ދުވާލަކު ހެކްޓަރެއް ހިއްކޭ ޑްރެޖަރު ރާއްޖެ އަތުވެއްޖެ

އެމްޓީސީސީން ކުއްޔަށް ހިފި، ދުވާލަކު އެއް ހެކްޓަރުގެ ބިން ހިއްކުމުގެ ގާބިލްކަން ލިބިފައިވާ ޑްރެޖަރު ރާއްޖެ އަތުވެއްޖެ އެވެ.

ބެލްޖިއަމްގެ ކުންފުންފުންޏެއްގެ އުޅަނދެއް ކަމަށްވާ "ފިލީޕޯ ބްރޫނެލޭޝީ" ރޭގެ ވަގުތެއްގައި ރާއްޖެ އައިސް މި ވަގުތު އޮތީ ކަސްޓަމްސް ކްލިއަރެންސަށް ހއ. އުލިގަމުގައި ބަނދަރުކޮށްފަ އެވެ.

ކްލިއަރެންސް ނިމުމާ އެކު އެ އުޅަނދު ދާނީ އެންމެ ފުރަތަމަ އެއިން މަސައްކަތް ފެށުމަށް ހަމަޖެހިފައިވާ ހއ. އިހަވަންދުއަށެވެ.

ދިގުމިނުގައި 142.5 މީޓަރު (467 ފޫޓް) އަދި ފުޅާ މިނުގައި 27.5 މީޓަރު (90 ފޫޓް) ހުންނަ މި އުޅަނދަކީ 11،300 ކިއުބިކް މީޓަރުގެ ހޮޕަ ކެޕޭސިޓީ (އެއްފަހަރާ ލޯޑްކުރުމުގެ ގާބިލްކަން) ލިބިފައިވާ އެއްޗެކެވެ.

އެމްޓީސީސީގެ ސީއީއޯ އާދަމް އާޒިމް އިއްޔެ "މިހާރު" އަށް ވިދާޅުވި ގޮތުގައި މިއީ މިހާރު ބޭނުންކުރާ އެ ކުންފުނީގެ މަހާ ޖައްރާފައިން ހަތަރު ދުވަހުން ހިއްކޭތަން އެއް ދުވަހުން ހިއްކޭ އެއްޗެކެވެ.

އާ ޑްރެޖަރުން ނުވަ ރަށެއް ހިއްކަން ވަނީ ނިންމައިފަ އެވެ. އެއީ، އިހަވަންދޫގެ އިތުރުން ށ. ކޮމަންޑޫ، އއ. އުކުޅަސް، އއ. ބޮޑުފޮޅުދޫ، ރ. އުނގޫފާރު، މ. ދިއްގަރު، ފ. ފީއަލީ، ކ. ދިއްފުށި އަދި ކ. ގުޅި އެވެ. މި އަހަރުގެ އޮކްޓޯބަރު މަސް ނިމުމުގެ ކުރިން އެ ހުރިހާ ރަށެއް ހިއްކާ ނިންމޭނެ ކަމަށް އާޒިމް ވިދާޅުވި އެވެ.

"ފިލީޕޯ ބްރޫނެލޭޝީ" އަކީ 2003 ބަނދެފައިވާ އުޅަނދެކެވެ.