ނައިޖީރިއާގައި ބޯޓެއް ބަންޑުންޖަހާލައި 100 މީހުން މަރުވެއްޖެ

ނައިޖީރިއާގެ އުތުރުގައި އޮންނަ ކްވާރާ ސްޓޭޓްގެ ތެރެއިން ނައިޖަރު ކޯރުގައި ދަތުރުކޮށްފައި ދިޔަ ބޯޓެއް ބަންޑުންޖަހާލައި، އެއިން ދަތުރުކުރި 100 އަށް ވުރެ ގިނަ މީހުން މަރުވެއްޖެ ކަމަށް ނައިޖީރިޔާ ސަރުކާރުން އިއްޔެ ބުނެފި އެވެ.

ނައިޖީރިޔާ ފުލުހުން ބުނި ގޮތުގައި ބޯޓު ބަންޑުންޖަހައިލީ މިދިޔަ ހޯމަ ވިލޭރޭ ދަންވަރުގެ ވަގުތެއްގަ އެވެ. ބަންޑުން ޖަހައިލި ބޯޓުން ދަތުރުކުރި މީހުންގެ އަދަދު ކަށަވަރު ނުވާތީ، މި ހާދިސާގައި އެއްވެސް މީހަކު ސަލާމަތްވިކަން އަދި ގެއްލިފައިވަނީ ކިތައް މީހުންކަން ވެސް ޔަގީން ނުވާ ކަމަށް ފުލުހުން ބުންޏެވެ.

ބަންޑުންޖަހައިލި ބޯޓަކީ ނައިޖީރިއާގެ އެންމެ ބޮޑު ސްޓޭޓް ކަމަށްވާ ނައިޖަރުގައި އޮތް ކާވެނީގެ ވަލީމާއެއްގައި ބައިވެރިވި ބަޔަކު ވަލީމާ ނިންމާފައި އެނބުރި ކްވާރާ ސްޓޭޓަށް ދަތުރުކުރި ބޯޓެކެވެ. ބޯޓު ބަންޑުންޖަހައިލި ސަރަހައްދުން ކޯރު ތެރެއިން ފެނުނު 103 މީހެއްގެ ހަށިގަނޑު އެއްގަމަށް އަރުވާފައިވާ އިރު، އޭގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނެ އެވެ.

ކޯރު ތެރެއަށް ބޯޓު ބަންޑުންޖަހައިލީ އެރޭގެ ދަންވަރު 3:00 ހާއިރު ކަމަށްވެފައި އެއީ، ގިނަ މީހުން ނިދާފައި ތިބި ވަގުތު ކަމަށްވާތީ، ބޯޓު ބަންޑުން ޖަހައިލިކަން ކްވާރާ ސްޓޭޓްގެ މީހުންނަށް އެނގުނީ އެ ދުވަހުގެ ފަތިސްވެ އަލިވިލުނު ފަހުންނެވެ. އަދި ބޯޓު ބަންޑުންޖަހައިލި ސަރަހައްދުން ދިރިހުރި އެއްވެސް މީހަކު ނުފެނުމުން، އެ ހާދިސާގައި އެއްވެސް މީހެއްގެ ފުރާނަ ސަލާމަތްވި ކަމެއް ނޭނގެ އެވެ.

ކްވާރާ ސްޓޭޓްގެ އާންމުން ބުނި ގޮތުގައި ކޯރު ތެރެއިން ފެނުނު ހަށިގަނޑުތަކުގެ ތެރެއިން، ވަރަށް މަދު މީހެއްގެ ގައިގައި ނޫނީ ލައިފް ޖެކެޓެއް ވެސް އަޅުވާފައެއް ނެތެވެ. އަދި ލައިފް ޖެކެޓް އަޅުވައިގެން ތިބި މީހުން ވެސް މަރުވީ، ބޯޓު ބަންޑުންޖަހައިލުމުން ބޯޓުގެ ދަށުވެގެން ކަމަށް ބެލެވެ އެވެ.

މި ހާދިސާގައި މަރުވި މީހުންގެ ތެރެއިން ކާކުކަން ދެނެގަނެވިފައިވާ 60 މީހެއްގެ ޖަނާޒާ އިއްޔެ ބާއްވައިފި އެވެ. ބޯޓުން ދަތުރުކުރީ ކްވާރާ ސްޓޭޓްގެ އެކި އަވަށްތަކުގެ މީހުން ކަމަށްވާތީ، ވަލީމާއަށް ގޮސް އެނބުރި ނާންނަ މީހުން ހޯދުމަށް، އެ އަވަށްތަކުގެ މީހުން މިހާރު ދަނީ، ބޯޓު ބަންޑުންޖަހައިލި ސަރަހައްދަށް ޖަމާވަމުންނެވެ.

މިފަހަރު ބޯޓު ބަންޑުންޖަހައިލި ސަރަހައްދުގައި، 2021 ވަނަ އަހަރު ވެސް ހަމަ މިފަދަ ހާދިސާއެއް ހިނގައި 160 މީހަކު މަރުވި އެވެ. މެއި 2021 ގައި ހިނގި އެ ހާދިސާގައި ބަންޑުންޖަހައިލީ، ހުއްދަ އޮތް މިންވަރަށް ވުރެ އެތައް ގުނައެއް އިތުރަށް މީހުން އަރުވައިގެން ދަތުރުކުރި ފެރީ ބޯޓެކެވެ.