ރާއްޖެ-ސީޝެލްސްގެ ވައިގެ ދަތުރުތައް ފަށައި އޮން އެރައިވަލް ވިސާ ދެނީ

ރާއްޖެ އާއި ސީޝެލްސްއާ ދެމެދު ވައިގެ ދަތުރުތައް ފަށައި، ދިވެހިންނަށް އޮން އެރައިވަލް ވިސާ ދިނުމުގެ އެއްބަސްވުމުގައި މިއަދު ސޮއިކޮށްފި އެވެ.

އެ ގައުމުގެ ރައީސް ވޭވަލް ރާމްކަލާވަން ރާއްޖެ އަށް އިއްޔެ ފެއްޓެވި ރަސްމީ ދަތުރުފުޅުގައި މުހިއްމު ހަތަރު އެއްބަސްވުމެއްގއި މިއަދު ސޮއިކުރި އެވެ.

ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓުގައި ވިދާޅުވީ، އަލަށް ސޮއިކުރި އެއާ ސާވިސް އެގްރިމެންޓުގެ ދަށުން ރާއްޖެ އާއި ސީޝެލްސްއާ ދެމެދު ވައިގެ މަގުން ސީދާ ދަތުރުތައް ފަށާނެ ކަމަށެވެ. އެކަމުގެ ސަބަބުން، ދެ ގައުމުގެ މީހުންގެ މެދުގައި ގުޅުން ބަދަހިވެ، ވިޔަފާރި އާއި ޓޫރިޒަމް ދާއިރާ އަށް މަންފާ ކުރާނެ ކަމަށް އޭނާ ވިދާޅުވި އެވެ.

ސީދާ ދަތުރުތައް ފެށުމުގެ އިތުރުން، ކުރިން ވިސާ ނެގުމަކާ ނުލައި ދިވެހިންނަށް 30 ދުވަހަށް ސީޝެލްސް އަށް ދަތުކުރެވޭނެ ގޮތް ވެސް ވަނީ، އެ ގައުމުގެ ރައީސްގެ ރަސްމީ ދަތުރުފުޅުގައި ހަމަޖައްސަވައިފަ އެވެ.

"މިކަމުގެ ސަބަބުން ދެ ގައުމުގެ ރައްޔިތުންގެ ދެމެދުގައި ގުޅުން ބަދަހިވެ ސީޝެލްސް އާއި ދިވެހިރާއްޖެއާ ދެމެދު އޮންނަ ގާތް ރަހުމަތްތެރިކަމުގެ ގުޅުމާއި ވިޔަފާރި އާއި އިގުތިސޯދީ ގުޅުން އިތުރަށް ތަރައްގީ ކުރުމަށް މަގުފަހިވާނެ،" ޝާހިދު ކުރެއްވި ޓްވީޓުގައި ވިދާޅުވި އެވެ.

ގިނަ ގައުމުތައް މެދުވެރިކޮށް، ރޭވިގެން ހިންގާ ކުށްތައް ހުއްޓުވުމާއި ކަނޑުމަގުން ކުރިމަތިވާ އެހެނިހެން ނުރައްކާތަކާ ގުޅޭގޮތުން ވެސް ރާއްޖެ އާއި ސީޝެލްސް ސަރުކާރާ ދެމެދު އެކުލަވާލާފައިވާ ޕްރޮޓޮކޯލެއްގައި ސޮއިކޮށްފައި ވެ އެވެ.

ޝާހިދު ވިދާޅުވީ އެއީ މި ސަރަހައްދުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ދެ ގައުމު ގުޅިގެން ކުރާ މަސައްކަތްތައް އިތުރުކުރުމަށް އެޅި މުހިންމު ފިޔަވަޅެއް ކަމަށެވެ. އެންމެންގެ އެއްބާރުލުމާ އެކު، ކަނޑުގެ މަސްލަހަތުތައް ހިމާޔަތްކުރަން މަސައްކަތް ކުރުމަކީ މުހިއްމު ކަމެއްކަން އޭނާ ފާހަގަކުރެއްވި އެވެ.

ރަސްމީ ދަތުރުފުޅުގައި އެންމެ ފަހު އެއްބަސްވުމަކަށް ސޮއިކޮށްފައި ސޔޗވަނީ ދެ ގައުމުގެ ޒުވާނުންގެ ތަރައްގީއަށާއި ހުނަރުވެރިކަން އިތުރުކުރުމަށެވެ.