ ރާއްޖޭގެ ސިޓީތައް ފިޔަވައި ހުރިހާ ރަށަކަށް، 178 ރަށަކަށް މި ފައިސާ ދޫކުރަން ނިންމާފައިވާ ކަމަށެވެ. އެ ރަށްރަށަށް ގްރީން ފަންޑުން މުޅި ޖުމްލަ 30.8 މިލިއަން ރުފިޔާ ދޫކުރާނެ ކަމަށް މިނިސްޓްރީން ބުންޏެވެ.

މިނިސްޓްރީން ބުނި ގޮތުގައި، ރަށްރަށުގައި ކުނި މެނޭޖުކުރުމަށް ދިމާވެފައިވާ އެންމެ ބޮޑު މައްސަލައަކީ ހަރަދު ބޮޑުވުމެވެ. ކުނި މެނޭޖުކުރާނެ ނިޒާމެއް ރަށްރަށުގައި ހެދިޔަސް، އެ މަސައްކަތުގައި ގެންގުޅޭ ސާމާނު ރަނގަޅަށް މަރާމާތުކޮށް ނުބެލެހެއްޓޭތީ އެކަމުގެ ޝަކުވާ ކައުންސިލުތަކުން ކުރެ އެވެ. ގްރީން ފަންޑުން އެކަމަށް އެހީ ދޭން ސަރުކާރުން ނިންމީ އެ ޝަކުވާތަކަށް ނިމުމެއް ގެނައުމަށެވެ.

މި އަހަރުން ފެށިގެން ދެން ކޮންމެ އަހަރަކު ވެސް ގްރީން ފަންޑުން ރަށްރަށުގައި ކުނި މެނޭޖުކުރުމަށް ފައިސާގެ އެހީ ދޭނެ ކަމަށް މިނިސްޓްރީން ބުންޏެވެ.

މޯލްޑިވްސް ގްރީން ފަންޑަކީ ރާއްޖެ އަންނަ ޓޫރިސްޓުން އަތުން ނަގާ ގްރީން ޓެކްސް ޖަމާކުރުމަށް 2019 ވަނަ އަހަރު އުފެއްދި ޓްރަސްޓް ފަންޑެކެވެ.

މިނިސްޓްރީން ބުނި ގޮތުގައި، 2019 އިން ފެށިގެން އެ ފަންޑުން ކުރި ހަރަދުތަކަށް ބަލާއިރު، ފަންޑުގެ 63 ޕަސެންޓް ހަރަދުކޮށްފައި ވަނީ ފެނާއި ނަރުދަމާގެ މަޝްރޫއުތަކަށެވެ. އަދި 20 ޕަސެންޓް ހަރަދުކޮށްފައި ވަނީ ކުނި މެނޭޖުރުމުގެ މަޝްރޫއުތަކަށެވެ. އަދި 15 ޕަސެންޓް ހަރަދުކޮށްފައި ވަނީ ގޮނޑުދޮށް ހިމާޔަތްކުރުމުގެ މަޝްރޫއުތަކަށެވެ. އަދި ބާކީ ހަރަދުކޮށްފައި ވަނީ ތިމާވެށި ހިމާޔަތްކުރުމުގެ މަޝްރޫއުތަކަށް ކަމަށް މިނިސްޓްރީން ބުނެ އެވެ.