ޗައިނާގެ ރެސްޓޮރެންޓެއްގައި ގޭސް ޓޭންކެއް ގޮވައި 31 މީހުން މަރުވެއްޖެ

ޔިންޗުއާން (ޖޫން 22) - ޗައިނާގެ ހުޅަނގު އުތުރު ސަހަރެއް ކަމަށްވާ ޔިންޗުއާންގައި ހުރި ބާބެކިޔު ރެސްޓޮރެންޓެއްގައި ހުންނަ ގޭސް ޓޭންކު ގޮވުމުގެ ސަބަބުން، އެ ތަނުގައި ރޯވެ މަދުވެގެން 31 މީހަކު މަރުވެ އިތުރު ބަޔަކު ޒަޚަމްވެއްޖެ އެވެ.

ރޭ އިރާކޮޅު މި ހާދިސާ ހިނގީ މިހާރު އެ ގައުމުގައި ފާހަގަކުރަމުން އަންނަ ޑްރެގަން ބޯޓް ފެސްޓިވަލުގެ ހަރަކާތްތަކަކަށް ގިނަ ބަޔަކު އެ ރެސްޓޮރަންޓަށް އެއްވެ އުޅުނު ވަގުތެއްގަ އެވެ. ތިން ދުވަހަށް ފާހަގަކުރާ މި ފެސްޓިވަލުގައި އެންމެ އާންމު އެއް ކަމަކަށް އޮންނާނީ މީރު ކެއުންތައް ކެއުމެވެ.

ޗައިނާގެ ރަސްމީ ޓީވީ ޗެނަލުން ބުނި ގޮތުގައި ގޭސް ޓޭންކު ގޮވީ، ގިނަ ބަޔަކު އެއްވެގެން ފެސްޓިވަލް ފާހަގަކުރުމަށް ބޭއްވި ކެއުމެއް ފެށިތާ މާ ގިނައިރުތަކެއް ނުވަނީސް ރޭ 8:40 ހާއިރެވެ. އެ ހާދިސާ ހިނގީ، އެ ރެސްޓޮރަންޓުގައި ބަހައްޓާފައި ހުންނަ ގޭސް ޓޭންކުން ގޭސް ލީކްވެގެން ކަމަށް ވެސް ޗައިނާ ޓީވީން ބުންޏެވެ.

މި ހާދިސާގައި މަދުވެގެން ހަތް މީހަކު ޒަޚަމްވި އިރު، އޭގެ ތެރެއިން އެކަކުގެ ހާލު ވަރަށް ސީރިއަސް ކަމަށް ހޮސްޕިޓަލުން ބުނެ އެވެ. ޒަޚަމްވި މީހުންގެ ހަށިގަނޑުގެ އެކި ތަންތަން ފިހި، ބައެއް ގުނަވަންތައް ޒަޚަމްވެފައިވާތީ އެ ހުރިހާ އެންމެންނަށް ވެސް މިހާރު ފަރުވާ ދެމުން އަންނަނީ ހޮސްޕިޓަލުގައި އެޑްމިޓް ކޮށްގެންނެވެ.

ގޭސް ޓޭންކު ގޮވުމުގެ ސަބަބުން ރެސްޓޮރަންޓްގެ އިމާރާތަށް ބޮޑެތި ގެއްލުންތަކެއް ލިބުނެވެ. އަދި އެ ތަނުގައި އަލިފާން ރޯވުމާއެކު މުޅި އިމާރާތަށް ދުންގަނޑު ފެތުރިގެން ދިޔަ ކަމަށާއި، މަތީ ބުރިތަކުގައި ތިބި މީހުން އިމާރާތުން ނެރެދިނީ، އަލިފާން ނިއްވާ މީހުން އެ ތަނަށް ގޮސް ކުރި މަސައްކަތުން ކަމަށް ނޫސްތަކުން ބުނެ އެވެ.

މި ހާދިސާއާ ގުޅިގެން، ފުލުހުން ވަނީ ތަހުގީގުގެ ބޭނުމަށް ނުވަ މީހަކު ހައްޔަރުކޮށްފަ އެވެ. އޭގެ ތެރޭގައި ރެސްޓޮރަންޓުގެ ވެރިމީހާ ވެސް ހިމެނެ އެވެ. ސީރިއަސް މައްސަލައެއްގެ ގޮތުގައި މި ހާދިސާ ތަހުގީގު ކުރުމަށް ރައީސް ޝީ ވަނީ އަމުރު ކުރައްވައިފަ އެވެ.

ޗައިނާ ފުލުހުން ބުނި ގޮތުގައި މި ހާދިސާގައި މަރުވި އަދި ޒަޚަމްވި ގިނަ މީހުންނަކީ، މަތީ ސާނަވީ މަރުހަލާގައި ކިޔަވާ ކުދިންނެވެ. އެހެންކަމުން މިއީ ގަސްދުގައި ބަޔަކު ދިން ހަމަލާއެއްގެ ސަބަބުން ހިނގި ހާދިސާއެއް ކަމަށް ވެސް ބައެއް މީހުން ތުހުމަތުކުރެ އެވެ.