އާ ޑްރެޖަރުން ދާންދޫ ބިން ހިއްކުމުގެ މަސައްކަތް ރަސްމީކޮށް ފަށައިފި

އާ ޑްރެޖަރެއް ބޭނުންކޮށްގެން ގއ.ދާންދޫ ބިން ހިއްކުމުގެ މަސައްކަތް ރަސްމީކޮށް އިއްޔެ ފަށައިފި އެވެ.

ބިން ހިއްކުން ރަސްމީކޮށް ފެށިއިރު ވެސް މަސައްކަތުގެ ގާތްގަނޑަކަށް 50 ޕަސެންޓް އޮތީ ނިމިފަ އެވެ.

މަސައްކަތްކުރާ އެމްޓީސީސީގެ ސީއީއޯ އާދަމް އާޒިމް އެ ރަސްމިއްޔާތުގައި ވިދާޅުވީ، އޮކްޓޫބަރު މަސް ނިމުމުގެ ކުރިން ބިން ހިއްކާ ނިންމާނެ ކަމަށެވެ. ބިން ހިއްކުމުން އެރަށުގެ މިހާރު އޮތް ބިމުގެ ސަރަހައްދު ދެ ގުނައަށް ބޮޑުވާނެ އެވެ.

މި ޕްރޮޖެކްޓަށް 180 މިލިއަން ރުފިޔާ ހޭދަވާނެ އެވެ. އަލަށް ހިއްކާ ބިން، ދާންދޫގެ މިހާރުގެ ބިމާ ބްރިޖަކުން ގުޅާލާނެ އެވެ.

ބިން ހިއްކަނީ އެމްޓީސީސީއަށް އަލަށް ގެނައި "ބޮޑު ޖައްރާފު"ގެ ނަން ދީފައިވާ ޑްރެޖަރުންނެވެ. މި ޑްރެޖަރުން ކަނޑުގެ 18 މީޓަރު އަޑިން ވެލި ނެގޭނެ އެވެ. މިއީ އައިއެޗްސީ ބީވާގެ އެންމެ ފަހުގެ މޮޑެލްގެ ކަޓާ ޑްރެޖަރެކެވެ.

އެމްޓީސީސީން ގެންގުޅޭ އެންމެ ބޮޑު ޑްރެޖަރު މަހާ ޖައްރާފުން ކަނޑުގެ 50 މީޓަރުގެ އަޑިން ވެލި ނެގޭނެ އެވެ. ދިގުމިން 92 މީޓަރަށް ވުރެ ދިގު އަދި 16 މީޓަރު ފުޅާ އެ ބޯޓުން އެއްފަހަރާ 3،700 ކިއުބިކް މީޓަރުގެ ވެލި ބަރުކުރެވެ އެވެ.